Lífsýni

Þjónusturannsókn er rannsókn sem er framkvæmd vegna heilbrigðisþjónustu við einstakling. Þjónusturannsókn er framkvæmd á lífsýni úr einstaklingi, t.d. á blóði, þvagi eða vef og nýtist við greiningu sjúkdóma og meðferð þeirra.

• Heimilt er að safna lífsýnum vegna þjónusturannsókna og vista þau í lífsýnasafni þjónustusýna til frekari nota, enda sé þess getið í almennum upplýsingum frá heilbrigðisstarfsmanni eða heilbrigðisstofnun.

• Ábyrgðarmaður þjónustulífsýnasafns getur veitt skilgreindan aðgang að lífsýnum sem vistuð eru í lífsýnasafni þjónustusýna til frekari greiningar sjúkdóma. Jafnframt má veita aðgang að sýnum vegna gæðaeftirlits, til aðferðaþróunar eða til kennslu, en við slíka notkun eru sýnin afhent ópersónugreinanleg.

• Einnig má veita aðgang að þjónustulífsýnum vegna vísindarannsókna sem hafa hlotið leyfi vísindasiðanefndar eða siðanefndar heilbrigðisrannsókna. Þjónustulífsýni sem nota á til vísindarannsókna eru afhent án persónuauðkenna, nema í undantekningartilfellum, en þá þarf leyfi Persónuverndar.

• Loks getur safnstjórn lífsýnasafns, með heimild Persónuverndar, heimilað notkun lífsýna í öðrum tilgangi, enda mæli brýnir hagsmunir með því.