Innkirtlalækningar sem viðbótarsérgrein við almennar lyflækningar

Námstími: 3 ár

Marklýsing

Marklýsing námsins lýsir innihaldi, framkvæmd og kröfum þess og þar með forsendum námslokavottorðs og umsóknar um sérfræðileyfi. Læknar sem ljúka sérnámi þessu á fullnægjandi hátt uppfylla kröfur alþjóðlegra sérfræðiviðurkenninga (Evidence of Formal Qualification, EFQ) í faginu og geta starfað sem slíkir á Íslandi og í öðrum Evrópuríkum þegar sótt hefur verið um viðeigandi leyfi.

Fullt sérnám í almennum lyflækningum á Íslandi hefur verið viðurkennt frá 2021. Marklýsingin fyrir sérnám í almennum lyflækningum er byggð á breskum marklýsingum og því byggir marklýsing fyrir undirsérgreinanám í innkirtlalækningum á sama grunni, þ .e. þeirri marklýsingu sem gildir til sérfræðiviðurkenningar í Bretlandi (e. Curriculum for Endocrinology and Diabetes Training August 2022).

Skipulag undirsérgreinanámsins miðar að því að þjálfa sérhæfð starfshæfniviðmið fyrir innkirtlalækningar (e. Specific capabilities in practice) ásamt því að viðhalda fyrri hæfni. Marklýsing þessi lýsir þannig forsendum, innihaldi, hæfnikröfum og framkvæmd undirsérgreinanáms í innkirtlalækningum á Íslandi til sérfræðiviðurkenningar, ásamt því að lýsa matskerfi, framvinduviðmiðum og handleiðarakerfi námsins.

Fullnægjandi framgangur og viðeigandi námslokavottorð gerir sérfræðilækni þannig kleift að sækja um innkirtlalækningar sem undirsérgrein lyflækninga og þannig hæfi til sjálfstæðra starfa sem sérfræðingur í innkirtlalækningum á Íslandi, Bretlandi og öðrum Evrópuríkjum.

Einn helsti tilgangur sérnáms í innkirtlalækningum er að tryggja gæði og sjálfbærni í læknisþjónustu á Íslandi við þá einstaklinga sem þjást af sjúkdómum í innkirtlum.

Kynning

Sérnám í innkirtlalækningum hefur verið í boði á Landspítala frá ársbyrjun 2025.
Sérnámið er sniðið að læknum sem hafa lokið fullu sérnámi í almennum lyflækningum á Íslandi, eða sambærilegri þjálfun erlendis, og hyggjast öðlast sérfræðiréttindi í undirsérgreininni innkirtlalækningar. Þetta er því sérhæft framhaldsnám til viðbótar við almennar lyflækningar.

Læknir þarf að hafa öðlast MRCP diploma gráðuna (eða sambærilega gráðu) áður en sérnám í undirsérgreininni er hafið.

Gert er ráð fyrir að tvö ár sérnámsins fari fram á Íslandi en að amk eitt ár fari fram á erlendu háskólasjúkrahúsi. Slíkt skiptinám eða námsdvöl erlendis er forsenda þess að öll skilyrði sérnámsins séu uppfyllt. Til að öðlast námslokavottorð þarf sérnámslæknir undirsérgreinarinnar auk þess að standast breskt eða evrópskt próf til sérfræðiréttinda í innkirtlafræðum.

Sérnámið er hæfnimiðað og fer frá á Göngudeild innkirtlasjúkdóma á Landspítala.