1. gr. Markmið.

Markmið þessarar reglugerðar er að auka neytendavernd á fjarskiptamarkaði og færa gjaldtöku smásölugjalda fyrir reikiþjónustu íslenskra fjarskiptafyrirtækja í Bretlandi til samræmis við Evrópureglur.

2. gr. Gildissvið.

Reglugerðin tekur til allra íslenskra símanúmera og SIM-korta sem íslensk fjarskiptafyrirtæki hafa úthlutað til notenda hvort sem um er að ræða í áskrift eða frelsisþjónustu.

3. gr. Heimaverðskrá.

Fjarskiptafyrirtæki skulu bjóða viðskiptavinum sínum heimaverðskrá (e. Roam Like Home) þegar þeir ferðast til Bretlands, enda sé notkunin í samræmi við eðlilegt notkunarmynstur ferðamanns. Þessi regla gildir ekki um viðvarandi reiki (e. Permanent Roaming).

Sömu skilmálar skulu gilda um reikiþjónustu í Bretlandi gagnvart íslenskum notendum sem almennt gilda samkvæmt evrópsku reikiregluverki, þ.m.t. um eðlilegt notkunarmynstur (e. Fair Use).

4. gr. Reglugerðarheimild og grundvöllur.

Reglugerð þessi er sett á grundvelli 2. mgr. 54. gr. laga um fjarskipti nr. 70/2022 og grundvallast á heildsölugjöldum fyrir reikiþjónustu sem kveðið er á um í XX. viðauka við fríverslunarsamning milli Íslands, Furstadæmisins Liechtensteins og Konungsríkisins Noregs og Sameinaða konungsríkisins Stóra-Bretlands og Norður-Írlands frá 8. júlí 2021 sem tók gildi 1. júní 2023. Viðaukinn er birtur sem fylgiskjal með reglugerð þessari. Reglugerð þessi tekur gildi 1. október 2025. 

B deild — Útgáfudagur: 5. september 2025