Endurmenntun atvinnubílstjóra

Atvinnubílstjórar sem aka bílum í flokkum C, C1, D og D1 þurfa að að ljúka endurmenntunarnámskeiðum á síðustu fimm árum fyrir endurnýjun til að fá tákntöluna 95 í skírteinið sitt. Mikil ábyrgð hvílir á bílstjórum stórra ökutækja en markmið námskeiðanna er að efla atvinnubílstjóra sem fagstétt og auka umferðaröryggi. 95 tákntalan gerir bílstjórum kleift að starfa við akstur innan EES svæðisins.

Hverjir þurfa endurmenntun?

Allir bílstjórar með réttindi í flokkum C, C1, D og D1 sem vilja viðhalda atvinnuréttindum sínum. Hér geta bílstjórarar skoðað sína stöðu gagnvart námskeiðum. Ef engin námskeið birtast, eru engin námskeið í gildi eða hafa ekki verið skráð af námskeiðshöldurum.

Hverjir þurfa ekki endurmenntun?

• Þeir sem nýta réttindi sín eingöngu til aksturs í eigin þágu.

• Leigubílstjórar (þeir sem eingöngu aka bílum í B-flokki).

• Bílstjórar sem aka sjúkrabílum eða björgunarsveitarbílum.

Námskeiðin

Námskeiðin eru fimm talsins, samtals 35 klukkustundir. Námskeiðin eru kennd hjá námskeiðshöldurum sem Samgöngustofa viðurkennir.

Kjarni (öll taka)

• vistakstur

• lög og reglur

• umferðaröryggi - bíltækni

Valkjarni (hægt að velja annað eða taka bæði):

• farþegaflutningar

• vöruflutningar

Eitt valnámskeið (ef ekki eru tekin bæði í valkjarna):

• skyndihjálp

• fagmennska

• annað sem er í boði hjá námskeiðshaldara

Nánari upplýsingar um námskeiðin má sjá í námskrá endurmenntunar atvinnubílstjóra.

Kostnaður

Kostnaður við hvert námskeið getur verið misjafn milli námskeiðshaldara. Einnig þarf að greiða fyrir læknisvottorð og nýtt skírteini við endurnýjun þess. Bent er á að flest stéttarfélaganna niðurgreiða kostnað vegna námsgjalda.

Endurnýjun skírteinis

Mikilvægt er að fara til sýslumanns og endurnýja skírteinið eftir að námskeiðunum er lokið. Það gerist ekki sjálfkrafa. Við endurnýjun þarf ávallt að skila læknisvottorði.

Séu liðin meira en tvö ár frá því að skírteinið rann út, þarf að fara í próf í aksturshæfni hjá Frumherja.