Ertu að afhenda gögn?

Sjúkraskrár eru safn sjúkraskrárupplýsinga um sjúkling sem unnar eru í tengslum við meðferð hans í heilbrigðisþjónustu. Með sjúkaskrárupplýsingum er átt við lýsingu eða túlkun í rituðu máli, myndir, línurit og mynd- og hljóðupptökur sem innihalda upplýsingar er varða heilsufar sjúklings og meðferð hans í heilbrigðisþjónustu ásamt öðrum nauðsynlegum persónuupplýsingum.

Sjúkraskrár og sjúkraskrárupplýsingar eru afhendingarskyld gögn og á að afhenda Þjóðskjalasafni til varðveislu.

Um skilgreiningu sjúkraskráa er fjallað í lögum um sjúkraskrár nr. 55/2009.

Samkvæmt lögum ber að varðveita sjúkraskrár. Ef rekstri heilbrigðisþjónustu er hætt ber viðkomandi aðila að afhenda landlækni öll sjúkragögn sem eru í þeirra vörslu. Landlæknir getur svo tekið ákvörðun með samþykki sjúklings eða umboðsmanns að flytja gögn annað, svo sem yfir í:

• Skráarkerfi annarrar heilbrigðisstofnunar

• Starfsstöð heilbrigðisstarfsmanna

• Sameiginlegt sjúkraskrárkerfi

Um varðveislu sjúkraskráa er fjallað í lögum um sjúkraskrár nr. 55/2009.

Til að afhenda sjúkraskrár á pappír til Þjóðskjalasafns þarf að haga frágangi og skráningu þeirra á réttan hátt. Þetta þarf að gera:

• Senda afhendingarbeiðni til Þjóðskjalasafn, sjá afhendingarbeiðni hér.

• Ganga frá sjúkraskránum í samræmi við reglur og leiðbeiningar safnsins um frágang pappírsskjala, sjá leiðbeiningar hér.

• Búa til rafræna geymsluskrá yfir þær sjúkraskrár sem afhenda skal, sjá sniðmát fyrir geymsluskrá fyrir skráningu sjúkraskráa hér.

Fyrirspurnir er ávallt hægt að senda á netfangið skjalavarsla@skjalasafn.is.

Afhending fer fram þegar geymsluskrá og önnur fylgiskjöl hafa verið yfirfarin af sérfræðingum Þjóðskjalasafns. Afhendingartími er gefinn út í samráði við afhendingaraðila.

Sjúkraskrár á rafrænu formi þarf að tilkynna sem rafrænt gagnasafn til Þjóðskjalasafns skv. reglum þar að lútandi. Sjá tilkynningu um rafrænt gagnasafn hér.

Þegar safnið hefur lokið úrvinnslu á tilkynningu gefur það út úrskurð um rafræn skil. Afhending fer fram skv. þeim úrskurði. Sjá nánar um afhendingu rafrænna gagna hér.

Það er með öllu óheimilt að farga sjúkraskrám nema með heimild skv. 24. gr. laga um opinber skjalasöfn nr. 77/2014.