Eins og áður koma langflest sýni til rannsóknar frá spítölum en færri frá heilsugæslunni.

Inflúensa

Í viku 42 greindust 22 með inflúensu og eru það aðeins fleiri en greindust síðustu tvær vikur þar á undan. Flestir sem greindust í viku 42 eru 15 ára og eldri og flestir með inflúensutegund A(H3).

Nánari upplýsingar um inflúensu má finna á vef embættis landlæknis.

Árviss bólusetning gegn inflúensu er hafin á heilsugæslustöðvum. Hægt er að bóka tíma á mínum síðum á heilsuveru eða með því að hringja í sína heilsugæslustöð.

Sóttvarnalæknir mælist til að eftirtaldir áhættuhópar njóti forgangs við inflúensubólusetningar og eru þeir hópar sérstaklega hvattir til að þiggja bólusetningu:

• Allir einstaklingar 60 ára og eldri.

• Börn undir 5 ára aldri sem náð hafa 6 mánaða aldri við bólusetningu.

• Öll börn og fullorðnir sem þjást af langvinnum hjarta-, lungna-, nýrna- og lifrarsjúkdómum, sykursýki, offitu, illkynja sjúkdómum og öðrum ónæmisbælandi sjúkdómum.

• Barnshafandi.

• Heilbrigðisstarfsmenn sem annast einstaklinga í áhættuhópum sem taldir eru upp hér að ofan.

• Fólk í starfstengdri áhættu vegna hugsanlegs samsmits árlegrar inflúensu og fuglainflúensu. sbr. frétt í okt. 2023

RS-veirusýkingar

Eitt tilfelli RS-veiru (RSV) greindist í viku 42, barn í aldurshópnum 1–2 ára.

Einstofna mótefni gegn RSV (nirsevimab) fyrir yngstu börnin er komið í dreifingu til heilbrigðisstofnana. Nú í vetur býðst mótefnið börnum sem eru fædd 1. maí 2025 eða síðar auk barna 6–23 mánaða sem Barnaspítali Hringsins hefði að öðrum kosti boðað í mánaðarlegar lyfjagjafir með palivizumab yfir RSV tímabilið. Börn sem fæðast í vetur, um það bil fram til 31. mars 2026 munu geta fengið mótefni gegn RSV fljótlega eftir fæðingu.

Nánari upplýsingar um RSV veirusýkingar og bólusetningar gegn RSV má finna á vef embættis landlæknis.

COVID-19

Tilfellum COVID-19 hefur fækkað eftir sumarið og fjöldi haldist nokkuð stöðugur í haust. Í viku 42 greindust sjö einstaklingar, flestir í aldursflokknum 65 ára og eldri.

Aðrar öndunarfæraveirur

Áfram greinist mest af rhinoveiru (kvefi) af öndunarfæraveirum á sýkla- og veirufræðideild Landspítala. Undanfarinn mánuð hefur vikulegur fjöldi rhinoveirugreininga verið á bilinu 30–40 og greindust 25 með rhinoveiru í viku 42.

Innlagnir á Landspítala

Í viku 42 lá einn einstaklingur á Landspítala með COVID-19, á aldrinum 15–64 ára. Fimm einstaklingar lágu inni með inflúensu, þar af fjórir 65 ára og eldri og einn 15–64 ára. Einn lá inni með RSV, á aldrinum 1–2 ára.

Staðan í Evrópu

• Í ríkjum ESB/EES fer tíðni COVID-19 (SARS-CoV-2) minnkandi eins og er og sjúkrahúsinnlagnir eru fáar.

• Greiningar RS-veirusýkinga og inflúensu eru í lágmarki.

• Fjöldi einstaklinga sem leita til heilsugæslu með öndunarfæraeinkenni er enn lár, en fjölgar nú í flestum löndum eins og búast má við á þessum árstíma. Mesta aukning er meðal barna undir 15 ára aldri.

Sjá frekari upplýsingar á vef Sóttvarnastofnunar Evrópu.

Sóttvarnalæknir minnir fólk á að:

• Þiggja inflúensubólusetningu ef í forgangs- eða áhættuhópi.

• Þiggja RSV mótefni fyrir þau ungbörn sem það á við.

• Vera heima á meðan þú hefur einkenni og þangað til vel á batavegi og hitalaus í sólarhring.

• Sýna sérstaka varúð í nánd við viðkvæma einstaklinga ef þú ert með einkenni sýkingar.

• Lágmarka umgengni við aðra sem eru með einkenni sýkingar.

• Hylja munn og nef við hósta og hnerra.

• Þvo hendur oft og vel.

• Þrífa sameiginlega snertifleti og lofta út í sameiginlegum rýmum eins og hægt er.

• Íhuga notkun andlitsgrímu eftir aðstæðum.

Sóttvarnalæknir