Flytja persónuupplýsingar

Flutningsréttur

Einstaklingar eiga rétt á að fá persónuupplýsingar, sem þeir hafa afhent ábyrgðaraðila, á skipulögðu, almennu og tölvulesanlegu sniði, til að afhenda öðrum ábyrgðaraðila án hindrunar.

Slíkt gæti til dæmis átt við þegar upplýsingar hafa verið skráðar í prófil einstaklings á samfélagsmiðli og hann vill flytja þær til annars slíks miðils.

Flutningsréttur á við

Flutningur persónuuupplýsinga á við þegar:

• vinnsla upplýsinganna byggist á samþykki viðkomandi einstaklings eða samningi.

• vinnslan er sjálfvirk.

• flutningur upplýsinganna er tæknilega framkvæmanlegur.

Flutningsréttur eigin gagna hefur ekki áhrif á réttinn til eyðingar (réttinn til að gleymast). Rétturinn til að flytja eigin gögn skal ekki skerða réttindi og frelsi annarra.

Gögn sem flutningsréttur á við

Flutningsréttur á við um gögn sem þú hefur gefið eða skrifað, eins og nafn, netfang, notendanafn og lykilorð. Einnig um þær upplýsingar sem safnað hefur verið um notkun þína, eins og:

• hvaða tæki eða þjónustu þú notar

• vefnotkunar- og leitarsögu

• staðsetningar- og ferðagögn

• upplýsingar um þig sem skrást við notkun stafræns búnaðar sem þú ert með á þér líkt og heilsuúrum

• aðrar hráar og óunnar upplýsingar

Flutningsrétturinn gildir ekki um afleidd gögn

Afleidd gögn sem ábyrgðaraðili gæti hafa útbúið á grundvelli þeirra upplýsinga sem stafa frá einstaklingnum sjálfum. Þetta geta verið gögn eins og:

• skýrslur um lánshæfi, sem skylt er að gera á grundvelli löggjafar um neytendalán, og

• áhættumat sem áskilið er í löggjöf um aðgerðir gegn peningaþvætti.

Ef afleidd gögn innihalda persónuupplýsingar, falla þær undir aðgangsrétt.