Rannsóknamiðstöð Íslands

Eyvör úthlutar netöryggisstyrkjum

23. janúar 2026

Mikill áhugi var á netöryggisstyrkjum Eyvarar, sem staðfestir voru 19. janúar þegar Eyjólfur Ármannsson innviðaráðherra, undirritaði samninga um veitingu netöryggisstyrkja til 14 verkefna að heildarupphæð 117 milljóna króna.

Um er að ræða þriðju styrkjaúthlutun Eyvarar á síðustu tveimur árum. Alls bárust 48 umsóknir, fleiri en nokkru sinni fyrr, sem undirstrikar vaxandi áhuga á styrkjunum og aukinn kraft í netöryggismálum hér á landi.

Allar umsóknir um netöryggisstyrki Eyvarar eru metnar af fagráði, sem gerir tillögu til stjórnar Eyvarar um úthlutun styrkja. Að fenginni samþykkt stjórnar eru úthlutanir staðfestar af ráðherra og í kjölfarið eru gerðir samningar við styrkþega.

Hrannar Ásgrímsson, verkefnastjóri Eyvarar:

Áhugi á netöryggisstyrkjum Eyvarar hefur alltaf verið talsverður, en í þessari úthlutun bárust fleiri umsóknir en nokkru sinni fyrr. Það endurspeglar bæði öflugt grasrótarstarf innan íslenska netöryggissamfélagsins og skýra þörf fyrir aukið fjármagn til verkefna á þessu sviði. Það er einmitt hlutverk og vilji Eyvarar að styðja við nýsköpun og efla hæfni íslensks samfélags á sviði netöryggis.

Markmið styrkjanna er að efla netöryggisgetu Íslands og styðja við íslenskt netöryggissamfélag með virku og öflugu Evrópusamstarfi í netöryggismálum. Til þess að hljóta styrk þurfa verkefni að falla undir einn eða fleiri af eftirfarandi flokkum:

Efling netöryggismenningar og vitundar.
Hagnýt menntun, rannsóknir og þróun.
Örugg stafræn þjónusta og nýsköpun.
Öflug löggæsla, netvarnir og þjóðaröryggi.
Skilvirk viðbrögð við atvikum.
Sterkir innviðir, tækni og lagaumgjörð.

Eyvör er hæfnissetur Íslands á sviði netöryggis og er hluti af netöryggissviði Fjarskiptastofu og er styrkt verkefni af Evrópska hæfnisetrinu í netöryggi (ECCC).

Eftirfarandi aðilar hlutu styrk:

Umsækjandi	Heiti verkefnis	Verkefnisstjóri
Atlas Cloud	Gagnaafritun og eftirlitskerfi fyrir Atlas skýið	Pálmar Garðarsson
Dent & Buckle	Þriggja skrefa áætlun í netöryggi. Að styrkja öryggi skýjalausnar frá Dent & Buckle á forvirkan hátt.	Ingunn Ingimarsdóttir
Fjölmiðlanefnd	Rauðu flöggin - Fræðsla og vinnustofur um netöryggi, netsvik og almenna stafræna færni fyrir eldra fólk	Haukur Brynjarsson
Gagnaglímufélag Íslands	Netöryggisáfangi fyrir framhaldsskóla	Hjalti Magnússon
Indó sparisjóður	Öryggisúttekt á hugbúnaði er ítarleg öryggisprófun á umhverfi og hugbúnaði Indó	Steinar Hugi Sigurðarson
Maven	Bætt netöryggi hjá Maven: Öruggar gagnaveitur og gagnavinnslur	Helgi Hrafn Halldórsson
Mitoflux	Mitoflux Rx	Birta Ósk Theodórsdóttir
Ríkislögreglustjóri	Öruggari íslensk æska 2.0 - samþættar forvarnir gegn stafrænu ofbeldi meðal barna	Eygló Þóra Harðardóttir
Secure Code Warrior	Samanburðarmælingar á kóðaöryggi stórra málalíkana (LLM)	Tjörvi Jóhannsson
Slökkvilið höfuðborgarsvæðis	Efling netöryggis og netöryggisvitundar hjá Slökkviliði höfuðborgarsvæðisins	Ingveldur Lára Þórðardóttir
Strandabyggð	Örugg framtíð – Netöryggi í Strandabyggð	Heiðrún Harðardóttir
Tern Systems	Samþætt innleiðing á NIS2, EASA Part-IS og ISO/IEC 27001	Sigurjón Páll Kolbeins
Tryggingastofnun	Örugg dreifð gagnadeiling fyrir greiningu og framsetningu	Hermann Ólason
Varðberg	Netöryggi á Alþjóðanámskeiði Varðbergs 2026	Hera Melgar Aðalheiðardóttir