Skrá starf hjá Vinnumálastofnun

Atvinnurekendur geta skráð laus störf og náð til fólks í atvinnuleit á Íslandi og í Evrópu.

Skráning starfa

Störf eru skráð á Mínum síðum atvinnurekenda.

Þegar starfið hefur verið skráð fara ráðgjafar hjá Vinnumálastofnun yfir starfslýsinguna. Atvinnurekandi er beðinn um viðbótarupplýsingar ef þær vantar eða ef það þarf að laga texta.

Samskipti milli ráðgjafa og atvinnurekenda eru í gegnum Mínar síður atvinnurekenda.

Umboð til starfsmanna

Atvinnurekendur geta veitt starfsmönnum sínum umboð til að fara inn á Mínar síður atvinnurekenda.

Upplýsingar um umboð á Ísland.is

Skilyrði

• Starf er skráð á kennitölu fyrirtækis. Ef Vinnumálastofnun fær upplýsingar um að starfsemi þurfi að skoða nánar, og ástæða þykir til, hefur stofnunin heimild til að synja fyrirtæki um þjónustu þar til þau mál hafa verið leiðrétt.

• Laun fyrir starf skulu vera samkvæmt kjarasamningum.

Birting starfa

Hægt er að velja um að:

• Auglýsa störf á Mínum síðum Vinnumálastofnunar. Einstaklingar á atvinnuleysisskrá sækja beint um störf þar.

• Auglýsa störf á svæði Vinnumálastofnunar á Ísland.is. Allir geta sótt um störfin.

• Auglýsa störf á evrópsku vinnumiðluninni, EURES. Starfsauglýsingin er sérmerkt og þýdd á ensku. Ef frekari upplýsinga er óskað um EURES er hægt að senda fyrirspurnir á netfangið: eures@vmst.is.

Störf með ráðningarstyrk

Hægt er að velja um að birta starf fyrir alla atvinnuleitendur eða einungis fyrir starfskraft með ráðningarstyrk.

Nánar um ráðningarstyrk

Ráðgjöf

Vinnumálastofnun gegnir mikilvægu hlutverki við að tengja atvinnuleitendur við atvinnurekendur og veita stuðning í atvinnuleit. Hægt er að fá aðstoð frá atvinnuráðgjafa við ráðningarferlið en Vinnumálastofnun kemur ekki að framkvæmd eða skipulagningu atvinnuviðtala, né gerð ráðningarsamninga.

Virkni í atvinnuleit

Einstaklingar sem fá atvinnuleysisbætur hafa ákveðnar skyldur. Meðal þeirra er að mæta í boðuð atvinnuviðtöl og svara símtölum atvinnurekenda.

Með því að skrá starf samþykkja atvinnurekendur að merkja við á Mínum síðum hvort:

• umsækjandi hafi mætt eða ekki

• auðvelt hafi verið að ná í viðkomandi í síma eða ekki.

Það er mikilvægt að vanda til þessarar skráningar enda miklir hagsmunir í húfi fyrir atvinnuleitendur.

Um allt land

Aðstoð við ráðningar er í boði út um allt land, á öllum þjónustuskrifstofum.