Innritun

Þegar þú kemur á Dag- og göngudeild blóð- og krabbameinslækninga skráir þú þig inn með því að slá inn kennitöluna í innskráningarstand fyrir framan biðstofu á 11C.

• Á skjánum sérðu hvert þú átt að fara næst.

• Armband prentast út og þú tekur það með þér. Strikamerkið á armbandinu er notað við skráningu lífsmarka og lyfjagjafa.

• Móttökuritarar á 11C bóka tíma, svara fyrirspurnum og leiða mál áfram eftir þörfum. Í tengdum posa er greitt fyrir viðtöl og meðferð.

Hvert á ég að fara?

• Lyfjameðferð eingöngu: Farðu á 11B, láttu ritara vita og sestu síðan á biðstofu innst á ganginum.

• Læknisviðtal: Farðu á biðstofu 11C.

• Bæði læknisviðtal og lyfjameðferð: Mættu 20 mínútum fyrir viðtalið í mælingar hjá sjúkraliða (blóðþrýstingur, hiti, púls o.fl.).

Læknisviðtal

Viðtal hjá lækni tekur yfirleitt um 20 mínútur. Fyrsta viðtal er lengra. Gott er að hafa aðstandanda með, en hafðu samband við deildina ef fleiri en 1–2 koma með.

Láttu deildina vita tímanlega ef þú getur ekki mætt.

Móttaka

Við komu á 11B skaltu alltaf gefa þig fram við ritara sem skráir þig inn á deildina.

Aðstaða

• Á deildinni eru 20 meðferðarrými, bæði stólar og rúm.

• Setustofa og kaffiaðstaða eru innst á ganginum.

• Hægt er að fá kodda og teppi til að hafa það sem þægilegast.

• Vinsamlega virðið næði annarra sjúklinga.

Matur og drykkur

• Vatnsvél, kaffivél og safa er að finna á deildinni.

• Nesti má geyma í ísskáp á setustofu 11B.

• Ef meðferð tekur nokkra klukkutíma er gott að koma með nesti, en forðastu sterklyktandi mat.

Afþreying og gestir

• Þú mátt taka með lesefni, handavinnu eða tölvu.

• Gestanet spítalans er í boði.

• Farsíma má nota, en stilltu hann á hljóðlaust og taktu tillit til samferðafólks þegar þú talar í síma.

Krabbameinslyfjagjöf

Til eru margar tegundir krabbameinslyfja sem vinna á mismunandi hátt. Því getur reynst nauðsynlegt að gefa fleiri en eitt lyf í senn, en það fer eftir eðli sjúkdómsins hvernig samsetning lyfjameðferðar er. Algengast er að gefa lyfin í æð, en einnig sem töflur, inngjöf í vöðva, undir húð eða í vökvarýmið umhverfis mænu. Í sumum tilvikum er fleiri en ein leið notuð.

Það er einstaklingsbundið hversu oft og hve lengi lyfin eru gefin. Einnig er mismunandi hversu langur tími líður á milli lyfjagjafa. Hver lyfjagjöf getur staðið í nokkrar mínútur, klukkustundir eða nokkra daga í einu. Algengt er að gefa lyfin með 3-4 vikna millibili. Meðferðin er oftast gefin á 11B en stundum krefst hún innlagnar á legudeild.

Þú færð nánari upplýsingar um meðferðina þína, aukaverkanir og möguleg úrræði hjá þínum lækni og hjúkrunarfræðingi.

Hafðu strax samband ef vart verður eftirtalinna einkenna:

• Hiti hækkar

• Viðvarandi ógleði eða uppköst

• Óvenjumikill slappleiki og þreyta

• Hósti og uppgangur

• Særindi í munni og hálsi eða við þvaglát

• Marblettir, húðblæðingar, nefblæðingar eða blóð í þvagi/hægðum

• Niðurgangur

• Mikinn bjúg á höndum og fótum eða annars staðar á líkamanum

• Skyndilegir verkir

Hringdu í síma 543 6130 (11B)

• Mánudag, þriðjudag og föstudag milli kl 8-16

• Miðvikudag og fimmtudag kl 8 - 18

• Í síma 543-2000 utan dagvinnutíma (Bráðamóttakan Fossvogi)

Stuðningsmeðferð og mat á vanlíðan

Mat á vanlíðan

Regluleg skimun á líðan og einkennum er framkvæmd á deildinni. Þú ert beðin(n) um að fylla út matsblað þar sem þú metur vanlíðan þína á kvarðanum 0-10 og merkir við mögulegar ástæður fyrir vanlíðan. Með reglulegri skimun er hægt að greina vanlíðan, styrk hennar og mögulegar orsakir svo að hægt sé að veita þér viðeigandi aðstoð.

Stuðningsmeðferð

Stuðningsmeðferð er veitt í tengslum við sjúkdóma og aukaverkanir meðferðar. Stuðningsmeðferð getur falið í sér lyfjagjöf (t.d. ónæmisstyrkjandi lyf og beinþéttnilyf), vökvagjöf, blóðhlutagjöf og einkennameðferð.

Slökun

Boðið er upp á einstaklingsmiðaða slökunarmeðferð og þjálfun í núvitund fyrir krabbameinssjúklinga og aðstandendur þeirra á Landspítala. Meðferðin fer fram í Skógarhlíð 5 í hægindastól og varir í eina klukkustund. Sýnt hefur verið fram á að meðferðin getur bætt lífsgæði og hefur almennt góð áhrif á líkamlega og andlega heilsu. Meðferðin getur einnig dregið úr tíðni og styrk aukaverkana.

Tímapantanir og frekari upplýsingar er hægt að fá hjá ritara á deild 11C eða í síma 543 6130.