I. KAFLI Almennt um stuðning fyrir fatlað fólk.

1. gr. Lagagrundvöllur.

Í reglum þessum er kveðið á um útfærslu á þjónustu sem sveitarfélögum er skylt að veita, sbr. 25.-27. gr. og XI. kafla laga um félagsþjónustu sveitarfélaga, nr. 40/1991 og 1.-3. tl. og 5. tl. 8. gr. laga um þjónustu við fatlað fólk með langvarandi stuðningsþarfir, nr. 38/2018. Við framkvæmd reglna þessara skal framfylgja þeim alþjóðlegu skuldbindingum sem Ísland hefur undirgengist og þá sérstaklega samning Sameinuðu þjóðanna um réttindi fatlaðs fólks.

Í reglum þessum er orðið stoðþjónusta notað yfir stuðningsþjónustu samkvæmt lögum um félagsþjónustu, nr. 40/1991 og stoðþjónustu samkvæmt lögum um þjónustu við fatlað fólk með langvarandi stuðningsþarfir, nr. 38/2018. Jafnframt er orðið stuðningur notað yfir þá þjónustu sem fellur undir framangreind ákvæði.

2. gr. Markmið.

Markmið stoðþjónustu samkvæmt reglum þessum er að veita fötluðu fólki stuðning til að koma til móts við stuðningsþarfir þess og skapa því skilyrði til sjálfstæðs lífs á eigin forsendum, sbr. 1. og 8. gr. laga um þjónustu við fatlað fólk með langvarandi stuðningsþarfir, nr. 38/2018 og 19. gr. samnings Sameinuðu þjóðanna um réttindi fatlaðs fólks. Markmiðið er að styðja einstaklinga sem þurfa, aðstæðna sinna vegna, á stuðningi að halda við heimilishald og athafnir daglegs lífs til þess að geta búið heima, verið sjálfstæðir og félagslega virkir. Stuðningur byggist fyrst og fremst á einstaklingsmarkmiðum hvers og eins sem uppfylla þarf til þess að hann geti lifað sjálfstæðu lífi.

3. gr. Stuðningur.

Stuðningur samkvæmt reglum þessum er veittur á grundvelli 8. og 12. gr. laga um þjónustu við fatlað fólk með langvarandi stuðningsþarfir, nr. 38/2018 og 1. mgr. 26. gr. laga um félagsþjónustu sveitarfélaga, nr. 40/1991.

Með stuðningi í reglum þessum er átt við eftirfarandi þjónustuþætti:

1. Sérhæfð ráðgjöf felst í að veita fötluðu fólki og aðstandendum þeirra félagslega ráðgjöf og stuðning, t.d. varðandi ýmis réttindamál, velferðartækni og til sjálfstæðrar búsetu. Jafnframt felst ráðgjöfin í samræmingu ýmissa þátta, s.s. skóla, heimilis, tómstunda og vinnu, með því markmiði að stuðningur nýtist sem best. Sérhæfð ráðgjöf hefur það að markmiði að aðstoða fatlað fólk til sjálfshjálpar en getur einnig falist í ráðgjöf til starfsmanna stoðþjónustu.
2. Hópstuðningur er stuðningur sem veittur er í hópi, þegar við á, að höfðu samráði við viðkomandi einstakling.
3. Stoðþjónusta er margháttaður stuðningur við athafnir daglegs lífs sem byggist meðal annars á einstaklingsbundnum þörfum fólks á grundvelli óska þess.
4. Stuðningur við athafnir daglegs lífs, svo sem við að sinna persónulegu hreinlæti, klæðast/hátta, eftirlit með næringu og lyfjainntöku. Auk þess er stuðningur veittur með skjáheimsóknum.
5. Stuðningur við heimilishald er stuðningur við þau verk sem þarf að leysa af hendi á heimili einstaklings til að auðvelda honum heimilishald. Auk þess er um að ræða stuðning við að nýta velferðartækni sem auðveldar notanda heimilishaldið og starfsfólki að veita stuðninginn.
6. Félagslegur stuðningur miðar einkum að því að rjúfa félagslega einangrun og hefur það markmið að styðja og hvetja til þátttöku í félags- og tómstundastarfi sem og að styðja við atvinnuþátttöku, nám o.fl. Slíkur stuðningur er ekki veittur í þeim tilvikum þegar aðrir aðilar bera ábyrgð á að veita stuðning.
7. Heimsending matar fyrir þá sem ekki geta annast matseld sjálfir eða annast matseld með stuðningi og hafa ekki tök á að borða í félagsmiðstöðvum velferðarsviðs.
8. Þjálfun endurhæfingarteymis í heimahúsi er tímabundin og byggir á þeim markmiðum sem viðkomandi setur sér og eru honum mikilvæg til að ráða við daglegt líf.
9. Aðstoð viðbragðsteymis er veitt á heimilum þar sem verulegrar tiltektar er þörf áður en almenn stuðningsþjónusta getur hafist.

Leitast er við að koma til móts við einstaklingsbundnar þarfir hvers og eins. Þjónusta skal vera heildstæð, samfelld og samþætt. Viðkomandi einstaklingur skal vera á heimilinu þegar stuðningur er veittur og taka þátt í þeim verkum sem þarf að leysa af hendi, eftir því sem kostur er. Ef aðstæður eru með þeim hætti að einstaklingur getur ekki eða kýs að vera ekki til staðar getur stuðningur við heimilishald farið fram gegn skriflegu samþykki viðkomandi.

Stuðningur samkvæmt reglum þessum er veittur bæði innan heimilis og utan.

Við veitingu stuðnings skal leitast við að nýta stafrænar og tæknilegar lausnir. Skal það háð samráði við viðkomandi einstakling.

II. KAFLI Skilyrði fyrir stoðþjónustu.

4. gr. Skilyrði fyrir því að umsókn um stoðþjónustu verði samþykkt.

Umsækjandi skal uppfylla öll eftirtalin skilyrði til að fá stuðning samkvæmt reglum þessum.

1. Umsækjandi skal vera orðinn 18 ára. Ef einstaklingur er yngri en 18 ára vísast til reglna Reykjavíkurborgar um stuðning við börn og fjölskyldur þeirra.
2. Umsækjandi er fatlaður í skilningi laga, sbr. 1. og 2. tl. 2. gr. laga um þjónustu við fatlað fólk með langvarandi stuðningsþarfir, nr. 38/2018.
3. Umsækjandi skal búa í sjálfstæðri búsetu. Einstaklingar sem búa á hjúkrunarheimili eða stofnun þar sem greidd eru daggjöld frá ríkinu eiga ekki rétt á stuðningi samkvæmt reglum þessum.
4. Umsækjandi skal vera metinn í þörf fyrir stuðning samkvæmt matsviðmiðum á fylgiskjali 1.

Umsækjanda skal tilkynnt um hvort umsókn hans hafi verið samþykkt og hvernig umsókn hans hafi verið metin samkvæmt d-lið 1. mgr. 4. gr. reglna þessara.

Einstaklingur sem náð hefur 67 ára aldri og sækir um stuðning samkvæmt reglum þessum getur átt rétt á þjónustu ef sýnt þykir að fötlun hans stafi ekki af aldurstengdri skerðingu.

Fatlað fólk sem er með lögheimili utan Reykjavíkur getur sótt um stuðning samkvæmt reglum þessum en skilyrði er að umsækjandi hafi lögheimili í Reykjavík þegar stuðningur hefst.

III. KAFLI Umsóknir og mat.

5. gr. Aðgengi að stuðningi.

Óski fatlaður einstaklingur eftir ráðgjöf og stuðningi skal panta viðtal við ráðgjafa á þjónustumiðstöð.

Leiði viðtöl í ljós að þörf sé á frekari stuðningi samkvæmt reglum þessum skal undirrita umsókn um stuðning. Í kjölfar þess skal lagt mat á stuðningsþörf umsækjanda í samvinnu við hann samkvæmt matsviðmiðum á fylgiskjali 1.

Með umsókn skulu eftirfarandi gögn liggja fyrir, eftir því sem við á, auk upplýsts sjálfsmats umsækjanda:

1. Örorkumat eða umönnunarmat.
2. Viðurkenndar og samræmdar matsaðferðir, s.s. SIS og RAI.[1]
3. Staðfesting á fötlun, s.s. fullnægjandi læknisvottorð eða staðfesting frá Greiningarstöð ríkisins.

[1] Support Intensity Scale (SIS) og Inter Resident Assessment Instrument-Home Care (RAI).

6. gr. Mat á stuðningsþörf.

Mat á stuðningsþörf er gert í samvinnu við umsækjanda og tekur mið af þörfum hans fyrir þjónustu eða aðstoð í daglegu lífi vegna fötlunar til að geta lifað í samfélaginu til jafns við aðra og þannig stuðlað að samfélagslegri og félagslegri þátttöku. Mat á stuðningsþörf fer fram á heimili umsækjanda, á þjónustumiðstöð eða á öðrum vettvangi í samráði við umsækjanda. Stuðningsþarfir eru einstaklingsbundnar en geta einnig tekið mið af þörfum fjölskyldu umsækjanda þar með talið vegna umönnunar og uppeldis barna þeirra.

Við mat á stuðningsþörf er horft til heildaraðstæðna umsækjanda og skipulags daglegs lífs. Markmiðið er að styðja umsækjanda til að leita sem bestu mögulegu lausna við heimilishald og athafnir daglegs lífs til þess að geta búið heima, bjargað sér sjálfur og verið félagslega virkur. Mat á stuðningsþörf nær einnig til möguleika á að nýta tækni, hjálpartæki og/eða þess að breyta verklagi í athöfnum daglegs lífs með tilliti til nýrrar tækni kjósi umsækjandi það. Stuðningur byggist fyrst og fremst á þeim markmiðum sem umsækjandi setur sér í daglegu lífi. Við forgangsröðun umsókna skal líta til flokkunar á fylgiskjali 2 með reglum þessum.

Við mat á stuðningsþörf og við forgangsröðun umsókna skal litið til eftirfarandi atriða þegar metið er hversu brýn þörf er fyrir stuðning:

1. Þarfa umsækjanda fyrir stuðning.
2. Færni/getu og styrkleika.
3. Félagslegra aðstæðna og félagslegs tengslanets.
4. Samfélagsþátttöku, valdeflingar og virkni.
5. Hvaða afleiðingar töf á veitingu stuðnings hafi fyrir umsækjanda.
6. Annars veitts stuðnings.

Vísað er til matsviðmiða á fylgiskjali 1 með reglum þessum.

Þegar mat á stuðningsþörf hefur verið framkvæmt er umsóknin tekin fyrir á fundi matsteymis og á grundvelli mats er tekin ákvörðun um innihald, umfang og eðli þess stuðnings sem veittur er og útfærður í stuðningsáætlun í samvinnu við umsækjanda. Umsækjandi fær skriflegt svar þar sem fram kemur hvernig umsókn hans hefur verið afgreidd.

Þegar um er að ræða alvarleg veikindi skal stuðningur ætíð metinn, skipulagður og samhæfður með fagaðilum heimahjúkrunar í samræmi við þarfir umsækjanda.

Sé niðurstaða mats á stuðningsþörf sú að aðstæður umsækjanda séu með þeim hætti að ekki sé þörf á stuðningi samkvæmt reglum þessum ber að synja umsókninni og skal málsmeðferð vera í samræmi við IV. kafla reglna þessara.

7. gr. Stuðningsáætlun.

Áður en stuðningur hefst skal gert samkomulag um stuðning, þ.e. stuðningsáætlun, áætlun um meðferð máls, sbr. 23. gr. barnaverndarlaga, nr. 80/2002 og/eða einstaklingsbundin þjónustuáætlun, sbr. 8. tl. 2. gr. laga um um þjónustu við fatlað fólk með langvarandi stuðningsþarfir, nr. 38/2018, eftir því sem við á hverju sinni og vera í eðlilegu samhengi við aðra aðstoð. Stuðningurinn skal ætíð byggja á skýrum markmiðum og koma skal fram hvernig árangur verði metinn reglulega.

Í stuðningsáætlun skal eftirfarandi koma fram:

1. Tilgangur með stuðningi.
2. Hvernig settum markmiðum með þjónustunni skuli náð.
3. Gildistími samþykktrar umsóknar.
4. Hvers konar stuðningur verði veittur.
5. Umfang stuðnings.
6. Verkefni og vinnutilhögun.
7. Upphæð útlagðs kostnaðar þegar stuðningur er veittur. Miðað skal við upphæð á mánaðargrunni, sbr. viðmið velferðarsviðs Reykjavíkurborgar.

Í stuðningsáætlun skal einnig kveða á um fyrirkomulag stuðnings vegna meðferðar einkafjármuna og lyklanotkunar umsækjanda.

Stuðningsáætlun skal unnin í samvinnu við umsækjanda. Komist umsækjandi og ráðgjafi ekki að samkomulagi um fyrirkomulag stuðnings skal óska eftir sérstöku mati af hálfu þverfaglegs teymis innan þjónustumiðstöðvar. Tryggja skal að umsækjandi geti komið sínum sjónarmiðum á framfæri á þann hátt sem hentar viðkomandi.

8. gr. Forgangsröðun umsókna.

Uppfylli umsækjandi skilyrði 4. gr. reglna þessara og þörf er fyrir stuðning umfram sérhæfða ráðgjöf skal umsókn metin á grundvelli þeirra matsviðmiða sem tilgreind eru í 6. gr. og á fylgiskjali 1 með reglum þessum. Að mati loknu raðast umsóknir í forgangsröð á grundvelli viðmiða sem tilgreind eru á fylgiskjali 2 með reglum þessum. Þegar umsókn um stuðning hefur verið samþykkt er gerð stuðningsáætlun og einstaklingsbundin þjónustuáætlun, þegar við á, og stuðningur getur hafist. Sé ekki unnt að hefja stuðning um leið og umsókn er samþykkt skal tilkynna umsækjanda um ástæður þess og hvenær áætlað er að stuðningur verði veittur.

Ef fyrirséð er að stuðningur geti ekki hafist innan þriggja mánaða skal umsókn sett á biðlista. Umsækjandi er upplýstur um áætlaða lengd á biðtíma og hvaða stuðningur standi honum til boða á biðtímanum, sbr. 1. mgr. 3. gr. reglugerðar um biðlista, forgangsröðun og úrræði á biðtíma eftir þjónustu, nr. 1035/2018. Þá skal veita aðra viðeigandi þjónustu á meðan beðið er eftir að þjónustan sem samþykkt hefur verið hefjist, sbr. 1. mgr. 34. gr. laga um þjónustu við fatlað fólk með langvarandi stuðningsþarfir, nr. 38/2018.

IV. KAFLI Framkvæmd

9. gr. Gjaldtaka.

Greitt er fyrir stuðningsþjónustu, þ.e. fyrir þrif og heimsendan mat, samkvæmt gildandi gjaldskrá sem samþykkt er á fundi velferðarráðs árlega, sbr. 4. mgr. 26. gr. laga um félagsþjónustu sveitarfélaga, nr. 40/1991.

Heimilt er að sækja um undanþágu frá gjaldskyldu hvað varðar aðstoð við þrif ef umsækjandi fær aðeins tekjur samkvæmt framfærsluviðmiði Tryggingastofnunar ríkisins eða þar undir.

10. gr. Tími og umfang stuðnings.

Stuðningur samkvæmt reglum þessum er veittur milli kl. 07.00 og 24.00.

Almennt er stuðningur veittur á dagvinnutíma á virkum dögum. Stuðningur að nóttu til felst í innliti allt að tvisvar sinnum, símtölum og skjáheimsóknum.

Almennt er stuðningur samkvæmt reglum þessum veittur í formi innlita eða stuttrar viðveru en ekki er gert ráð fyrir stöðugri viðveru nema til þeirra einstaklinga sem þurfa alltaf eftirlit og stuðning samkvæmt mati á stuðningsþörf, sbr. 6. gr. reglna þessara.

Um umfang stuðnings vísast til 5. mgr. 26. gr. laga um félagsþjónustu sveitarfélaga, nr. 40/1991 og laga um þjónustu við fatlað fólk með langvarandi stuðningsþarfir, nr. 38/2018. Ákvörðun um stuðning felur í sér að aðstoð sé að jafnaði veitt í tiltekinn fjölda skipta í viku hverri á grundvelli mats á stuðningsþörf.

11. gr. Gildistími og endurmat.

Samþykkja skal stuðning til ákveðins tíma, í fyrsta skipti til þriggja mánaða en að þeim tíma liðnum skal endurmeta fyrirkomulagið með tilliti til framlengingar. Eigi sjaldnar en á 12 mánaða fresti skal endurmeta stuðningsáætlun, gera viðeigandi breytingar eða ljúka stuðningi. Meta skal stuðningsáætlun í samvinnu við þann sem nýtur stuðningsins. Endurmat á stuðningsáætlun skal skráð við endurnýjun stuðningsáætlunar þar sem jafnframt skal koma fram hvort stuðningur hafi skilað þeim markmiðum sem sett voru í upphafi. Þegar stuðningi lýkur skal árangur þjónustunnar skráður sérstaklega.

Þegar breytingar verða á aðstæðum og högum viðkomandi einstaklings skal endurmeta stuðningsþörf. Ef um er að ræða verulegar breytingar eftir að umsókn hefur verið samþykkt er heimilt að endurskoða gildistíma samþykkis og stuðningsáætlunar. Í þeim tilvikum sem stuðningsþörf er óbreytt þarf ekki að sækja um að nýju heldur skal endurnýja áætlun á tveggja ára fresti í samráði við viðkomandi einstakling. Fari sú endurskoðun ekki fram skal tryggja að ekki verði rof á þjónustu.

Ávallt skal tryggt að ekki verði um rof á þjónustu að ræða þegar endurmat á sér stað.

V. KAFLI Ýmis ákvæði.

12. gr. Kostnaður.

Þegar stuðningur er veittur í tengslum við tómstundir ber viðkomandi einstaklingi að greiða fyrir sjálfan sig þann kostnað sem þar fellur til. Velferðarsvið Reykjavíkurborgar endurgreiðir starfsmanni útlagðan kostnað hans þegar stuðningur er veittur, s.s. í tengslum við leikhús- og kaffihúsaferðir. Útlagður kostnaður skal tengdur þeim markmiðum sem sett eru hverju sinni og í samræmi við vilja lögráðamanns þegar við á.

13. gr. Ferðir.

Að jafnaði skal nota almenningssamgöngur þegar stuðningur er veittur utan heimilis.

14. gr. Lyklanotkun.

Ef starfsmaður þarf lykil að heimili einstaklings skal hann geymdur á starfsstöð starfsmanns. Kveða skal á um það í stuðningsáætlun og halda skal skrá yfir lyklanotkun. Það sama gildir um raflása.

15. gr. Vinnuaðstæður.

Aðstæður á heimilum skulu vera í samræmi við lög um aðbúnað, hollustuhætti og öryggi á vinnustöðum, nr. 46/1980 og skal því gætt fyllsta öryggis og góður aðbúnaður tryggður.

Sé öryggi starfsfólks ógnað á heimilinu, t.d. vegna óreglu eða áreitni notanda, getur þurft að fresta stuðningi á meðan unnið er í málinu og úrbætur gerðar.

VI. KAFLI Málsmeðferð.

Um málsmeðferð gilda ákvæði stjórnsýslulaga, nr. 37/1993, ákvæði XVI. og
XVII. kafla laga um félagsþjónustu sveitarfélaga, nr. 40/1991 og
ákvæði VII. laga um þjónustu við fatlað fólk með
langvarandi stuðningsþarfir, nr. 38/2018.

16. gr. Viðeigandi aðlögun.

Við alla vinnslu og meðferð umsókna samkvæmt reglum þessum skal tryggja að viðeigandi stuðningur, aðstoð og leiðbeiningar séu veittar til að einstaklingur geti nýtt sér stuðninginn. Í því felst m.a. að upplýsingar séu settar fram á því formi sem viðkomandi einstaklingur getur nýtt sér, tryggt sé að hann komi sínum sjónarmiðum á framfæri og sé kynntur réttur sinn til að vísa máli sínu lengra, telji hann þörf á.

17. gr. Könnun á aðstæðum.

Kanna skal aðstæður umsækjanda svo fljótt sem unnt er eftir að beiðni um viðtal berst. Sama á við ef þjónustumiðstöð berast upplýsingar um nauðsyn á aðstoð með öðrum hætti.

Velferðarsvið Reykjavíkurborgar skal taka ákvörðun í máli svo fljótt sem unnt er og tryggja að mál sé nægjanlega upplýst áður en ákvörðun er tekin.

18. gr. Samvinna við umsækjanda.

Við meðferð umsóknar, öflun gagna og upplýsinga sem og við ákvarðanatöku skal hafa samvinnu og samráð við umsækjanda eftir því sem unnt er en að öðrum kosti við lögráðamann eða persónulegan talsmann hans eftir því sem við á.

Sérstaklega skal gætt að frumkvæðisskyldu hvað varðar þjónustu við fatlað fólk, sbr. 32. gr. laga um þjónustu við fatlað fólk með langvarandi stuðningsþarfir, nr. 38/2018.

19. gr. Endurskoðun.

Rétt til stuðnings samkvæmt reglum þessum má endurskoða hvenær sem er. Meta skal hvort umsækjandi fullnægi skilyrðum reglna þessara og hvort breytingar sem orðið hafa á aðstæðum umsækjanda og/eða annarra heimilismanna hafi áhrif á rétt hans og umfang stuðnings.

Ef umsókn um stuðningsþjónustu hefur verið samþykkt og í ljós kemur síðar að hún var byggð á röngum eða villandi upplýsingum af hálfu umsækjanda getur það leitt til afturköllunar ákvörðunar.

20. gr. Rangar eða villandi upplýsingar.

Ef sannreynt er við meðferð máls að upplýsingar sem umsækjandi hefur veitt eru rangar eða villandi, stöðvast afgreiðsla umsóknarinnar á meðan umsækjanda er gefið tækifæri til að leiðrétta eða bæta úr annmörkum.

Ef umsókn um stoð- og stuðningsþjónustu hefur verið samþykkt og í ljós kemur síðar að hún var byggð á röngum eða villandi upplýsingum af hálfu umsækjanda getur það leitt til afturköllunar ákvörðunar.

21. gr. Varðveisla gagna, trúnaður og aðgangur að gögnum.

Málsgögn er varða persónulega hagi umsækjenda skulu varðveitt á öruggan hátt í samræmi við lög um opinber skjalasöfn, nr. 77/2014, skjalavistunaráætlanir og reglur borgarinnar.

Starfsmenn eru bundnir þagnarskyldu um málefni umsækjanda er leynt eiga að fara samkvæmt lögum eða eðli máls. Starfsmönnum er óheimilt að rjúfa trúnað nema að fengnu samþykki viðkomandi. Þagnarskyldan helst þótt látið sé af starfi.

Umsækjandi getur óskað eftir aðgangi að fyrirliggjandi gögnum er varða hann sjálfan. Við mat á því hvaða gögnum verður miðlað skal meðal annars litið til ákvæða persónuverndarlaga, upplýsingalaga auk annarra laga og reglna sem kunna að eiga við hverju sinni.

Vinnsla mála og varðveisla gagna byggist á lögum um persónuvernd og vinnslu persónuupplýsinga, nr. 90/2018. Upplýsingar um vinnslu persónuupplýsinga má finna í persónuverndarstefnu Reykjavíkurborgar sem aðgengileg er á vefsíðu borgarinnar.

22. gr. Leiðbeiningar til umsækjanda.

Við afgreiðslu umsóknar skal starfsfólk velferðarsviðs Reykjavíkurborgar bjóða umsækjanda ráðgjöf ef þörf er á og veita upplýsingar og leiðbeiningar um réttindi sem hann kann að eiga annars staðar. Þá skal starfsmaður einnig upplýsa umsækjanda um þær skyldur sem kunna að hvíla á honum vegna framkvæmdar samkvæmt reglum þessum.

23. gr. Heimildir til ákvarðana samkvæmt reglum þessum.

Starfsmenn velferðarsviðs Reykjavíkurborgar taka ákvarðanir samkvæmt reglum þessum í umboði velferðarráðs Reykjavíkurborgar.

24. gr. Niðurstaða og rökstuðningur synjunar.

Kynna skal niðurstöðu umsóknar og mats á stuðningsþörf svo fljótt sem unnt er. Sé umsókn synjað skal umsækjandi fá svar þar sem vísað er með skýrum hætti til viðeigandi lagaákvæða og/eða ákvæða í reglum þessum og leiðbeint um heimild til að óska rökstuðnings fyrir synjun.

Upplýsa skal umsækjanda um rétt hans til að fara fram á að áfrýjunarnefnd velferðarráðs Reykjavíkurborgar taki umsóknina til meðferðar en slík beiðni skal berast nefndinni innan fjögurra vikna frá því að umsækjanda barst vitneskja um ákvörðun.

25. gr. Heimild áfrýjunarnefndar Reykjavíkurborgar til að veita undanþágu frá reglum þessum.

Um áfrýjunarnefnd velferðarráðs Reykjavíkurborgar gilda reglur þar að lútandi sem byggja á 3. mgr. 6. gr. laga um félagsþjónustu sveitarfélaga, nr. 40/1991. Áfrýjunarnefnd velferðarráðs Reykjavíkurborgar hefur heimild til að veita undanþágu frá reglum þessum ef sérstakar málefnalegar ástæður liggja fyrir og umsækjandi fer fram á það með sérstakri beiðni til áfrýjunarnefndar velferðarráðs Reykjavíkurborgar innan fjögurra vikna frá því honum barst vitneskja um ákvörðun. Stuðningur getur þó hafist á grundvelli ákvörðunar velferðarsviðs Reykjavíkurborgar þó að mál sé til meðferðar hjá áfrýjunarnefnd velferðarráðs Reykjavíkurborgar.

Ákvörðun áfrýjunarnefndar velferðarráðs Reykjavíkurborgar skal kynnt umsækjanda og um leið skal honum kynntur réttur hans til málskots til úrskurðarnefndar velferðarmála.

26. gr. Kæra til úrskurðarnefndar velferðarmála.

Umsækjandi getur kært ákvörðun áfrýjunarnefndar velferðarráðs Reykjavíkurborgar til úrskurðarnefndar velferðarmála.Skal það gert innan þriggja mánaða frá því að umsækjanda var kunngerð ákvörðun áfrýjunarnefndar velferðarráðs Reykjavíkurborgar.

27. gr. Gildistaka.

Reglur þessar kveða á um útfærslu á þjónustu sem sveitarfélögum er skylt að veita og eru settar með stoð í 25.-27. gr. og XI. kafla laga um félagsþjónustu sveitarfélaga, nr. 40/1991 og 1.-3. tl. og 5. tl. 8. gr. laga um þjónustu við fatlað fólk með langvarandi stuðningsþarfir, nr. 38/2018.

Reglur þessar öðlast gildi þann 1. febrúar 2022. Jafnframt falla þá úr gildi reglur um stuðningsþjónustu í Reykjavík, nr. 1095/2016, með áorðnum breytingum.

Bráðabirgðaákvæði I.

Umsóknir sem samþykktar voru í gildistíð eldri reglna halda gildi sínu í allt að 24 mánuði eftir gildistöku reglna þessara, eða þar til ákvörðun liggur fyrir. Á þeim tíma fer, eftir atvikum, fram endurmat á umsóknum eða þær falla úr gildi ef ekki er lengur þörf fyrir stuðning.

Borgarstjórinn í Reykjavík, 26. október 2021.

Dagur B. Eggertsson.

Fylgiskjöl.
(sjá PDF-skjal)

B deild - Útgáfud.: 10. nóvember 2021