Einnig fengu starfsmenn fræðslu um hvernig rannsókn og ákærumeðferð netbrota (cybercrime) er háttað í Noregi og Hollandi auk þess að fá kynningu um SIRIUS verkefnið sem Eurojust og Europol standa sameiginlega að. Um er að ræða miðlun á þekkingu og upplýsingum um aðgang að rafrænum sönnunargögnum yfir landamæri.

Þá heimsóttu starfsmenn ríkissaksóknara Alþjóðasakamáladómstólinn, International Criminal Court (ICC) þar sem saksóknari við dómstólinn, Nzhat Shameem Khan, og fleiri starfsmenn upplýstu okkur um hlutverk og starfsemi dómstólsins og ekki síst verkefni skrifstofu saksóknara.

Ríkissaksóknari átti einnig fund með Sue Preenen, ríkissaksóknara Hollands, þar sem farið var yfir helstu verkefni embættanna. Þá fundaði ríkissaksóknari og Kolbrún Benediktsdóttir, sendisaksóknari Íslands hjá Eurojust, með Michael Schmid, forseta Eurojust þar sem m.a. var farið var yfir skipulag og verkefni ákæruvaldsins á Íslandi og þau málefni sem sendisaksóknari Íslands á aðkomu að hjá Eurojust.