Gildandi stefna

Landsskipulagsstefna felur í sér samræmda stefnu ríkisins í skipulagsmálum fyrir landið í heild og tekur til landsins alls og haf- og strandsvæða.

Þingsályktun um landsskipulagsstefnu 2024-2038 var samþykkt á Alþingi í maí 2024 og gefin út á aðgengilegra formi á vormánuðum 2025.

Í Landsskipulagsstefnu 2024-2038 eru þrjú markmið lögð til grundvallar sem byggja á sjálfbærri þróun: um vernd umhverfis og náttúru, velsæld samfélags og samkeppnishæft atvinnulíf.

Undir hverju markmiði eru settar fram áherslur ásamt tilmælum um framfylgd þeirra fyrir skipulagsgerð á miðhálendi (M), í dreifbýli (D), í þéttbýli (Þ) og á haf- og strandsvæðum (H). Aðgerðaáætlun sem fylgir stefnunni, felur jafnframt í sér tiltekin verkefni til að hrinda markmiðum hennar í framkvæmd.

Í útgáfu stefnunnar er áherslum ásamt tilmælum um framfylgd stefnunnar skipt upp eftir því hvar þau eiga við, samkvæmt ofangreindri landfræðilegri skiptingu. Öllum þeim áherslum og tilmælum sem eiga við fyrir skipulagsgerð á tilteknu svæði eru þannig gerð skil í viðkomandi kafla.