Samkvæmt forsetaúrskurði um skiptingu stjórnarráðsins sem birtur var 15. mars sl. færist Skipulagsstofnun, skipulagslög og lög um skipulag haf- og strandsvæða, undir nýtt embætti félags- og húsnæðismálaráðherra, en heyrðu áður undir innviðaráðherra. Umhverfismat framkvæmda og áætlana mun áfram heyra undir umhverfisráðuneyti, en Skipulagsstofnun annast framfylgd laga um umhverfismat framkvæmda og áætlana eins og verið hefur.

Skipulagsstofnun hefur verið síðustu fjögur ár undir innviðaráðuneytinu en stofnunin og forveri hennar, embætti skipulagsstjóra ríkisins, og sú löggjöf sem stofnunin fer með, heyrði áður undir umhverfisráðuneytið nær frá stofnun þess árið 1990. Fyrir það heyrði stofnunin undir félagsmálaráðuneyti, sem á þeim tíma fór einnig með málefni sveitarfélaga, byggðamál og húsnæðismál.

Skipulagsstofnun þakkar fyrir gott samstarf með ráðherrum, starfsfólki og stofnunum innviðaráðuneytisins síðastliðin ár og væntir áfram góðs samstarfs.