Skipulagsstofnun hefur þróað gátlista sem ætlaðir eru til að styðja sveitarfélög og ráðgjafa við yfirferð skipulagstillagna áður en þær eru teknar fyrir í nefndum og lagðar fram í Skipulagsgátt.

Sveitarfélög bera ábyrgð á gerð og yfirferð skipulagsáætlana og eru því gátlistarnir fyrst og fremst hagnýtt verkfæri sem stuðla að markvissari ferlum, skýrari gögnum og styttri málsmeðferðartíma.

Markmið gátlistanna er að:

• Styðja sveitarfélög í eigin yfirferð og tryggja að lykilatriði varðandi form og efni skipulagstillagna liggi skýrt fyrir.

• Auka skilvirkni í ferlinu í heild,

  sveitarfélögum, stofnuninni og almenningi til hagsbóta.

• Stuðla að samræmi og gæðum í vinnuferlum, bæði hjá sveitarfélögum og ráðgjöfum.

Skipulagsstofnun hvetur sveitarfélög og ráðgjafa til að nýta gátlistana við vinnslu og afgreiðslu skipulagsmála.

Eftirfarandi gátlista má nú finna undir útgefið efni á vef stofnunarinnar:

• Gátlisti fyrir gerð aðalskipulags: Yfirferð skipulagsráðgjafa

• Gátlisti fyrir gerð aðalskipulags: Yfirferð skipulagsfulltrúa

• Gátlisti fyrir gerð deiliskipulags: Yfirferð skipulagsráðgjafa

• Gátlisti fyrir gerð deiliskipulags: Yfirferð skipulagsfulltrúa

Útgáfan er hluti af stærra verkefni við endurskoðun á leiðbeiningaefni Skipulagsstofnunar. Hafir þú ábendingar um ofangreint má koma þeim á framfæri á skipulag@skipulag.is