1. gr.

Eftirfarandi breytingar eru gerðar á lið 07.01 um ljósker í 7. gr.:

1. Skilgreining á „Auka háljósker“ í tölulið (1) um aðalljós skal vera eftirfarandi:
   Auka háljósker: Ljósker skulu tengd öðrum háljóskerum og kvikna skal á þeim samtímis áskildum háljóskerum eða um sérstakan rofa. Þegar um er að ræða tvö pör aukaháljóskera mega þau ekki loga samtímis. Einnig er heimilt að hafa aðeins eitt aukaháljósker í stað pars aukaháljóskera, og skal það þá vera í lóðréttu breiddarmiðplani ökutækisins. Þegar skipt er af háljósum á lágljós skulu öll háljósin slokkna samtímis. Aukaháljós skulu staðsett framar en ökumaður. Að öðru leyti gilda sömu ákvæði og um áskilin háljósker.
2. Í stað orðanna „Ljóskerin skulu vera byrgð þegar þau eru ekki í notkun“ í tölulið (11) um ljóskastara kemur:
   Fjöldi: Einn eða tveir. Ef einn ljóskastari er notaður skal hann vera í lóðréttu breiddarmiðplani ökutækisins.
3. Skilgreining á „Tíðni“ í tölulið (12) um neyðarakstursljós í lið 07.01 um ljósker í 7. gr. skal vera eftirfarandi:
   Tíðni: Blikktíðni skal vera á milli 60 og 240 leiftur á mínútu. Þó er heimilt að hafa eingöngu blá ljós án blikktíðni (sólir) til að auka sýnileika neyðarakstursökutækis þegar neyðarakstur á sér ekki stað t.d. að næturlagi og við fjölmennar samkomur.

2. gr.

Við lið 07.02 um glitaugu og endurskinsmerki í 7. gr. bætast eftirfarandi töluliðir:

1. (8) Sérstakar glitmerkingar.
   Glitmerkingar ökutækja í neyðarakstri skulu vera sem hér segir:
   Litasamsetningar:
   Ökutæki lögreglu: Gulur og blár.
   Ökutæki slökkviliðs: Gulur og rauður.
   Ökutæki til sjúkraflutninga: Gulur og grænn.
   Ökutæki björgunarsveita: Gulur og appelsínugulur.
   Óheimilt er að hafa framvísandi rauða glitmerkingu og afturvísandi hvíta glitmerkingu, nema um sé að ræða viðvörunarglitmerkingar.
   Lögun: Raðir af viðeigandi litum til skiptis. Önnur ökutæki en fólksbifreiðar skulu hafa ferhyrnt glit á hlið, viðvörunarglitmerkingar skv. lið 07.02 (7) að framan og/eða aftan.
   Viðurkenning og merkingar: Ekki er gerð krafa um viðurkenningu á sérstökum glitmerkingum, en viðvörunarglitmerkingar skulu vera viðurkenndar og merktar samkvæmt ECE-reglum nr. 70 og 104.
   Stærð merkinga: Hver flötur skal vera að lágmarki 40 x 40 mm.
2. (9) Undanþága.
   Samgöngustofa getur veitt ökutækjum í neyðaraksti undanþágu frá merkingum eða heimild til frekari merkinga og annarrar gerðar þeirra en kveðið er á um í reglugerð þessari.

3. gr. Lagastoð og gildistaka.

Reglugerð þessi, sem sett er samkvæmt heimild í 60. gr. umferðarlaga nr. 50/1987 með síðari breytingum, öðlast þegar gildi.

Samgöngu- og sveitarstjórnarráðuneytinu, 30. september 2019.

Sigurður Ingi Jóhannsson.

Ragnhildur Hjaltadóttir.

B deild - Útgáfud.: 18. október 2019