Umsóknir í Lýðheilsusjóð 2024

Hlutverk Lýðheilsusjóðs er að styrkja lýðheilsustarf sem samræmist markmiðum laga um landlækni og lýðheilsu, í þeim tilgangi að stuðla að heilsueflingu og forvörnum. Styrkir eru veittir til verkefna og afmarkaðra hagnýtra rannsókna.

Áherslur við styrkveitingu fyrir árið 2024 verða eftirfarandi:

• Aðgerðir sem miða að því að efla geðheilsu

• Aðgerðir sem miða að því að efla félagsfærni

• Aðgerðir sem miða að heilbrigðu mataræði, svefni og hreyfingu

• Áfengis, vímu- og tóbaksvarnir

• Verkefni sem tengjast kynheilbrigði

• Verkefni sem beinast að minnihlutahópum til að stuðla að jöfnuði til heilsu

• Aðgerðir sem stuðla að jafnvægi þéttbýlis og dreifbýlis

Við úthlutun verður tekið mið af eftirfarandi stefnum:

• Lýðheilsustefna og aðgerðir sem stuðla að heilsueflandi samfélagi

• Þingsályktun um lýðheilsustefnu til ársins 2030

• Stefna í áfengis- og vímuvörnum til 2020

• Stefna í geðheilbrigðismálum til 2030

• Stjórnarsáttmála um bætta lýðheilsu, aukna velsæld og jafnt aðgengi

Verkefni sem uppfylla eftirtalin skilyrði hafa forgang:

• Verkefni sem unnin eru í víðtæku samstarfi hagsmunaaðila í samfélaginu

• Verkefni með eigin fjármögnun og/eða annað mótframlag

• Verkefni sem ekki eru unnin eingöngu af stofnunum á föstum fjárlögum

Verkefnin eiga að byggja á faglegum grunni og hafa raunhæf og skýr markmið.
Gera þarf grein fyrir því hvernig árangur verkefnis verður metinn og skal skila framvinduskýrslu að verkefni loknu.

Umsækjendur eru hvattir til þess að sækja tímanlega um til þess að minnka álag á umsóknarkerfið síðustu dagana áður en umsóknarfresti lýkur. Þá er einnig gott að gefa sér nægan tíma til þess að ganga frá umsókn þannig að allar upplýsingar og fylgiskjöl séu til staðar.