Þegar lögreglan rannsakar mál

Þegar upplýsingar hafa komið fram sem lögregla metur að gefi tilefni til að hefja rannsókn fara oft fram:

• Skýrslutökur af sakborningi og vitnum, þar á meðal brotaþola.

• Öflun annarra nauðsynlegra sönnunargagna.

Við rannsókn ber lögreglu að vinna að því að hið sanna og rétta komi í ljós. Lögreglan þarf að gæta jafnt að því sem gæti leitt til sýknu og til sektar.

Rannsókn lýkur

Að lokinni rannsókn er mál sent ákæranda til meðferðar. Þá gerist eitt af eftirfarandi:

• Málið er sent aftur til rannsóknar.

• Málið er fellt niður.

• Málinu lýkur án ákæru.

• Ákæra er gefin út.

Rannsókn hætt

Lögregla getur hætt rannsókn ef ekki þykir grundvöllur til að halda henni áfram. Ástæður geta verið:

• Í ljós kemur að kæra hefur ekki verið á rökum reist.

• Brot er smávægilegt. Það er hægt að sjá fyrir að rannsókn muni hafa í för með sér óeðlilega mikla fyrirhöfn og kostnað.

Ekki er skylt að gefa þeim sem hlut eiga að máli kost á að tjá sig áður en slík ákvörðun er tekin. Ákveði lögregla að hætta rannsókn málsins ber henni að tilkynna þeim sem hagsmuna hafa að gæta um ákvörðunina. Unnt er að óska eftir rökstuðningi lögreglu fyrir þeirri ákvörðun.

Ákvörðunin kærð

Ákvörðun lögreglu um að hætta rannsókn má kæra til ríkissaksóknara og er kærufrestur einn mánuður. Ríkissaksóknara ber að taka afstöðu til kærunnar innan þriggja mánaða frá því að hún berst embættinu.