Vegna umræðu um réttindi fólks til að sækja læknismeðferðir innan EES svæðisins
1. apríl 2022
Sjúkratryggingar vilja koma á framfæri upplýsingum um réttindi sjúkratryggðra til þess að sækja læknismeðferð innan EES svæðisins. Reglurnar eru hluti regluverks ESB um læknismeðferðir yfir landamæri sem gilda hér á landi.
![](https://images.ctfassets.net/8k0h54kbe6bj/7nYUF5kbiw29mRSrAfz2Ul/acf3cdb2d69f1ff900527f41c55fdfa9/merki.png?w=50&fm=webp&q=80)
![Sjúkra lógó transparent](https://images.ctfassets.net/8k0h54kbe6bj/7nYUF5kbiw29mRSrAfz2Ul/acf3cdb2d69f1ff900527f41c55fdfa9/merki.png?w=774&fm=webp&q=80)
Ef biðtími eftir nauðsynlegri læknismeðferð hér á landi er læknisfræðilega óásættanlegur greiða Sjúkratryggingar meðferðarkostnað á heilbrigðisstofnun sem er með samning við hið opinbera, auk fargjalds og dagpeninga vegna ferðarinnar.
Kjósi sjúkratryggður hins vegar að sækja meðferð erlendis til einkarekinnar heilbrigðisstofnunar gilda aðrar reglur. Sjúkratryggingar greiða í slíkum tilvikum sömu fjárhæð og þjónustan myndi kosta ef hún væri veitt hér á landi. Þá er ekki greiddur ferðakostnaður eða dagpeningar.
Ef fólk sækir um læknismeðferð erlendis til Sjúkratrygginga eru umsóknir metnar af sérstöku fagteymi áður en ákvörðun er tekin í málinu. Ákvörðun Sjúkratrygginga þarf að liggja fyrir áður en meðferð fer fram.
Sjúkratryggingar hvetja þá sem vilja fá upplýsingar um möguleika á læknismeðferðum erlendis að hafa samband en hvert einstakt mál þarf að skoða sérstaklega.