Líknarmeðferð miðar að því að bæta lífsgæði sjúklinga með lífshættulega sjúkdóma sem og fjölskyldna þeirra. Meðferðin felur í sér að fyrirbyggja og draga úr líkamlegri, andlegri og félagslegri þjáningu með einstaklingsmiðaðri nálgun.

Innlögn á líknardeild

Innlögn er skipulögð eftir forgangi og reynt að taka á móti sjúklingi fyrri hluta dags.

• Við komu fer fram viðtal við lækni og hjúkrunarfræðing, þar sem farið er yfir aðstæður og skipulag dvalar.

• Lengd dvalar fer eftir ástæðu innlagnar, líðan og aðstæðum sjúklings.

Hvað þarf að taka með sér?

• Þægilegan fatnað og inniskó.

• Snyrtivörur (tannbursta, tannkrem, varasalva).

• Lyf og lyfjakort.

• Hjálpartæki sem notuð eru daglega (göngugrind, hjólastól o.fl.).

• Afþreyingu (bækur, hljóðbækur, tónlist o.fl.).

• Minni verðmæti eins og litlar myndir eða muni með tilfinningalegt gildi.

• Spítalinn ber ekki ábyrgð á peningum eða öðrum verðmætum eins og síma eða tölvu.

Aðstaða

12 einbýli í tveimur tengdum húsum. Á líknardeildinni er veitt læknis- og hjúkrunarþjónusta, sjúkraþjálfun, sálgæsla og annar stuðningur. Lögð er áhersla á heimilislegt umhverfi og að mæta þörfum sjúklinga og aðstandenda þeirra eins vel og unnt er.

Heimsóknir og gisting

• Aðstandendur geta dvalið hjá sjúklingi yfir daginn

• Möguleiki er á að einn aðstandandi gisti yfir nótt á bedda eða í hægindastól inni á stofu sjúklings.

• Mælt er með að ekki séu fleiri en tveir aðstandendur í einu yfir nótt.

Hafa í huga

• Lykt og umhverfi: Sjúklingar þola oft illa sterka lykt eins og af reykingum, ilmvötnum eða blómum (eins og liljum). Aðstandendur eru beðnir að hafa þetta í huga.

• Farsímar: Mælst er til að farsímar séu stilltir á hljóðlátt og að símtöl séu ekki tekin á almennum svæðum.

• Samskiptamiðlar: Sýna þarf sjúklingum, samsjúklingum, aðstandendum þeirra og starfsfólki þá tillitssemi að skrifa ekki um þá færslur á samskiptamiðlum né setja þar inn myndir.

Göngudeild

Læknar líknardeildar eru með göngudeild einn eftirmiðdag í viku á:

• líknardeild í Kópavogi, húsi 6b,

• dag- og göngudeild blóð- og krabbameinslækninga 11C á Landspítala Hringbraut.