Sjúkratryggingar

Sérgreinalæknar

Upplýsingar fyrir sérgreinalækna

Undirritaður var samningur milli sérgreinalækna og Sjúkratrygginga og tók hann gildi þann 1. september 2023. Í samningi kemur fram hvaða gögnum þarf að skila til Sjúkratrygginga til að vera skráður á samning. Læknir skal kynna sér efni samningsins.

Vilji læknir starfa samkvæmt samningi Sjúkratrygginga og Læknafélags Reykjavíkur um þjónustu sjálfstætt starfandi sérgreinalækna er fyrsta skrefið að tilkynna Sjúkratryggingum um það. Til þess að gera það skal fara inn á vefsíðu Sjúkratrygginga – Sjúkratryggingar – velja málaflokkinn Samningar – innkaup og setja í viðfangsefni „Umsókn um þjónustusamning – sérgreinalæknir“. Þá skal læknir veita upplýsingar um sérgrein sína, hvar og hvenær hann hyggst hefja störf. Inntaka nýrra lækna á þjónustusamning er 1. janúar og 1. júlí ár hvert.

Áður en umsókn verður samþykkt þarf að vera búið að skila inn öllum tilskildum fylgigögnum, þ.e. afriti af starfsleyfi, afriti af staðfestingu embættis landlæknis til stofureksturs og afriti af starfsábyrgðartryggingu frá vátryggingafélagi, auk þess sem sækja þarf um sjúklingatryggingu í gegnum Gagnagátt Sjúkratrygginga. Í þeim tilgangi að fylgigögnin skili sér á réttu formi á réttan stað skal senda þau í gegnum Gagnagátt Sjúkratrygginga. Þegar búið er að skila inn umsókn fær læknir senda Skilmála um aðgang fyrir upplýsingakerfi Sjúkratrygginga til rafrænnar undirritunar.

Sækja um þjónustusamning sérgreinalækna utan sjúkrahúsa.

Sjúkratryggingar greiða ekki reikninga vegna verka sem unnin eru áður en þjónustusamningur hefur verið undirritaður.

Það er á ábyrgð læknis að koma umsókn og tilskildum gögnum til Sjúkratrygginga.

Hyggist læknir flytja á aðra starfsstöð og/eða bæta við starfsstöð, þurfa eftirfarandi upplýsingar að liggja fyrir áður en viðkomandi hefur störf á nýjum stað.

Staðfesting embættis landlæknis á að viðkomandi læknir uppfylli faglegar lágmarkskröfur til reksturs þeirrar heilbrigðisþjónustu sem tilkynnt var um (skal liggja fyrir áður en starfsemin hefst á þeirri starfsstofu sem læknir flytur/bætir við starfsemi sína).
Staðfesting á starfsábyrgðartryggingu (frjálsri ábyrgðartryggingu) frá vátryggingafélagi.
Ef breyting verður á starfshlutfalli er mikilvægt að uppfæra skráningu vegna sjúklingatryggingar inni á Gagnagátt Sjúkratrygginga, þannig að heildarstarfshlutfall sé skráð.

Tilkynningu skal senda á laeknar@sjukra.is að lágmarki tveimur vikum áður en störf á nýrri starfsstöð hefjast.