Geislun vegna myndgreiningarrannsókna

Almennt

Geislaálag er stærð sem lýsir líffræðilegum áhrifum geislunar á fólk, einkum aukningu á áhættu á krabbameini. Geislaálag er einungis gagnleg stærð þegar um lága geislaskammta er að ræða.

Geislaálag er mælt í einingu sem kölluð er sívert, skammstafað Sv. Til þess að meta geislaálag, þá þarf fyrst að mæla eða áætla geislaskammtinn, eða orkuna sem gleypist í efni per massaeiningu (með eininguna Gy=J/kg). Áætlað geislaálag í einingunni Sv fæst svo með því að taka tillit til (margfalda með viðeigandi stuðli) hver hæfni geislunarinnar er til að valda skemmdum á frumum og vef í þeim líkamshlutum sem urðu fyrir geisluninni.

Geislaálag fer eftir magni geislunar, eðli geislunar og því líffæri sem geislunin fellur á. Eðli geislunar vísar í hvort geislunin sé til dæmis rafsegulbylgja (gammageislun eða röntgengeislun), agnageislun (t.d. rafeindageislun eða alfageislun), eða nifteindageislun.

Áhrif á heilsu

Mismunandi líffæri eru misviðkvæm fyrir áhrifum geislunarinnar. Þau líffæri þar sem frumuskipting er tíð eru almennt viðkvæmari en önnur.