Fullt sérnám í endurhæfingarlækningum hérlendis er að lágmarki 5 ár. Gert er ráð fyrir að meginhluti námsins fari fram á endurhæfingardeildum og minni hluti í öðrum sérgreinum sem nýtast í náminu með hliðsjón af marklýsingunni og í samráði við sérnámshandleiðara, kennslustjóra og kennsluráð. Æskilegt er að taka hluta sérnámsins erlendis til að tryggja það að allir þættir marklýsingarinnar séu uppfylltir.

Skipulögð fræðsludagskrá er til staðar fyrir sérnámslækna í endurhæfingarlækningum þar sem farið er yfir helstu þætti sérnámsins. Gert er ráð fyrir um það bil hálfum degi á viku í fræðslu, bæði á haustönn og vorönn. Sérnámslæknar taka virkan þátt í kennslu en kennslustjóri hefur yfirumsjón með fræðsludagskránni. Mætingarskylda er í kennslu.

Á hverju ári er haldið klínískt próf fyrir sérnámslækna. Skiptist það í tvær stöðvar þar sem lögð verða fyrir sjúkratilfelli og ætlast er til að námslæknar átti sig á helstu færniskerðingum og komi með drög að endurhæfingaráætlun. Námslæknum er skylt að taka þátt í prófinu og fá allir námslæknar endurgjöf að prófi loknu.

Sérnámslæknir ber ábyrgð á eigin námi og leggur sig fram við að afla sér víðtækrar þekkingar og hæfni á öllum sviðum endurhæfingar. Í náminu tekur sérnámslæknirinn mið af marklýsingu, heldur rafræna framvinduskrá (eportfolio) og ber ábyrgð á að uppfylla lágmarkskröfur um fjölda matsblaða á hverri starfseiningu fyrir sig. Í lok hvers námsárs fer fram árlegt framvindumat þar sem farið er yfir stöðu og framvindu sérnáms hjá viðkomandi sérnámslækni.

Skipulögð fræðsludagskrá er til staðar fyrir sérnámslækna í endurhæfingarlækningum. Gert er ráð fyrir hálfum degi á viku fyrir formlega kennslu, bæði haustönn og vorönn. Reynt verður að samkeyra hluta kennslunnar með sérnámslæknum í öðrum sérgreinum svo sem heimilislækningum, lyflækningum og geðlækningum. Sérnámslæknar taka virkan þátt í kennslu en kennslustjóri hefur yfirumsjón með fræðsludagskránni.

Auk þessa taka sérnámslæknar virkan þátt í vikulegum sameiginlegum fræðslufundum lækna á Grensási, Reykjalundi og Kristnesi.

Framvinda: Sérnámslæknir þarf að halda rafræna framvinduskrá í gegnum allt sérnámið (eportfolio) Sökum fámennis íslensku þjóðarinnar er líklegt að námslæknar muni ekki geta tileinkað sér alla klíníska þætti framvinduskrárinnar á Íslandi. Gætu þær að einhverju leyti þurfa að taka sitt klíníska nám við erlendar sjúkrastofnanir. Á árlegum framvindumatsfundum (e. ARCP, Annual Review of Competency Progression) er lagt mat á framvindu síðasta árs og ákveðið hvernig hægt sé að ná klínískum námsmarkmiðum og þá hvar og hvernig. Á árlegum framvindumatsfundi verður lagt á frammistöðu sérnámslæknis, þekkingu hans/hennar, hæfni og getustig og um leið er nauðsynlegt að halda utan um almennan framgang sérnámsins og auðvelda umbætur.

Mat á framvindu og frammistöðu

Framvinduskrá gefur námslækni yfirsýn yfir þá fagþekkingu, færni og getu sem hann/hún þarf að tileinka sér og hvaða námsþættir það eru sem á eftir að ná tökum á. Sérnámslæknir fer yfir skrána ásamt sérnámshandleiðara sínum á reglubundnum fundum þeirra. Framvinduskráin er ásamt eftirfarandi þáttum lögð til grundvallar í mati á framgangi í árlegum matsviðtölum.

Klínískt próf

Árlega er haldið klínískt próf fyrir námslækna að vori, oftast í maí. Skiptist það í tvær stöðvar. Á hverri stöð er lagt fyrir sjúkratilfelli og spurt fyrir fram skilgreindra spurninga í tengslum við greiningu vanda og endurhæfingu. Að prófi loknu fá námslæknar bæði munnlega og skriflega endurgjöf.

Mat handleiðara og endurgjöf frá samstarfsfólki

Á hverju ári fylla handleiðarar út staðlað matsblað, þar sem umsögn er gefin um ákveðna mikilvæga þætti í klínískri vinnu og framkomu námslæknis. Mat þetta byggir á samtölum handleiðara við samstarfsaðila og klíníska handleiðara námslæknis.