Sækja um ráðningarstyrk
Markmið ráðningarstyrks er að aðstoða atvinnurekendur við að fjölga tækifærum á vinnumarkaði fyrir atvinnuleitendur á skrá hjá Vinnumálastofnun.
Með fjárstyrk úr Atvinnuleysistryggingasjóði er atvinnurekendum gert auðveldara fyrir að ráða nýtt starfsfólk um leið og atvinnuleitendur fá tækifæri til komast aftur út á vinnumarkað.
Atvinnurekandi getur fengið upphæð 100% grunnatvinnuleysisbóta auk 11,5% framlags í lífeyrissjóð í allt að 6 mánuði greidda með nýjum starfskrafti eða allt að 390.084 kr. í styrk á mánuði.
Fyrir frekari upplýsingar er hægt að senda tölvupóst á netfangið vinnumidlun@vmst.is
Atvinnurekandi þarf að uppfylla eftirtalin skilyrði:
Ráðningarstyrkur þarf að fela í sér aukningu á starfsmannafjölda hlutaðeigandi fyrirtækis eða stofnunar, starfsmaður er ráðinn sem launamaður.
A.m.k. einn starfsmaður verður að vera á launaskrá í hlutaðeigandi fyrirtæki/stofnun áður en sótt er um ráðningarstyrk.
Hlutaðeigandi fyrirtæki/stofnun má ekki hafa sagt upp starfsfólki síðustu sex mánuði sem gegnt hefur sama starfi og fyrirhugað er að ráða í.
Viðkomandi atvinnuleitandi má ekki hafa sinnt sama starfi hjá hlutaðeigandi fyrirtæki, stofnun eða félagasamtökum á sl. 12 mánuðum.
Fyrirtæki/stofnun sé í skilum hvað varðar launatengd gjöld og opinber gjöld, svo sem iðgjöld og mótframlag í lífeyrissjóð, stéttarfélagsgjöld og tryggingagjald.
Atvinnuleitandi þarf að uppfylla eftirtalin skilyrði:
Atvinnurekandi sækir um ráðningarstyrk og skráir starf á Mínum síðum atvinnurekenda.
Sækja þarf um ráðningarstyrk og skrá starf áður en starfsmaður hefur störf.
Skila þarf inn afriti af undirrituðum ráðningarsamningi milli atvinnurekanda og starfsmanns sem uppfyllir ákvæði viðeigandi kjarasamninga.
Hámarkslengd samnings er 6 mánuðir nema í þeim tilfellum þar sem atvinnuleitandi er með skerta starfsgetu. Í samráði við ráðgjafa Vinnumálastofnunar er hægt að endurskoða lengd samnings.
Almennt er gert ráð fyrir 100% starfshlutfalli þegar um ráðningarstyrk er að ræða.
Samningur um ráðningarstyrk og greiðslur vegna hans falla úr gildi ef viðkomandi atvinnuleitandi hættir störfum hjá atvinnurekanda af einhverjum orsökum á gildistíma samningsins.
Tímabil ráðningarstyrks hjá atvinnuleitanda telst ekki til ávinnslutímabils atvinnuleysisbóta.
Atvinnuleitandi er afskráður af atvinnuleysisskrá á meðan á ráðningartímabili stendur.
Upphæð greiðslna til fyrirtækis tekur mið af því hvað atvinnuleitandi hefur verið lengi á skrá:
Ef atvinnuleitandi hefur verið í 3 – 6 mánuði á skrá fær atvinnurekandi 50% grunnatvinnuleysisbóta ásamt 11,5% mótframlagi í lífeyrissjóð í styrk.
Ef atvinnuleitandi hefur verið 6 mánuði eða lengur á skrá fær atvinnurekandi 100% grunnatvinnuleysisbóta ásamt 11,5% mótframlagi í lífeyrissjóð í styrk.
Dæmi:
Atvinnuleitandi sem hefur verið 4 mánuði á skrá:
Upphæð mánaðarlegs fjárstyrks er 195.042 krónur miðað við 100% starf.
Atvinnuleitandi sem hefur verið 7 mánuði á skrá:
Upphæð mánaðarlegs fjárstyrks er 390.084 krónur miðað við 100% starf.
Nánari leiðbeiningar má finna hér
Þegar atvinnuleysi á landsvísu eða á einstöku landsvæði fer yfir 6% breytast viðmið um greiðslur vegna ráðningastyrkja.
Ef atvinnuleitandi hefur verið 1 mánuð eða lengur á atvinnuleysisskrá fær atvinnurekandi 100% grunnatvinnleysisbóta ásamt 11,5% mótframlagi í lífeyrissjóð í styrk.
Atvinnurekandi sækir um greiðslu styrks inni á Mínum síðum atvinnurekanda. Skilyrði fyrir greiðslu frá VMST er að búið sé að greiða laun og standa skil á launatengdum gjöldum til Skattsins. Með hverri umsókn þarf að fylgja launaseðill fyrir viðkomandi mánuð sem sótt er um.
