Nánari upplýsingar fyrir blóðgjafa:

• Allir fara í heilsufarsviðtal og blóðþrýstingur og púls er mældur. Mikilvægt er að upplýsa starfsfólk Blóðbankans um t.d lyfjanotkun, veikindi, sjúkdóm, aðgerð og ferðalög. Sjá nánar: Hvað hefur áhrif á blóðgjöf

• Blóðprufur sem teknar eru í Blóðbankanum eru til að kanna: Blóðflokk, blóðhag, m.t.t. rauðra og hvítra blóðkorna, blóðflagna og járnbirgða, rauðkornamótefnis og smitskims (HIV, sýfílis, lifrabólga B og C).

• Mikilvægt er að vera við góða heilsu og vera búinn að borða og drekka vel 1 - 2 klst fyrir blóðgjöf.

• Ekki er ráðlagt að fara í líkamsrækt eða sund sama dag og gefið er blóð. Vökvatapið sem verður við líkamsrækt / sund er of mikið álag fyrir líkamann, ofan á vökvatapið sem fylgir blóðgjöfinni.

• Blóðgjöfin sjálf tekur 5 - 8 mínútur og teknir eru 455 millilítrar og blóðprufur að auki, úr upphandlegg. Heimsóknin í heild tekur 30-40 mínútur.

• Gjafar sem eru ekki búnir að gefa blóð í meira en 5 ár eða hafa orðið barnshafandi / fengið blóð, þurfa að fara aftur í blóðprufu / nýskráningu.

• Ef stundað er áhættustarf / áhættuáhugamál er ráðlagt að fresta slíku í um 12 klukkustundir eftir blóðgjöf. Undir þetta falla t.d. flugáhafnir, flugumferðarstjórar, kafarar og atvinnubílstjórar.

• Einstaklingur sem ekki er fæddur / uppalinn á Íslandi má verða blóðgjafi 3 mánuðum eftir flutning til landsins ef viðkomandi kemur frá: Ástralíu, Bandaríkjunum, Evrópu, Kanada eða Nýja-Sjálandi. Einstaklingar frá öðrum löndum geta gefið blóð ef minnst 6 mánuðir hafa liðið frá flutningi til landsins og reglur varðandi ferðalög blóðgjafa eru ekki fyrirstaða.

• Virkur blóðgjafi sem er orðinn 65 ára eða eldri getur haldið áfram að gefa blóð eða blóðhluta, að því tilskildu að hann sé við góða heilsu og hafi gefið blóð á síðustu 5 árum. Blóðgjafi þarf að svara viðbótar spurningarlista einu sinni á ári.

• Gjafi sem verður 70 ára má gefa fram að 71 afmælisdegi.

• Kona / transkona má gefa blóð á 4 mánaða fresti ef viðmiðunarmörkum fyrir blóðgildi er náð.

• Karlmaður / transkarl má gefa blóð á 3 mánaða fresti ef viðmiðunarmörkum fyrir blóðgildi er náð.
  
  Þú getur hætt við að gefa blóð hvenær sem er í ferlinu án þess að gefa ástæðu.
  Starfsfólk Blóðbankans er bundið þagnarskyldu og farið er með allar upplýsingar sem trúnaðarmál.
  

Eftir blóðgjöf:

• Hafa umbúðir á stungustað í 4-6 klukkustundir til að koma í veg fyrir sýkingu.

• Ráðlagt er að fá sér hressingu í kaffistofunni að blóðgjöf lokinni, drekka og borða vel sama dag og blóð er gefið.

• Hlífa handlegg fyrstu klukkutímana, t.d. ekki lyfta þungu. Það minnkar líkur á mari eða blæðingu frá stungustað.

• Taka því rólega eins og hægt er. Ekki er mælt með t.d. erfiðri æfingu / vinnu, sundi, gufu, fjallgöngu.

• Ef upp koma vandamál eða aukaverkanir eftir blóðgjöfina skal hafa samband við Blóðbankann.

• Ef þú veikist (hiti. hósti, uppköst, niðurgangur) á næstu 14 dögum eftir blóðgjöf skal hafa samband við Blóðbankann.