Niðurlag

Ritunarrammanum er ætlað að aðstoða kennara og nemendur að öðlast yfirsýn yfir þá lykilþætti sem leggja grunninn að góðri ritunarfærni. Honum er einnig ætlað að veita leiðsögn í ritunarkennslu og ritunarnámi og aðstoða við mat á ritun í anda leiðsagnarnáms.

Efnisþættir góðrar ritunarfærni eru margir. Þá þarf að flétta þannig saman að úr verði ein heild. Því getur kennsla og nám í ritun verið flókið viðfangsefni sem þarf mjög gott svigrúm í kennslu, ekki aðeins í námsgreininni íslensku heldur í öllum bóklegum greinum. Nemendur þurfa að fá mörg tækifæri til að þjálfa ritun í margvíslegum tilgangi, læra inn á einkenni textategunda, skrifa texta á fjölbreyttu formi og æfa sig að skrifa skemmtilegan og áhugaverðan texta sem fangar athygli lesandans.

Fyrsta skrefið í notkun Ritunarrammans er kynna sér efni þessarar handbókar vel áður en ramminn er tekinn í notkun. Lesturinn kann að virðast tímafrekur í fyrstu og ný hugtök mörg en þau lærast og eru mikilvægt innlegg í faglega ritunarkennslu. Því eru notendur Ritunarrammans hvattir til að hafa handbókina við höndina og tileinka sér efni hennar smám saman. Við það eykst færnin í notkun rammans.