Forseti Íslands
gjörir kunnugt: Alþingi hefur fallist á lög þessi og ég staðfest þau með samþykki mínu:

1. gr. Lögfesting.

Ákvæði reglugerðar Evrópuþingsins og ráðsins (ESB) 2023/1114 frá 31. maí 2023 um markaði fyrir sýndareignir og um breytingu á reglugerðum (ESB) nr. 1093/2010 og (ESB) nr. 1095/2010 og tilskipunum 2013/36/ESB og (ESB) 2019/1937, sem er birt á bls. 1–166 í EES-viðbæti við Stjórnartíðindi Evrópusambandsins nr. 23 frá 16. apríl 2025, skulu hafa lagagildi hér á landi með þeim aðlögunum sem leiðir af ákvörðun sameiginlegu EES-nefndarinnar nr. 41/2025 frá 20. febrúar 2025, sem er birt á bls. 69–80 í EES-viðbæti við Stjórnartíðindi Evrópusambandsins nr. 30 frá 8. maí 2025, og bókun 1 um altæka aðlögun við EES-samninginn, sbr. lög um Evrópska efnahagssvæðið, nr. 2/1993, þar sem bókunin er lögfest.

Í lögum þessum er vísað til reglugerðar (ESB) 2023/1114 með aðlögunum og breytingum skv. 1. mgr. sem reglugerðar (ESB) 2023/1114.

2. gr. Vísanir til tilskipana.

Eftirfarandi vísanir til tilskipana í reglugerð (ESB) 2023/1114 skulu skiljast svo:

1. Aðilar eða stofnanir sem eru taldar upp í 1. til 4. lið I. þáttar II. viðauka við tilskipun 2014/65/ESB: Fagfjárfestir skv. a–d-lið 14. tölul. 1. mgr. 4. gr. laga um markaði fyrir fjármálagerninga, nr. 115/2021.
2. Auðkenni áhættusamra þriðju landa skv. 9. gr. tilskipunar (ESB) 2015/849: Áhættusöm og ósamvinnuþýð ríki skv. 6. gr. laga um aðgerðir gegn peningaþvætti og fjármögnun hryðjuverka, nr. 140/2018.
3. Ákvæði landslaga sem lögleiða tilskipun (ESB) 2015/849: Lög um aðgerðir gegn peningaþvætti og fjármögnun hryðjuverka.
4. Ákvæði landslaga sem lögleiða 1. og 3. mgr. 18. gr. a tilskipunar (ESB) 2015/849: Ákvæði 14. gr. laga um aðgerðir gegn peningaþvætti og fjármögnun hryðjuverka, nr. 140/2018.
5. Ákvæði landslaga sem lögleiða 2. mgr. 26. gr. og 3. og 5. mgr. 45. gr. tilskipunar (ESB) 2015/849: Ákvæði 18. og 32. gr. laga um aðgerðir gegn peningaþvætti og fjármögnun hryðjuverka, nr. 140/2018.
6. Ákvæði landslaga sem lögleiða 16. gr. tilskipunar 2006/73/EB: Reglugerð sem sett er með stoð í 24. gr. laga um markaði fyrir fjármálagerninga, nr. 115/2021.
7. Ákvæði II. og III. bálks tilskipunar 2009/110/EB: Ákvæði II. og III. kafla laga um útgáfu og meðferð rafeyris, nr. 17/2013.
8. Ákvæði 5. gr. tilskipunar 2009/110/EB: 12. og 13. gr. laga um útgáfu og meðferð rafeyris, nr. 17/2013.
9. Ákvæði 7. gr. tilskipunar 2009/110/EB: 25. gr. laga um útgáfu og meðferð rafeyris, nr. 17/2013.
10. Ákvæði 11. gr. tilskipunar 2009/110/EB: 5., 7. og 8. gr. laga um útgáfu og meðferð rafeyris, nr. 17/2013.
11. Ákvæði 12. gr. tilskipunar 2009/110/EB: 6. gr. laga um útgáfu og meðferð rafeyris, nr. 17/2013.
12. Bótakerfin fyrir fjárfesta samkvæmt tilskipun 97/9/EB: Tryggingakerfi fyrir fjárfesta samkvæmt lögum um innstæðutryggingar og tryggingakerfi fyrir fjárfesta.
13. Eignastýring eins og um getur í 4. lið A-þáttar I. viðauka við tilskipun 2014/65/ESB: Eignastýring skv. d-lið 16. tölul. 1. mgr. 4. gr. laga um markaði fyrir fjármálagerninga, nr. 115/2021.
14. Fjárfestingarráðgjöf eins og um getur í i-lið b-liðar 3. mgr. 6. gr. tilskipunar 2009/65/ EB: Fjárfestingarráðgjöf skv. 2. tölul. 3. mgr. 5. gr. laga um verðbréfasjóði, nr. 116/2021.
15. Fjárfestingaráðgjöf eins og um getur í i-lið b-liðar 4. mgr. 6. gr. tilskipunar 2011/61/ ESB: Fjárfestingaráðgjöf skv. 2. tölul. 3. mgr. 9. gr. laga um rekstraraðila sérhæfðra sjóða, nr. 45/2020.
16. Fjárfestingarráðgjöf eins og um getur í 5. lið A-þáttar I. viðauka við tilskipun 2014/65/ ESB: Fjárfestingarráðgjöf skv. e-lið 16. tölul. 1. mgr. 4. gr. laga um markaði fyrir fjármálagerninga, nr. 115/2021.
17. Fjármálagerningar eins og þeir eru skilgreindir í 15. lið 1. mgr. 4. gr. tilskipunar 2014/65/ESB: Fjármálagerningur skv. 17. tölul. 1. mgr. 4. gr. laga um markaði fyrir fjármálagerninga, nr. 115/2021.
18. Fjármunir eins og þeir eru skilgreindir í 25. lið 4. gr. tilskipunar (ESB) 2015/2366: Fjármunir skv. 8. tölul. 3. gr. laga um greiðsluþjónustu, nr. 114/2021.
19. Framkvæmd fyrirmæla fyrir hönd viðskiptavina eins og um getur í 2. lið A-þáttar I. viðauka við tilskipun 2014/65/ESB: Framkvæmd fyrirmæla fyrir hönd viðskiptavina skv. b-lið 16. tölul. 1. mgr. 4. gr. laga um markaði fyrir fjármálagerninga, nr. 115/2021.
20. Fyrirbyggjandi aðgerðir eða neyðaraðgerðir eins og þær eru skilgreindar í 101. og 102. lið 1. mgr. 2. gr. tilskipunar 2014/59/ESB: Fyrirbyggjandi aðgerðir eins og þeim er lýst skv. 82. gr. c, 107. gr. c og 107. gr. e laga um fjármálafyrirtæki, nr. 161/2002, og 15. og 16. gr. laga um skilameðferð lánastofnana og verðbréfafyrirtækja, nr. 70/2020, og neyðaraðgerðir eins og þeim er lýst skv. 27., 37., 38. og 60. gr. laga um skilameðferð lánastofnana og verðbréfafyrirtækja, nr. 70/2020.
21. Greiðslustofnun eins og hún er skilgreind í 4. lið 4. gr. tilskipunar (ESB) 2015/2366: Greiðslustofnun skv. 18. tölul. 3. gr. laga um greiðsluþjónustu, nr. 114/2021.
22. Greiðsluþjónusta eins og hún er skilgreind í 3. lið 4. gr. tilskipunar (ESB) 2015/2366: Greiðsluþjónusta skv. 22. tölul. 3. gr. laga um greiðsluþjónustu, nr. 114/2021.
23. Greiðsluþjónustuveitandi eins og hann er skilgreindur í 11. lið 4. gr. tilskipunar (ESB) 2015/2366: Greiðsluþjónustuveitandi skv. 23. tölul. 3. gr. laga um greiðsluþjónustu, nr. 114/2021.
24. Hlutfall atkvæðisréttar skv. 9.–10. gr. og 4.–5. mgr. 12. gr. tilskipunar 2004/109/EB: Hlutfall atkvæðisréttar skv. III. kafla laga um upplýsingaskyldu útgefenda verðbréfa og flöggunarskyldu, nr. 20/2021.
25. Innstæða eins og hún er skilgreind í 3. lið 1. mgr. 2. gr. tilskipunar 2014/49/ESB: Skuldastaða sem er til komin vegna fjármuna sem skildir eru eftir á reikningi eða millifærslna sem leiðir af hefðbundinni almennri bankastarfsemi og sem lánastofnun ber að endurgreiða með skilmálum samkvæmt gildandi lögum eða samningum, þ.m.t. bundin innlán og innlán á sparireikningi en að undanskilinni skuldastöðu þar sem:
    1. einungis er hægt að sýna fram á hana með fjármálagerningi samkvæmt skilgreiningu í 17. tölul. 1. mgr. 4. gr. laga um markaði fyrir fjármálagerninga, nr. 115/2021, nema um sé að ræða sparnaðarafurð sem staðfest er með innlánaskírteini gefnu út á tilgreindan aðila og sem er fyrir hendi í aðildarríki 2. júlí 2014,
    2. höfuðstóll hennar er ekki endurgreiðanlegur á nafnverði,
    3. höfuðstóll hennar er einungis endurgreiðanlegur á nafnverði í krafti tiltekinnar ábyrgðar eða samþykkis sem lánastofnunin eða þriðji aðili veitir.
26. Innstæðutryggingakerfið samkvæmt tilskipun 2014/49/ESB: Innstæðudeild Tryggingarsjóðs vegna fjármálafyrirtækja samkvæmt lögum um innstæðutryggingar og tryggingakerfi fyrir fjárfesta.
27. Jöfnuð eigin viðskipti eins og þau eru skilgreind í 38. lið 1. mgr. 4. gr. tilskipunar 2014/65/ESB: Jöfnuð eigin viðskipti skv. 28. tölul. 1. mgr. 4. gr. laga um markaði fyrir fjármálagerninga, nr. 115/2021.
28. Kröfur um stjórnarhætti samkvæmt tilskipun 2014/65/ESB: Kröfur um stjórnarhætti samkvæmt lögum um markaði fyrir fjármálagerninga.
29. Lögbær yfirvöld samkvæmt ákvæðum landslaga sem lögleiða tilskipun 2009/110/EB: Lögbær yfirvöld samkvæmt lögum um útgáfu og meðferð rafeyris.
30. Markaðstorg fjármálagerninga samkvæmt tilskipun 2014/65/ESB: Markaðstorg fjármálagerninga skv. 38. tölul. 1. mgr. 4. gr. laga um markaði fyrir fjármálagerninga, nr. 115/2021.
31. Móttaka og miðlun fyrirmæla eins og um getur í iii-lið b-liðar 4. mgr. 6. gr. tilskipunar 2011/61/ESB: Móttaka og miðlun fyrirmæla varðandi fjármálagerninga skv. 4. tölul. 3. mgr. 9. gr. laga um rekstraraðila sérhæfðra sjóða, nr. 45/2020.
32. Móttaka og miðlun fyrirmæla um einn eða fleiri fjármálagerninga eins og um getur í 1. lið A-þáttar I. viðauka við tilskipun 2014/65/ESB: Móttaka og miðlun fyrirmæla frá viðskiptavinum um einn eða fleiri fjármálagerninga skv. a-lið 16. tölul. 1. mgr. 4. gr. laga um markaði fyrir fjármálagerninga, nr. 115/2021.
33. Náin tengsl eins og þau eru skilgreind í 35. lið 1. mgr. 4. gr. tilskipunar 2014/65/ESB: Náin tengsl skv. 43. tölul. 1. mgr. 4. gr. laga um markaði fyrir fjármálagerninga, nr. 115/2021.
34. Peningaþvætti eða fjármögnun hryðjuverka í skilningi 3. og 5. mgr. 1. gr. tilskipunar (ESB) 2015/849: Peningaþvætti eða fjármögnun hryðjuverka skv. 7. og 12. tölul. 3. gr. laga um aðgerðir gegn peningaþvætti og fjármögnun hryðjuverka, nr. 140/2018.
35. Rafeyrir eins og hann er skilgreindur í 2. lið 2. gr. tilskipunar 2009/110/EB: Rafeyrir skv. 5. tölul. 4. gr. laga um útgáfu og meðferð rafeyris, nr. 17/2013.
36. Rafeyrisfyrirtæki eins og það er skilgreint í 1. lið 2. gr. tilskipunar 2009/110/EB: Rafeyrisfyrirtæki skv. 6. tölul. 4. gr. laga um útgáfu og meðferð rafeyris, nr. 17/2013.
37. Rafeyristókar sem eru undanþegnir skv. 4. og 5. mgr. 1. gr. tilskipunar 2009/110/EB: Peningaleg verðmæti skv. 2. gr. laga um útgáfu og meðferð rafeyris, nr. 17/2013.
38. Rekstraraðili sérhæfðs sjóðs (AIFM) eins og hann er skilgreindur í b-lið 1. mgr. 4. gr. tilskipunar Evrópuþingsins og ráðsins 2011/61/ESB: Rekstraraðili skv. 26. tölul. 1. mgr. 3. gr. laga um rekstraraðila sérhæfðra sjóða, nr. 45/2020.
39. Rekstrarfélag eins og það er skilgreint í b-lið 1. mgr. 2. gr. tilskipunar Evrópuþingsins og ráðsins 2009/65/EB: Rekstrarfélag verðbréfasjóða skv. 18. tölul. 1. mgr. 3. gr. laga um verðbréfasjóði, nr. 116/2021.
40. Samningur um fjárhagslega tryggingarráðstöfun eins og hann er skilgreindur í a-lið 1. mgr. 2. gr. tilskipunar Evrópuþingsins og ráðsins 2002/47/EB: Samningur um fjárhagslega tryggingarráðstöfun skv. 7. tölul. 2. gr. laga um fjárhagslegar tryggingarráðstafanir, nr. 46/2005.
41. Samstæða eins og hún er skilgreind í 11. lið 2. gr. tilskipunar Evrópuþingsins og ráðsins 2013/34/ESB: Samstæða samkvæmt lögum um ársreikninga.
42. Samstæðureikningsskil í samræmi við tilskipun 2013/34/ESB: Samstæðureikningsskil í samræmi við lög um ársreikninga.
43. Skaða- eða líftryggingaafurðir sem falla undir vátryggingaflokkana sem taldir eru upp í I. og II. viðauka við tilskipun Evrópuþingsins og ráðsins 2009/138/EB eða endurtryggingasamningar eins og um getur í þeirri tilskipun: Skaða- eða líf- og heilsutryggingaafurðir og endurtryggingasamningar samkvæmt lögum um vátryggingastarfsemi.
44. Skipulegt markaðstorg samkvæmt tilskipun 2014/65/ESB: Skipulegt markaðstorg skv. 56. tölul. 1. mgr. 4. gr. laga um markaði fyrir fjármálagerninga, nr. 115/2021.
45. Skuldbindingar í tengslum við að koma í veg fyrir peningaþvætti og fjármögnun hryðjuverka samkvæmt tilskipun (ESB) 2015/849: Skuldbindingar í tengslum við að koma í veg fyrir peningaþvætti og fjármögnun hryðjuverka samkvæmt lögum um aðgerðir gegn peningaþvætti og fjármögnun hryðjuverka.
46. Starfsleyfi samkvæmt tilskipun 2009/110/EB: Starfsleyfi samkvæmt lögum um útgáfu og meðferð rafeyris.
47. Starfsleyfi samkvæmt tilskipun 2009/65/EB: Starfsleyfi samkvæmt lögum um verðbréfasjóði.
48. Starfsleyfi samkvæmt tilskipun 2011/61/ESB: Starfsleyfi samkvæmt lögum um rekstraraðila sérhæfðra sjóða.
49. Starfsleyfi samkvæmt tilskipun 2013/36/ESB: Starfsleyfi samkvæmt lögum um fjármálafyrirtæki.
50. Starfsleyfi samkvæmt tilskipun 2014/65/ESB: Starfsleyfi samkvæmt lögum um markaði fyrir fjármálagerninga.
51. Starfsleyfi samkvæmt tilskipun (ESB) 2015/2366: Starfsleyfi samkvæmt lögum um greiðsluþjónustu.
52. Starfstengd lífeyriskerfi sem falla undir gildissvið tilskipunar Evrópuþingsins og ráðsins (ESB) 2016/2341 eða tilskipunar 2009/138/EB: Samningur um starfstengd eftirlaunaréttindi samkvæmt lögum um starfstengda eftirlaunasjóði eða lögum um vátryggingastarfsemi.
53. Sölutrygging eða markaðssetning fjármálagerninga á skuldbindandi grundvelli sem um getur í 6. lið A-þáttar I. viðauka við tilskipun 2014/65/ESB: Sölutrygging í tengslum við útgáfu fjármálagerninga og/eða útboð fjármálagerninga skv. f-lið 16. tölul. 1. mgr. 4. gr. laga um markaði fyrir fjármálagerninga, nr. 115/2021.
54. Umsjón með útboði fjármálagerninga án sölutryggingar sem um getur í 7. lið A-þáttar I. viðauka við tilskipun 2014/65/ESB: Umsjón með útboði fjármálagerninga án sölutryggingar skv. g-lið 16. tölul. 1. mgr. 4. gr. laga um markaði fyrir fjármálagerninga, nr. 115/2021.
55. Útgefendur rafeyristóka sem njóta undanþágu í samræmi við 1. mgr. 9. gr. tilskipunar 2009/110/EB: Lögaðilar með takmarkað starfsleyfi skv. 16. gr. laga um útgáfu og meðferð rafeyris, nr. 17/2013.
56. Viðbótarþjónusta skv. 1. lið B-þáttar I. viðauka við tilskipun 2014/65/ESB: Viðbótarþjónusta skv. a-lið 67. tölul. 1. mgr. 4. gr. laga um markaði fyrir fjármálagerninga, nr. 115/2021.
57. Viðmiðunarmörk sem mælt er fyrir um í 52. gr. tilskipunar 2009/65/EB: Viðmiðunarmörk skv. 67. gr. laga um verðbréfasjóði, nr. 116/2021.
58. Viðskipti fyrir eigin reikning eins og um getur í 3. lið A-þáttar I. viðauka við tilskipun 2014/65/ESB: Viðskipti fyrir eigin reikning skv. c-lið 16. tölul. 1. mgr. 4. gr. laga um markaði fyrir fjármálagerninga, nr. 115/2021.
59. Þjónusta sem um getur í a-lið 3. mgr. 6. gr. tilskipunar 2009/65/EB: Eignastýring skv. 1. tölul. 3. mgr. 5. gr. laga um verðbréfasjóði, nr. 116/2021.
60. Þjónusta sem um getur í a-lið 4. mgr. 6. gr. tilskipunar 2011/61/ESB: Eignastýring skv. 1. tölul. 3. mgr. 9. gr. laga um rekstraraðila sérhæfðra sjóða, nr. 45/2020.

3. gr. Lögbært yfirvald og eftirlit.

Seðlabanki Íslands er lögbært yfirvald hér á landi í skilningi laga þessara. Fjármálaeftirlitið og Eftirlitsstofnun EFTA annast eftirlit samkvæmt lögum þessum. Fjármálaeftirlitið fer með önnur verkefni sem lög þessi fela lögbæru yfirvaldi. Um eftirlit Fjármálaeftirlitsins fer samkvæmt ákvæðum laga um opinbert eftirlit með fjármálastarfsemi og laga um evrópskt eftirlitskerfi á fjármálamarkaði.

Fjármálaeftirlitið hefur þær eftirlits- og rannsóknarheimildir sem kveðið er á um í 94. gr. reglugerðar (ESB) 2023/1114.

Til þeirra rannsóknaraðgerða sem kveðið er á um í a–c-lið og e-lið 1. mgr. 123. gr. og 124. gr. reglugerðar (ESB) 2023/1114 þarf heimild dómara nema samþykki þess aðila sem rannsóknaraðgerðirnar beinast að liggi fyrir. Um beiðni um heimild dómara til rannsóknaraðgerða fer eftir XV. kafla laga um meðferð sakamála, nr. 88/2008, eftir því sem við á.

4. gr. Aðfararhæfi ákvarðana Eftirlitsstofnunar EFTA og dóma EFTA-dómstólsins.

Ákvarðanir Eftirlitsstofnunar EFTA samkvæmt lögum þessum eru aðfararhæfar, sem og dómar og úrskurðir EFTA-dómstólsins.

5. gr. Starfsleyfi, skráning og virkir eignarhlutir.

Eftirtaldir aðilar skulu hafa starfsleyfi eða vera skráðir í samræmi við ákvæði reglugerðar (ESB) 2023/1114:

1. Aðilar sem bjóða sýndareignir aðrar en eignatengda tóka eða rafeyristóka á almennum markaði skulu uppfylla skilyrði II. bálks reglugerðarinnar.
2. Útgefendur eignatengdra tóka skulu sækja um starfsleyfi skv. 18. gr. reglugerðarinnar og uppfylla skilyrði III. bálks hennar.
3. Útgefendur rafeyristóka skulu hafa starfsleyfi skv. IV. bálki reglugerðarinnar og uppfylla þau skilyrði sem þar koma fram.
4. Þjónustuveitendur sýndareigna skulu sækja um starfsleyfi skv. 59. gr. reglugerðarinnar.

Einstaklingar eða lögaðilar sem einir eða í samstarfi hyggjast eignast, beint eða óbeint, virkan eignarhlut í þjónustuveitanda sýndareigna skulu tilkynna Fjármálaeftirlitinu skriflega um fyrirhuguð kaup í samræmi við 83. gr. reglugerðar (ESB) 2023/1114. Meta skal hæfi til að fara með virkan eignarhlut samkvæmt lögum þessum sem og öðrum lögum sem gilda um starfsemi aðilans.

Fjármálaeftirlitið getur afturkallað starfsleyfi útgefanda eignatengds tóka skv. 24. gr. og starfsleyfi þjónustuveitanda sýndareigna skv. 64. gr. reglugerðar (ESB) 2023/1114. Fjármálaeftirlitið getur afturkallað eða fellt niður tímabundið starfsleyfi þjónustuveitanda sýndareigna vegna brota á ákvæðum sem tilgreind eru í 5. tölul. 1. mgr. 6. gr.

6. gr. Stjórnvaldssektir.

Fjármálaeftirlitið getur lagt stjórnvaldssekt á hvern þann sem brýtur gegn eftirfarandi ákvæðum reglugerðar (ESB) 2023/1114:

1. 4.–14. gr.
2. 16., 17., 19., 22., 23., 25., 27.–41., 46. og 47. gr.
3. 48.–51. og 53.–55. gr.
4. 59., 60. og 64.–83. gr.
5. 88.–92. gr.

Sekt sem lögð er á einstakling vegna brots skv. 1.–4. tölul. 1. mgr. getur numið að hámarki 105 millj. kr. Sekt sem lögð er á einstakling getur numið að hámarki 150 millj. kr. vegna brots gegn 88. gr. reglugerðar (ESB) 2023/1114 og að hámarki 750 millj. kr. vegna brots gegn 89.–92. gr. reglugerðarinnar.

Sekt sem lögð er á lögaðila vegna brots skv. 1.–4. tölul. 1. mgr. getur numið að hámarki 750 millj. kr., að hámarki 375 millj. kr. vegna brots gegn 88. gr. reglugerðar (ESB) 2023/1114 og að hámarki 2.240 millj. kr. vegna brots gegn 89.–92. gr. reglugerðarinnar. Sekt sem lögð er á lögaðila getur þó verið hærri með tilliti til hlutfalls af heildarársveltu samkvæmt síðasta samþykkta ársreikningi lögaðilans eða samkvæmt síðasta samþykkta samstæðureikningi ef um er að ræða móðurfélag eða dótturfélag móðurfélags sem ber að semja samstæðureikning, þ.e. allt að 2% ef um er að ræða brot gegn 88. gr. reglugerðarinnar, allt að 3% ef um er að ræða brot skv. 1. tölul. 1. mgr., allt að 5% ef um er að ræða brot skv. 4. tölul. 1. mgr., allt að 12,5% ef um er að ræða brot skv. 2. eða 3. tölul. 1. mgr. og allt að 15% ef um er að ræða brot gegn 89.–92. gr. reglugerðarinnar.

Þrátt fyrir 2. og 3. mgr. er heimilt að ákvarða einstaklingi eða lögaðila stjórnvaldssekt vegna brots skv. 1.–4. tölul. 1. mgr. allt að tvöfaldri þeirri fjárhæð sem nemur fjárhagslegum ávinningi af brotinu eða tapi sem forðað er með því. Heimilt er að ákvarða einstaklingi eða lögaðila stjórnvaldssekt vegna brots skv. 5. tölul. 1. mgr. allt að þrefaldri þeirri fjárhæð sem nemur fjárhagslegum ávinningi af brotinu eða tapi sem forðað er með því.

Ákvarðanir Fjármálaeftirlitsins um stjórnvaldssektir eru aðfararhæfar. Sektir renna í ríkissjóð að frádregnum kostnaði við innheimtuna. Séu stjórnvaldssektir ekki greiddar innan mánaðar frá því að tilkynnt hefur verið um ákvörðun Fjármálaeftirlitsins skal greiða dráttarvexti af fjárhæð sektarinnar. Um ákvörðun og útreikning dráttarvaxta fer eftir lögum um vexti og verðtryggingu.

7. gr. Bann við stjórnunarstörfum.

Vegna brots skv. 4. eða 5. tölul. 1. mgr. 6. gr. er Fjármálaeftirlitinu heimilt að leggja tímabundið bann við því að stjórnarmaður eða framkvæmdastjóri viðkomandi þjónustuveitanda sýndareigna, eða hver annar einstaklingur sem ber ábyrgð á brotinu, gegni stjórnunarstörfum hjá þjónustuveitanda sýndareigna. Ef um er að ræða endurtekið brot gegn 89.–92. gr. reglugerðar (ESB) 2023/1114 getur bannið numið a.m.k. tíu árum.

8. gr. Bann við viðskiptum fyrir eigin reikning.

Vegna brots skv. 5. tölul. 1. mgr. 6. gr. er Fjármálaeftirlitinu heimilt að leggja tímabundið bann við því að stjórnarmaður eða framkvæmdastjóri viðkomandi þjónustuveitanda sýndareigna, eða hver annar einstaklingur sem ber ábyrgð á brotinu, stundi viðskipti fyrir eigin reikning.

9. gr. Opinber birting.

Fjármálaeftirlitið skal birta ákvarðanir um beitingu stjórnsýsluviðurlaga vegna brota skv. 1.–5. tölul. 1. mgr. 6. gr. til samræmis við 114. gr. reglugerðar (ESB) 2023/1114.

10. gr. Saknæmi.

Stjórnsýsluviðurlögum verður beitt óháð því hvort lögbrot eru framin af ásetningi eða gáleysi.

11. gr. Ákvörðun stjórnsýsluviðurlaga og annarra ráðstafana.

Við ákvörðun stjórnsýsluviðurlaga, þar á meðal um fjárhæð stjórnvaldssekta, og annarra ráðstafana vegna brota gegn lögum þessum skal tekið tillit til allra atvika sem máli skipta, eftir því sem við á, þ.m.t. eftirfarandi:

1. alvarleika og tímalengdar brotsins,
2. hvort brotið hafi verið framið af ásetningi eða gáleysi,
3. ábyrgðar hins brotlega,
4. fjárhagsstöðu hins brotlega, sér í lagi með hliðsjón af heildarveltu lögaðila eða árstekjum og hreinni eign einstaklings,
5. ávinnings eða taps sem forðað var með brotinu fyrir hinn brotlega, sé unnt að ákvarða það,
6. hvort brotið hafi leitt til taps þriðja aðila,
7. samstarfsvilja hins brotlega,
8. fyrri brota hins brotlega á lögum þessum,
9. ráðstafana sem sá brotlegi gerir eftir brotið til að koma í veg fyrir endurtekningu þess,
10. áhrifa brotsins á hagsmuni eigenda sýndareigna og viðskiptavina þjónustuveitenda sýndareigna, einkum almennra eigenda.

12. gr. Sátt.

Hafi aðili gerst brotlegur við lög þessi, stjórnvaldsfyrirmæli sett á grundvelli þeirra eða ákvarðanir Fjármálaeftirlitsins á grundvelli þeirra er Fjármálaeftirlitinu heimilt að ljúka málinu með sátt með samþykki málsaðila. Sátt er bindandi fyrir málsaðila þegar hann hefur samþykkt og staðfest efni hennar með undirskrift sinni.

Seðlabanki Íslands setur reglur um framkvæmd 1. mgr.

13. gr. Réttur grunaðs manns.

Í máli sem beinist að einstaklingi og lokið getur með stjórnsýsluviðurlögum hefur sá sem rökstuddur grunur leikur á að hafi gerst sekur um lögbrot rétt til að neita að svara spurningum eða afhenda gögn eða muni nema hægt sé að útiloka að það geti haft þýðingu fyrir ákvörðun um brot hans. Fjármálaeftirlitið skal leiðbeina hinum grunaða um þennan rétt.

14. gr. Frestur til að beita stjórnsýsluviðurlögum.

Heimild Fjármálaeftirlitsins til að beita stjórnsýsluviðurlögum samkvæmt lögum þessum fellur niður þegar sjö ár eru liðin frá því að háttsemi lauk.

Frestur skv. 1. mgr. rofnar þegar Fjármálaeftirlitið tilkynnir aðila um upphaf rannsóknar á meintu broti. Rof frests hefur réttaráhrif gagnvart öllum sem staðið hafa að broti.

15. gr. Stjórnvaldsfyrirmæli.

Ráðherra setur reglugerð um nánari framkvæmd reglugerðar (ESB) 2023/1114 um þau atriði sem koma fram í:

1. 2. mgr. 3. gr. um skilgreiningar.
2. 11. mgr. 43. gr. um flokkun eignatengdra tóka sem mikilvægra eignatengdra tóka.
3. 8. mgr. 103. gr., 8. mgr. 104. gr. og 7. mgr. 105. gr. um viðmið og þætti varðandi fjárfestavernd eða ógn við eðlilega virkni og heilleika markaða með sýndareignir eða við stöðugleika fjármálakerfisins.
4. 10. mgr. 134. gr. um málsmeðferðarreglur um eftirlitsráðstafanir og álagningu sekta.
5. 3. mgr. 137. gr. um eftirlitsgjöld.

Seðlabanki Íslands setur reglur um nánari framkvæmd reglugerðar (ESB) 2023/1114 um þau atriði sem koma fram í:

1. 11. mgr. 6. gr. um stöðluð eyðublöð, snið og sniðmát hvítbókar um sýndareign.
2. 12. mgr. 6. gr. um efni, aðferðafræði og framsetningu upplýsinga um sjálfbærnivísa.
3. 8. mgr. 17. gr. um ferlið við samþykki á hvítbók um sýndareign.
4. 6. mgr. 18. gr. um nánari tilgreiningu upplýsinga varðandi umsókn um starfsleyfi.
5. 7. mgr. 18. gr. um stöðluð eyðublöð, sniðmát og verklagsreglur um þær upplýsingar sem skulu vera í umsókn um starfsleyfi.
6. 10. mgr. 19. gr. um stöðluð eyðublöð, snið og sniðmát vegna hvítbókar um sýndareign.
7. 11. mgr. 19. gr. um efni, aðferðafræði og framsetningu upplýsinga um sjálfbærnivísa.
8. 6. mgr. 22. gr. um aðferðir við að meta fjölda og virði viðskipta.
9. 7. mgr. 22. gr. um stöðluð eyðublöð, snið og sniðmát vegna skýrslugjafar og upplýsingagjafar.
10. 5. mgr. 31. gr. um kröfur, sniðmát og verklagsreglur fyrir meðferð kvartana.
11. 5. mgr. 32. gr. um stefnur og verklagsreglur varðandi ráðstafanir vegna hagsmunaárekstra ásamt upplýsingum og aðferðum í tengslum við upplýsingagjöf.
12. 6. mgr. 35. gr. um ferli, tímaramma og viðmið í tengslum við kröfu um hærri eiginfjárgrunn og lágmarkskröfur um álagspróf.
13. 4. mgr. 36. gr. um lausafjárkröfur.
14. 5. mgr. 38. gr. um fjármálagerninga sem teljast auðseljanlegir og bera hverfandi áhættu.
15. 4. mgr. 42. gr. um efni nauðsynlegra upplýsinga til að framkvæma mat á fyrirhuguðum kaupum í útgefendum eignatengdra tóka.
16. 7. mgr. 45. gr. um fyrirkomulag stjórnarhátta, stefnu og verklagsreglur við bæði lausafjárstýringu og lausafjárkröfur og ferli og tímaramma varðandi aðlögun í tengslum við fjárhæð eiginfjárgrunns.
17. 10. mgr. 51. gr. um stöðluð eyðublöð, snið og sniðmát vegna hvítbókar um sýndareign.
18. 15. mgr. 51. gr. um efni, aðferðafræði og framsetningu upplýsinga að því er varðar sjálfbærnivísa.
19. 13. mgr. 60. gr. um nánari tilgreiningu upplýsinga skv. 7. mgr. 60. gr.
20. 14. mgr. 60. gr. um stöðluð eyðublöð, sniðmát og verklagsreglur að því er varðar tilkynningu skv. 7. mgr. 60. gr.
21. 5. mgr. 62. gr. um nánari tilgreiningu upplýsinga skv. 2. og 3. mgr. 62. gr. varðandi umsókn um starfsleyfi.
22. 6. mgr. 62. gr. um stöðluð eyðublöð, sniðmát og verklagsreglur um þær upplýsingar sem skulu vera í umsókn um starfsleyfi.
23. 6. mgr. 66. gr. um efni, aðferðafræði og framsetningu upplýsinga að því er varðar sjálfbærnivísa.
24. 10. mgr. 68. gr. um ráðstafanir til að tryggja samfellu og reglufestu í framkvæmd þjónustu á sviði sýndareigna og skrár sem halda skal um alla þjónustu, starfsemi, fyrirmæli og viðskipti.
25. 5. mgr. 71. gr. um kröfur, sniðmát og verklagsreglur fyrir meðferð kvartana.
26. 5. mgr. 72. gr. um stefnur og verklagsreglur varðandi ráðstafanir vegna hagsmunaárekstra ásamt upplýsingagjöf og aðferðum.
27. 16. mgr. 76. gr. um hvernig leggja eigi fram gögn um gagnsæi og innihald og snið tilboðabóka.
28. 4. mgr. 84. gr. um efni nauðsynlegra upplýsinga til að framkvæma mat á fyrirhuguðum kaupum á þjónustuveitendum sýndareigna.
29. 4. mgr. 88. gr. um opinbera birtingu innherjaupplýsinga og frestun á opinberri birtingu innherjaupplýsinga.
30. 2. mgr. 92. gr. um fyrirkomulag, kerfi, verklag og sniðmát til að fyrirbyggja og greina markaðssvik og samráðsferli milli lögbærra yfirvalda þegar um er að ræða markaðssvik yfir landamæri.
31. 10. mgr. 95. gr. um upplýsingaskipti á milli lögbærra yfirvalda.
32. 11. mgr. 95. gr. um stöðluð eyðublöð, sniðmát og verklag við samstarf og upplýsingaskipti milli lögbærra yfirvalda.
33. 3. mgr. 96. gr. um stöðluð eyðublöð, sniðmát og verklag við samstarf og upplýsingaskipti.
34. 3. mgr. 107. gr. um sniðmát fyrir samstarfssamninga við lögbær yfirvöld þriðju landa.
35. 8. mgr. 109. gr. um gögn sem nauðsynleg eru til flokkunar í skrá varðandi hvítbækur um sýndareignir, útgefendur eignatengdra tóka og rafeyristóka og þjónustuveitendur sýndareigna.
36. 8. mgr. 119. gr. um mat á mikilvægi útgefenda eignatengdra tóka og rafeyristóka, hvernig skuli telja eignatengda tóka eða rafeyristóka notaða í miklum mæli og framkvæmdarlega þætti í störfum samstarfshóps eftirlitsaðila.

Seðlabanka Íslands er heimilt með reglum að banna eða takmarka markaðssetningu, dreifingu eða sölu tiltekinna sýndareigna, eða sýndareigna með tilgreinda eiginleika, eða tiltekna tegund starfsemi eða venju sem tengist sýndareignum í samræmi við 105. gr. reglugerðar (ESB) 2023/1114.

16. gr. Gildistaka.

Lög þessi öðlast gildi 1. janúar 2026.

Þegar vísað er til dagsetningarinnar 30. desember 2024 í 143. gr. reglugerðar (ESB) 2023/1114 skal skilja það sem vísun til 1. janúar 2026. Þegar vísað er til dagsetningarinnar 30. júlí 2024 í 143. gr. reglugerðarinnar skal skilja það sem vísun til 1. febrúar 2026.

17. gr. Breyting á öðrum lögum.

1. Lög um opinbert eftirlit með fjármálastarfsemi, nr. 87/1998: Við 1. mgr. 2. gr. laganna bætast tveir nýir töluliðir, svohljóðandi:
   12. þjónustuveitenda sýndareigna,
   13. útgefenda eignatengdra tóka.
2. Lög um greiðslu kostnaðar við opinbert eftirlit með fjármálastarfsemi og skilavald, nr. 99/1999: Á eftir orðinu „greiðslustofnana“ í 2. tölul. 2. mgr. 7. gr. laganna kemur: þjónustuveitenda sýndareigna.
3. Lög um fjármálafyrirtæki, nr. 161/2002: Eftirfarandi breytingar verða á 20. gr. laganna:
   1. Við 15. tölul. 1. mgr. bætist: þ.m.t. rafeyristóka samkvæmt lögum um markaði fyrir sýndareignir.
   2. Við 1. mgr. bætast tveir nýir töluliðir, svohljóðandi:
      16. Útgáfu eignatengdra tóka samkvæmt lögum um markaði fyrir sýndareignir.
      17. Þjónustu á sviði sýndareigna samkvæmt lögum um markaði fyrir sýndareignir.
   3. Í stað tilvísunarinnar „15. tölul.“ í 3. mgr. kemur: 17. tölul.
4. Lög um evrópskt eftirlitskerfi á fjármálamarkaði, nr. 24/2017: Eftirfarandi breytingar verða á 3. gr. laganna:
   1. Við 1. tölul. bætist: með þeim breytingum sem leiðir af 144. gr. reglugerðar Evrópuþingsins og ráðsins (ESB) 2023/1114 frá 31. maí 2023 um markaði fyrir sýndareignir og um breytingu á reglugerðum (ESB) nr. 1093/2010 og (ESB) nr. 1095/2010 og tilskipunum 2013/36/ESB og (ESB) 2019/1937, sem er birt á bls. 1–166 í EES-viðbæti við Stjórnartíðindi Evrópusambandsins nr. 23 frá 16. apríl 2025.
   2.  Við 3. tölul. bætist nýr stafliður, svohljóðandi: 145. gr. reglugerðar Evrópuþingsins og ráðsins (ESB) 2023/1114 frá 31. maí 2023 um markaði fyrir sýndareignir og um breytingu á reglugerðum (ESB) nr. 1093/2010 og (ESB) nr. 1095/2010 og tilskipunum 2013/36/ESB og (ESB) 2019/1937, sem er birt á bls. 1–166 í EES-viðbæti við Stjórnartíðindi Evrópusambandsins nr. 23 frá 16. apríl 2025.
5. Lög um aðgerðir gegn peningaþvætti og fjármögnun hryðjuverka, nr. 140/2018:
   1. Eftirfarandi breytingar verða á 3. gr. laganna:
      1. 16. tölul. orðast svo: Sýndareign: Stafræn framsetning á virði eða réttindum sem unnt er að millifæra og varðveita rafrænt með dreifðri færsluskrártækni eða sambærilegri tækni, sbr. lög um markaði fyrir sýndareignir.
      2. 20. tölul. fellur brott.
      3. 25. tölul. orðast svo: Þjónustuveitandi sýndareigna: Lögaðili eða annar rekstraraðili sem hefur atvinnu af eða rekur þjónustu á einu eða fleiri sviðum sýndareigna fyrir viðskiptavini í atvinnuskyni og hefur heimild til að veita þjónustu á sviði sýndareigna, sbr. lög um markaði fyrir sýndareignir.
      4. Við bætist nýr töluliður, svohljóðandi: Sjálfhýst vistfang: Vistfang dreifðrar færsluskrár sem tengist hvorki þjónustuveitanda sýndareigna né aðila með staðfestu utan Evrópska efnahagssvæðisins sem veitir svipaða þjónustu og þjónustuveitandi sýndareigna.
   2. 7. mgr. 32. gr. laganna orðast svo:
      
      Rafeyrisfyrirtæki, greiðsluþjónustuveitendur og þjónustuveitendur sýndareigna, sem hafa höfuðstöðvar sínar í öðru aðildarríki innan Evrópska efnahagssvæðisins en veita þjónustu með staðfestu hér á landi á öðru formi en sem útibú, skulu að kröfu eftirlitsaðila tilnefna miðlægan tengilið sem hefur það hlutverk að tryggja að farið sé að lögum þessum og auðvelda eftirlit með starfseminni af hálfu eftirlitsaðila, þ.m.t. með því að láta eftirlitsaðilum í té skjöl og upplýsingar sé þess óskað.
   3. Eftirfarandi breytingar verða á 35. gr. laganna:
      
      1. 1. mgr. orðast svo: Einstaklingar og lögaðilar sem veita gjaldeyrisskiptaþjónustu eru skráningarskyldir hjá Seðlabanka Íslands.
      2. Orðin „ og þjónustuveitenda sýndareigna“ í fyrirsögn greinarinnar falla brott.
   4. 1. mgr. 38. gr. laganna orðast svo:
      
      Fjármálaeftirlitið hefur eftirlit með því að aðilar sem tilgreindir eru í a–j-lið 1. mgr. 2. gr. fari að ákvæðum laga þessara og reglugerða og reglna sem settar eru samkvæmt þeim. Seðlabanki Íslands er lögbært yfirvald hér á landi í skilningi reglugerðar (ESB) 2023/1113 og annast Fjármálaeftirlitið eftirlit samkvæmt reglugerðinni og fer með önnur verkefni sem reglugerðin felur lögbæru yfirvaldi. Um eftirlit Fjármálaeftirlitsins fer samkvæmt ákvæðum laga um opinbert eftirlit með fjármálastarfsemi, laga um evrópskt eftirlitskerfi á fjármálamarkaði og þeim sérlögum sem gilda um starfsemi eftirlitsskyldra aðila.
   5. Eftirfarandi breytingar verða á 46. gr. laganna:
      1. 26. tölul. 1. mgr. fellur brott.
      2. 2. mgr. orðast svo:
         
         Fjármálaeftirlitið getur lagt á stjórnvaldssektir vegna eftirtalinna brota gegn reglugerð (ESB) 2023/1113:
         1. Endurtekinnar eða kerfisbundinnar vanrækslu greiðsluþjónustuveitanda á því að láta tilskildar upplýsingar um greiðanda eða viðtakanda greiðslu fylgja millifærslu fjármuna skv. 4., 5. eða 6. gr.
         2. Vanrækslu greiðsluþjónustuveitanda á því að koma á skilvirku verklagi á grundvelli áhættu skv. 8. eða 12. gr.
         3. Alvarlegrar vanrækslu greiðsluþjónustumiðlara á að uppfylla kröfur 11. eða 12. gr.
         4. Endurtekinnar eða kerfisbundinnar vanrækslu þjónustuveitanda sýndareigna á því að láta tilskildar upplýsingar um upphafsaðila eða viðtakanda fylgja millifærslu sýndareigna skv. 14. eða 15. gr.
         5. Vanrækslu þjónustuveitanda sýndareigna á að koma á skilvirku verklagi á grundvelli áhættu skv. 17. gr.
         6. Alvarlegrar vanrækslu þjónustumiðlara sýndareigna á að uppfylla kröfur 19., 20. og 21. gr.
         7. Endurtekinnar, kerfisbundinnar eða alvarlegrar vanrækslu greiðsluþjónustuveitanda eða þjónustuveitanda sýndareigna á að varðveita skrár skv. 26. gr.
   6. Eftirfarandi breytingar verða á 56. gr. laganna:
      1. I-liður fellur brott.
      2. J-liður orðast svo: um kröfur við tilnefningu miðlægs tengiliðar skv. 7. mgr. 32. gr.
   7. Á eftir 57. gr. laganna kemur ný grein, 57. gr. a, ásamt fyrirsögn, svohljóðandi:

Innleiðing reglugerðar Evrópusambandsins.

Ákvæði reglugerðar Evrópuþingsins og ráðsins (ESB) 2023/1113 frá 31. maí 2023 um upplýsingar sem fylgja skulu við millifærslu fjármuna og tiltekinna sýndareigna og um breytingu á tilskipun (ESB) 2015/849, sem er birt í EES-viðbæti við Stjórnartíðindi Evrópusambandsins nr. 23 frá 16. apríl 2025, bls. 167–205, skulu hafa lagagildi hér á landi með þeim aðlögunum sem leiðir af ákvörðun sameiginlegu EES-nefndarinnar nr. 42/2025, frá 20. febrúar 2025, sem er birt á bls. 81–82 í EES-viðbæti við Stjórnartíðindi Evrópusambandsins nr. 30 frá 8. maí 2025, og bókun 1 um altæka aðlögun við samninginn um Evrópska efnahagssvæðið, sbr. lög um Evrópska efnahagssvæðið, nr. 2/1993, þar sem bókunin er lögfest.

Í lögum þessum er vísað til reglugerðar (ESB) 2023/1113 með aðlögunum og breytingum skv. 1. mgr. sem reglugerðar (ESB) 2023/1113.

Eftirfarandi vísanir til tilskipana í reglugerð (ESB) 2023/1113, sbr. 1. mgr., skulu skiljast svo:

1. Beingreiðsla skv. 23. lið 4. gr. tilskipunar (ESB) 2015/2366: Beingreiðsla skv. 2. tölul. 3. gr. laga um greiðsluþjónustu, nr. 114/2021.
2. Einstaklingar eða lögaðilar sem hafa fengið undanþágu skv. 32. gr. tilskipunar (ESB) 2015/2366: Greiðsluþjónustuveitandi skv. g-lið 23. tölul. 3. gr., sbr. 34. gr., laga um greiðsluþjónustu, nr. 114/2021.
3. Fjármunir skv. 25. lið 4. gr. tilskipunar (ESB) 2015/2366: Fjármunir skv. 8. tölul. 3. gr. laga um greiðsluþjónustu, nr. 114/2021.
4. Flokkar greiðsluþjónustuveitenda sem um getur í 1. mgr. 1. gr. tilskipunar (ESB) 2015/2366: Greiðsluþjónustuveitandi skv. a–f-lið 23. tölul. 3. gr. laga um greiðsluþjónustu, nr. 114/2021.
5. Greiðslureikningur skv. 12. lið 4. gr. tilskipunar (ESB) 2015/2366: Greiðslureikningur skv. 17. tölul. 3. gr. laga um greiðsluþjónustu, nr. 114/2021.
6. Greiðsluvirkjandi skv. 18. lið 4. gr. tilskipunar (ESB) 2015/2366: Greiðsluvirkjandi skv. 19. tölul. 3. gr. laga um greiðsluþjónustu, nr. 114/2021.
7. Lögaðilar sem hafa fengið undanþágu skv. 9. gr. tilskipunar 2009/110/EB: Lögaðilar með takmarkað starfsleyfi skv. 16. gr. laga um útgáfu og meðferð rafeyris, nr. 17/2013.
8. Miðlægur tengiliður skv. 9. mgr. 45. gr. tilskipunar (ESB) 2015/849: Miðlægur tengiliður skv. 7. mgr. 32. gr. laga þessara.
9. Millifærsla fjármuna skv. 24. lið 4. gr. tilskipunar (ESB) 2015/2366: Millifærsla fjármuna skv. 27. tölul. 3. gr. laga um greiðsluþjónustu, nr. 114/2021.
10. Peningasending skv. 22. lið 4. gr. tilskipunar (ESB) 2015/2366: Peningasending skv. 30. tölul. 3. gr. laga um greiðsluþjónustu, nr. 114/2021.
11. Peningaþvætti eða fjármögnun hryðjuverka skv. 3.–5. mgr. 1. gr. tilskipunar (ESB) 2015/849: Peningaþvætti eða fjármögnun hryðjuverka skv. 7. og 12. tölul. 3. gr. laga þessara.
12. Þjónusta sem skráð er í a–m-lið og o-lið 3. gr. tilskipunar (ESB) 2015/2366: Þjónusta sem tilgreind er í 1.–15. og 17. tölul. 2. gr. laga um greiðsluþjónustu, nr. 114/2021.

A deild — Útgáfudagur: 29. desember 2025