Hlutverk Transteymis

Transteymi Barna- og unglingageðdeildar Landspítala sinnir greiningu og meðferð einstaklinga undir 18 ára aldri, sem upplifa misræmi milli kynvitundar sinnar og þess kyns sem þeim var úthlutað við fæðingu og óska eftir upplýsingum eða aðgengi að læknisfræðilegum inngripum.

Fræðsla og stuðningur fyrir foreldra og aðstandendur

“Sum börn kanna kyn sitt allt frá unga aldri og verða eins konar kynjakönnuðir. Mikilvægt er að gefa þeim svigrúm til þess og tækifæri til að lifa utan hefðbundinna staðalímynda um kyn. Það þarf því að mæta börnunum þar sem þau eru og skapa þeim umhverfi án fordóma, væntinga og þrýstings.
Þjónusta við trans börn getur verið margvísleg en mögulega er ekki þörf á þjónustu fagaðila í öllum tilfellum. Þörf fyrir þjónustu miðast við líðan barns/ungmennis, kynama, kynþroska og þörf á mögulegum inngripum.”

Gagnlegt efni til að kynna sér fyrir foreldra/forsjáraðila/aðstandendur trans barna og ungmenna:

• Fræðsluefni um kynvitund á Heilsuveru

• Trans 101 - Stutt fræðsla um helstu hugtök tengd kynvitund og kyntjáningu.

Þjónusta Transteymis

Þjónusta á göngudeild BUGL hefst í greiningarteymi. Þar fer fram greining á mögulegum líffræðilegum og sálfélagslegum áskorunum. Það er einstaklingsbundið hversu langan tíma greiningarferlið tekur. Að lokinni vinnslu í greiningarteymi er gerð meðferðaráætlun, ef þörf er á.

Þjónusta Transteymis hefst þegar einstaklingur hittir starfsmann transteymis í viðtali. Vinnan innan Transteymis getur tekið mislangan tíma. Það er mikilvægt að teymið fái sem besta mynd af stöðu og líðan ungmennis og veita heildrænan stuðning í gegnum ferlið.

Teymið leggur áherslu á góða samvinnu og traust milli fagaðila teymisins, barns/ungmennis og forsjáraðila.

Klínískar leiðbeiningar og lagarammi

Teymið hefur klínískar leiðbeiningar WPATH til hliðsjónar í vinnu sinni, auk alþjóðlegra klínískra leiðbeininga innkirtlalækna, og leggur áherslu á þrepaskipta ákvarðanatöku í greiningar- og meðferðarferlinu í samræmi við lög um kynrænt sjálfræði.

Rétt er að vekja athygli á að skv. 11.gr. / 11. gr. a) laga um kynrænt sjálfræði er ekki gert ráð fyrir að gerðar séu varanlegar breytingar á kynfærum, kynkirtlum eða kyneinkennum einstaklings yngri en 16 ára, nema líkamlegar heilsufars ástæður krefjist þess. Til varanlegra breytinga teljast meðal annars skurðaðgerðir, lyfjameðferðir og önnur óafturkræf læknisfræðileg inngrip.

Teymið gefur sér að lágmarki 6 – 12 mánuði til að kynnast skjólstæðingi og meta forsendur þess að hægt sé að hefja inngrip sem einstaklingurinn óskar eftir og meta stuðningsþarfir í tengslum við mögulega meðferð.

Tilvísanir

Eftir að teymið telur að matstímabili sé lokið er tekin ákvörðun um framhaldið. Gerðar eru tilvísanir til innkirtlalækna barna eða til annarra fagaðila, eftir því sem við á.

Einstaklingum er vísað yfir til Transteymis fullorðinna við 18 ára aldur, ef við á.