Náttúruhamfaratrygging Íslands (NTÍ) starfar skv. sérlögum nr. 55/1992 um Náttúruhamfaratryggingu Íslands og reglugerð nr. 700/2019 um Náttúruhamfaratryggingu Íslands með áorðnum breytingum. Starfsstöð NTÍ er í Hlíðasmára 14, Kópavogi.

NTÍ starfar á sviði skaðatrygginga samkvæmt lögum nr. 55/1992 og lögum um vátryggingastarfsemi nr. 100/2016. Í samræmi við lög um endurskoðendur nr. 79/2008 eru vátryggingafélög skilgreind sem einingar tengdar almannahagsmunum og er sérstaklega kveðið á um hlutverk endurskoðunarnefnda í slíkum einingum í lögum um ársreikninga nr. 3/2006.

Samkvæmt útgefnum ársreikningi voru tekjur af vátryggingasamningum 4.722 m.kr. Starfsreglur stjórnar eru aðgengilegar á vef NTÍ. Við gerð stjórnarháttaryfirlýsingar þessarar var stuðst við nýjustu útgáfu leiðbeininga Viðskiptaráðs Íslands, Nasdaq Iceland hf. og Samtaka atvinnulífsins sem tóku gildi 1. júlí 2021.

Náttúruhamfaratrygging er lögbundin trygging sem bætir beint tjón á vátryggðum eignum af völdum eldgosa, jarðskjálfta, skriðufalla, snjóflóða og vatnsflóða. Náttúruhamfaratryggingin fylgir brunatryggingu húseigna sem er lögbundin skyldutrygging. Sé lausafé tryggt gegn bruna, hvort sem er með sérstakri lausafjártryggingu eða samsettri lausafjártryggingu, er innifelur bætur af völdum eldsvoða og flokkast undir eignatryggingar, þá fylgir náttúruhamfaratrygging slíkri vátryggingu. Vátryggingaupphæð náttúruhamfaratryggingar eru sú sama og viðkomandi brunatryggingar en tryggingarskilmálar eru aðrir.

Einnig er skylt að náttúruhamfaratryggja mannvirki, s.s. brýr, hafnir, skíðalyftur og ýmis veitumannvirki í opinberri eigu þótt þau séu ekki brunatryggð. Þegar mannvirki eru náttúruhamfaratryggð hjá NTÍ er átt við frumtryggingastarfsemi á sviði skaðatrygginga. Heimilt er að vátryggja mannvirkin annars staðar en hjá NTÍ.

Ágreiningi um hvort bótaskylt tjón hafi orðið eða um fjárhæð vátryggingarbóta má skjóta til sérskipaðrar úrskurðarnefndar. Formaður úrskurðarnefndar er Helgi Birgisson, lögmaður hjá Forum lögmönnum, tilnefndur af Hæstarétti Íslands. Aðrir nefndarmenn eru Sólveig Þorvaldsdóttir, byggingaverkfræðingur, tilnefnd af Háskóla Íslands, Guðrún Ólafsdóttir, jarðskjálftaverkfræðingur, skipuð af ráðherra og Stefán Már Stefánsson, prófessor emeritus, skipaður af ráðherra. Skipunartími nefndarinnar er til þriggja ára frá 1. mars 2022 til 1. mars 2025.

NTÍ sendir fjármála- og efnahagsráðuneyti ársreikning um leið og hann liggur fyrir og ársskýrslu NTÍ í beinu framhaldi af ársfundi. Önnur samskipti eru í tengslum við lög og reglur sem um NTÍ gilda og úrskurðarnefnd um Náttúruhamfaratryggingu Íslands. Forstjóri leggur áherslu á að upplýsa ráðuneytið um öll mál sem geta talist mikilvæg og/eða þarf að hafa í huga varðandi starfsumhverfi NTÍ.

NTÍ hefur enga dóma hlotið fyrir refsiverðan verknað skv. almennum hegningarlögum, samkeppnislögum, lögum um vátryggingafélög eða löggjöf um bókhald, ársreikninga, gjaldþrot eða opinber gjöld eða þeim sérlögum sem gilda um aðila sem lúta opinberu eftirliti með vátryggingastarfsemi.

NTÍ lýtur eftirliti Seðlabanka Íslands og hefur komið á samhæfðri áhættustýringu sem nær til allra rekstrarþátta NTÍ. Fram til ársins 2017 voru í gildi leiðbeinandi tilmæli FME nr. 3/2014 um áhættustýringu og starfssvið tryggingastærðfræðings hjá vátryggingafélögum sem áhættustýring NTÍ byggði á, en þau hafa nú verið felld úr gildi. Þar sem FME mun ekki viðhalda tilmælunum var ákveðið að líta til COSO ERM 2017 við endurskoðun samhæfðrar áhættustýringar frá árinu 2017. Núverandi áhættustefna byggir því á nýjustu leiðbeiningum COSO sem stendur fyrir Commitee of Sponsoring Organizations of the Treadway Commission.

Stjórnkerfi og skipulag NTÍ er skráð í gæðakerfi hennar. Leiðbeiningar fyrir starfsmenn stofnunarinnar miða að því að hver og einn beri ábyrgð á gæðum vinnu sinnar, þjónustu NTÍ og upplýsingaöryggi. Innra eftirlit er innbyggt í verklagsreglur NTÍ og eru innri úttektir og áhættugreiningar framkvæmdar reglulega. Starfsmaður þjónustusviðs kynnir niðurstöðu gæða- og öryggismála, innri úttekta og stöðu úrbótaverkefna árlega í kjölfar innri endurskoðunar og annarra úttekta fyrir stjórn og endurskoðunarnefnd.

NTÍ leggur áherslu á skýra verkaskiptingu og ábyrgð. Mánaðarleg skýrslugjöf um eignastýringarsafn er mikilvægur þáttur í upplýsingagjöf til stjórnar NTÍ. Að auki er ítarleg skýrslugjöf um safnið ársþriðjungslega og árlega er eigið áhættu- og gjaldþolsmat framkvæmt samhliða ársskýrslu um árangur eignasafnsins. Forstjóri fundar að jafnaði nokkrum sinnum á ári með fjárstýringaraðilum, um hvernig stýringu og eftirliti með fjárfestingum er háttað og til þess að leggja mat á hvort það sé fullnægjandi.

Árleg skýrsla um áhættustýringu og aðrar reglulegar úttektir miða að því að tryggja gagnsæi í starfseminni og auðvelda NTÍ að uppgötva og leiðrétta hugsanlegar skekkjur, fylgjast með frávikum og sveiflum í starfseminni og gefa svigrúm til að bregðast við ef áhættuþættir eða breytingar í rekstrarumhverfi gefa tilefni til. Skuldbinding vegna orðinna tjóna og endurtryggingavernd NTÍ eru metnar með reglulegum hætti og þess gætt að þær séu í samræmi við þarfir stofnunarinnar og skuldbindingar hennar.

Samningur um ytri endurskoðun var gerður við Deloitte haustið 2023 til fimm ára fyrir tímabilið 2023-2027 á grundvelli útboðs með milligöngu Ríkisendurskoðunar. Samningur var í gildi um innri endurskoðun við EY (Ernst and Young) fyrir árin 2022-2024, en vegna sameiningar EY og Deloitte í lok ársins 2023, liggur fyrir að gera þarf samning við annan aðila um innri endurskoðun.

Stjórn og starfsfólk hafa sameiginlega sett siðareglur fyrir NTÍ sem ætlað er að vera nokkurs konar vegvísir fyrir þá sem starfa í þágu NTÍ. Siðareglurnar eru leiðarljós stjórnar og starfsmanna um þá siðferðislegu ábyrgð sem allir hlutaðeigandi hafa sammælst um að fylgja í orði og verki. Reglurnar byggja á gildum sem skulu vera ráðandi í öllum ákvörðun NTÍ, þær eru sanngirni, áreiðanleiki, samvinna og frumkvæði. Siðareglurnar voru síðast endurskoðaðar í október 2023.

Mannauðsstefna var samþykkt í mars 2022, en hún byggir á fimm meginþáttum, vinnustaðamenningu, stjórnun og þróun, starfssambandi, starfsþróun og heilsu og líðan.

Stjórn hefur sett fram framtíðarsýn í einstökum málaflokkum í stefnuskjölum sem eru hluti af gæðakerfi NTÍ. Sett hafa verið markmið og leiðir með öllum stefnum stjórnar til að tryggja innleiðingu þeirra og fylgni við þær.

Starfsreglur stjórnar eru að jafnaði endurskoðaðar árlega og voru þær síðast staðfestar í nóvember 2023. Reglurnar kveða meðal annars á um hæfi stjórnarmanna, verkaskiptingu og skyldur þeirra. Reglurnar ná einnig yfir hlutverk og verksvið stjórnar og forstjóra, fyrirsvar stjórnar stofnunarinnar, upplýsingagjöf til stjórnar, fundarsköp, fundargerðir og ákvörðunarvald stjórnar. Auk stefnumótunarhlutverksins hefur stjórn eftirlit með því að starfsemi NTÍ sé í samræmi við lög og reglur og hefur eftirlit með bókhaldi og ráðstöfun fjármuna stofnunarinnar. Stjórnin hefur eftirlit með virkni áhættustýringar, árangri og skilvirkni innra starfs og stuðlar að því að markmið NTÍ náist.

Áhættustýringarstefna er í stöðugri endurskoðun og eru þrír stærstu áhættuþættir í starfseminni skilgreindir sem; meðferð tjónamála, stýring eignasafns og tryggingafræðileg áhætta. Áhættustýringarstefnan er í anda samhæfðrar áhættustýringar COSO 2017, þar sem m.a. er fjallað um áhættumenningu, stefnumótun, áhættu við framkvæmd verkefna, upplýsingar um áhættu og skýrslugerð ásamt kröfum um innra eftirlit og áhættumælingar.

Upplýsingaöryggisstefna var síðast endurskoðuð í febrúar 2022 og byggir hún á leiðbeinandi tilmælum FME nr. 1/2019 vegna áhættu við rekstur upplýsingakerfa eftirlitsskyldra aðila.

Stjórn staðfesti endurskoðaða umhverfis- og loftslagsstefnu NTÍ í október 2022, en henni er m.a. ætlað að tryggja fylgni við „Græn skref í ríkisrekstri“ og styðja við áherslur ríkisins um samdrátt í losun gróðurhúsalofttegunda. Ekki er í gildi sérstök stefna NTÍ um samfélagslega ábyrgð en í skipulagi og umgjörð starfseminnar eru í gildi reglur sem ætlað er að tryggja rekstrarsamfellu og samfélagslegt öryggi þegar til náttúruhamfara kemur. Birtist þetta m.a. í reglum um fjárfestingarstarfsemi, fjárfestingarstefnu og viðbragðsáætlun.

Stjórn hefur ekki sett sér stefnu um fjölbreytileika í tengslum við stjórn. Stjórn gengur út frá því að þeir sem skipa í stjórnina fari eftir gildandi lögum á hverjum tíma.

Stjórn heldur sameiginlega fundi með innri og ytri endurskoðendum og endurskoðunarnefnd um innra eftirlit og áhættustýringu. Bæði stjórn og endurskoðunarnefnd funda a.m.k. einu sinni á ári án viðveru forstjóra NTÍ. Mat stjórnar á eigin störfum fór síðast fram í október 2023 og taldi stjórn sig hafa uppfyllt skyldur sínar samkvæmt lögum og starfsreglum og að starf hennar hefði skilað tilætluðum árangri. Í árangursmati stjórnar var áhersla lögð á mat á skipulagi og framkvæmd stjórnarfunda, upplýsingagjöf til stjórnar, hlutverk, ábyrgð og valdmörk stjórnar og forstjóra, virkni stjórnarmanna og mat á störfum stjórnarformanns og forstjóra. EY aðstoðaði stjórn við framkvæmd árangursmatsins.

Árlega skilar endurskoðunarnefnd skýrslu til stjórnar um störf sín og leggur mat á eigin störf skv. góðum starfsháttum endurskoðunarnefnda.

Stjórn hefur sett sér persónuverndarstefnu sem birt er á heimasíðu NTÍ. Persónuvernd er hluti af áhættumati við alla samningagerð á vegum NTÍ og eru vinnslusamningar gerðir alls staðar þar sem unnið er með persónuupplýsingar. Mikil áhersla er lögð á öryggi persónuupplýsinga í upplýsingakerfum. PwC sinnir hlutverki persónuverndarfulltrúa fyrir hönd NTÍ.

Mikil áhersla er lögð á eignadreifingu í fjárfestingastefnu NTÍ. Samningar eru við Arion banka, Íslandssjóði, Íslensk verðbréf og Landsbankann um eignastýringu. Eignir eru bæði í innlendum og erlendum eignum og megináhersla lögð á áhættulitlar fjárfestingar þar sem öryggi er haft að leiðarljósi umfram ávöxtun eigna. Analytica hefur eftirlit með eignastýrendum og tekur saman mánaðarleg yfirlit um stöðu safnsins og fylgni við fjárfestingastefnu. Stjórn fær mánaðarlega samantekt um stöðu eignasafnsins til kynningar. Ársþriðjungslega er gerð ítarleg greiningarskýrsla og samanburður á frammistöðu eignastýrenda sem lögð er fyrir stjórn til umfjöllunar. 

Endurtryggingasamningar eru gerðir í þeim tilgangi að draga úr áhættu stofnunarinnar. Stofnunin hefur keypt erlendar endurtryggingar fyrir árið 2024 sem byggja á tveimur samningum. Annar samningurinn hefur tvenns konar virkni. Annars vegar fyrir stakan atburð, allt að 25 ma.kr., með eigin áhættu að fjárhæð 10 ma.kr. Einnig er uppsöfnunarákvæði í samningnum, þar sem nokkrir atburðir af ólíkum tegundum geta talið upp í 10 ma.kr. eigin áhættu, hámark 25 ma.kr. Hinn samningurinn veitir vernd gegn mjög stórum einstökum atburðum þar sem endurtryggjendur greiða allt að 15 ma.kr.umfram það 25 ma.kr. tjón sem fyrri samningurinn tekur til ef um er að ræða stakan atburð. Að jafnaði eru í kringum 25 endurtryggjendur á samningum NTÍ um endurtryggingarvernd vegna áhættu í stóratburðum. Frá árinu 2014 hefur Aon Benfield séð um miðlun endurtrygginga. Endurnýjun endurtryggingasamninga fer fram í lok hvers árs fyrir komandi almanaksár.

Stjórn NTÍ er skipuð fimm einstaklingum og er skipunartími frá 1. júlí 2023 til 30. júní 2027. Þrír eru kosnir af Alþingi. Vátryggingafélög sem innheimta iðgjöld (SFF) velja einn stjórnarmann en fjármála- og efnahagsráðherra skipar formann. Stjórnarmenn eru skipaðir til fjögurra ára í senn. Stjórnina skipa: Sigurður Kári Kristjánsson, stjórnarformaður, Jóna Björk Guðnadóttir varaformaður, Hallfríður G. Hólmgrímsdóttir, Ragnar Þorgeirsson og Steinar Harðarson.

Varamenn í stjórn eru Elísabet Júlíusdóttir, Gunnar Már Gunnarsson, Margrét Arnheiður Jónsdóttir, Sigríður Gísladóttir og Silja Dögg Gunnarsdóttir.

Stjórn Náttúruhamfaratryggingar Íslands telur að ákvæðum leiðbeininga um stjórnarhætti nr. 2.3.2 er varðar óhæði stjórnarmanna sé fullnægt. Stjórnarmenn eru allir óháðir stofnuninni og daglegum stjórnanda hennar.

Það er hefð að bjóða öllum varamönnum að sitja einn stjórnarfund á ári sem áheyrnarfulltrúar, en það er jafnan gert á stjórnarfundi sem haldinn er að morgni ársfundardags í maí ár hvert. Tilgangur með boðun varamanna á árlegan fund er að stuðla að viðhaldi þekkingar á starfseminni og til að tryggja að þeir þekki til þeirra vinnubragða sem viðhöfð eru í tengslum við stjórnarfundi. Stjórn Náttúruhamfaratryggingar Íslands fundaði 12 sinnum á árinu 2023 og var varamaður boðaður til fundar í átta tilvikum vegna fjarveru aðalmanna. Tveir stjórnarmenn voru fjarverandi á þremur fundum og tveir voru fjarverandi á einum fundi. Stjórnarformaður sat alla fundi stjórnar á árinu.

Á árinu tóku fjármál og eignastýringaráherslur um 29% af starfstíma stjórnar, meðferð tjónamála 18%, stefnumótun og gæðamál um 17%, tryggingafræðileg áhætta og endurtryggingar 15% og áhættustýring og eftirlitsþættir í starfseminni 11%. Aðrir þættir í störfum stjórnar námu 8% af starfstíma stjórnar.

Stjórnina skipa:

• Sigurður Kári Kristjánsson, fæddur 9. maí 1973 til heimilis í Reykjavík. Hann hefur gegnt hlutverki stjórnarformanns Náttúruhamfaratryggingar Íslands frá árinu 2015 og er skipaður af ráðherra. Hann hlaut málflutningsréttindi fyrir héraðsdómi 1999 og fyrir Hæstarétti Íslands árið 2017. Sigurður Kári var lögmaður á lögmannsstofunni Lex frá árinu 1998 til 2003, en það ár var hann kjörinn til setu á Alþingi sem þingmaður Reykvíkinga. Frá árinu 2011 hefur Sigurður Kári verið sjálfstætt starfandi lögmaður og rekur lögmannsstofuna LLG Lögmenn í félagi við aðra. Sigurður Kári hefur setið í fjölmörgum stjórnum, ráðum og nefndum á vegum stjórnvalda.

• Hallfríður Guðný Hólmgrímsdóttir fædd 5. júlí 1975 til heimilis í Grindavík, var skipuð í stjórn Náttúruhamfaratrygginga Íslands af Alþingi 2023. Hallfríður lauk B.S. prófi í viðskiptafræði frá Háskólanum á Bifröst árið 2015. Hallfríður hefur setið í bæjarstjórn og bæjarráði Grindavíkur frá árinu 2018 ásamt því að hafa setið í Öldungaráði Grindavíkur á vegum bæjarstjórnar 2019-2022. Hallfríður er að ljúka námi sem húsasmiður við Fjölbrautarskólann í Breiðholti, en hún starfar sem húsamiður.

• Jóna Björk Guðnadóttir, fædd 31. mars 1967 til heimilis í Reykjavík. Hún var skipuð í stjórn NTÍ eftir tilnefningu frá SFF árið 2019 en var varamaður í stjórn frá 2015-2019. Hún er varaformaður stjórnar NTÍ frá vorinu 2023. Jóna Björk lauk embættisprófi í lögfræði frá Háskóla Íslands árið 1994 og starfar sem yfirlögfræðingur Samtaka fjármálafyrirtækja (SFF), en hún hefur starfað hjá SFF síðan 2008. Hún starfaði sem regluvörður Sparisjóðabanka Íslands frá 2006-2008. Frá 2001-2005 starfaði hún sem deildarstjóri í fjármálaráðuneytinu, frá 1999 – 2000 starfaði hún sem framkvæmdastjóri Starfrækslunefndar gagnagrunns á heilbrigðissviði. Að loknu lagaprófi starfaði hún sem fulltrúi sýslumannsins í Keflavík. Jóna Björk hefur setið í fjölmörgum stjórnum og nefndum á vegum stjórnvalda og situr í laganefnd Evrópsku bankasamtakanna.

• Ragnar Þorgeirsson, fæddur 23. janúar 1966, til heimilis í Reykjavík. Ragnar var fyrst skipaður í stjórn NTÍ af Alþingi árið 2015, auk þess sem hann er fulltrúi stjórnar í endurskoðunarnefnd. Ragnar lauk B.A. prófi í opinberri stjórnsýslu frá Háskólanum í Álaborg í Danmörku 1997 og meistaragráðu í alþjóðaviðskiptum, með áherslu á „Private-Public-Partnership“, frá sama skóla árið 2000. Ragnar var stjórnarmaður, formaður endurskoðunarnefndar og síðar sparisjóðsstjóri Sparisjóðs Þórshafnar og nágrennis ses. og útibússtjóri á Þórshöfn eftir sameiningu sparisjóða (2011-2015). Ragnar var framkvæmdastjóri rekstrar, hjá endurskoðunar- og ráðgjafafyrirtækinu PricewaterhouseCoopers ehf. (2005-2011). Einnig hefur hann sinnt lengri og skemmri viðskiptaþróunarverkefnum fyrir ýmis fyrirtæki. Ragnar er löggiltur fasteignasali og starfar á Heimili fasteignasölu auk þess sem hann stundar smábátaútgerð.

• Steinar Harðarson, fæddur 8. apríl 1944, til heimilis í Reykjavík. Hann var í stjórn frá 2011-2015, varamaður frá 2015-2019 og var aftur skipaður í stjórn árið 2019. Steinar lauk sveinsprófi í bifreiðasmíði frá Iðnskólanum í Reykjavík 1964. Hann er véltæknifræðingur frá Polhems Tekniska skola, Gautaborg 1977. Hann starfaði sem svæðisstjóri hjá Vinnueftirliti ríkisins á árunum 1999-2014 og var forstöðumaður framkvæmdasviðs Þórshafnarhrepps 1993-1999. Hefur tekið þátt í alþjóðlegum verkefnum fyrir Vinnueftirlitið og setið í starfshópum á vegum þess. Steinar hefur setið í vinnuhópum um gerð reglugerða á vinnuverndarsviði Félagsmálaráðuneytisins. Steinar hefur viðurkenningu Vinnueftirlitsins sem þjónustuaðili í vinnuvernd og starfar nú sem sjálfstæður vinnuverndarráðgjafi hjá Vinnuvernd og forvörnum ehf. Síðustu ár hefur Steinar starfað sem athafnastjóri fyrir lífsskoðunarfélagið Siðmennt.

Varastjórn:

• Elísabet Júlíusdóttir, fædd 16. júlí 1976, til heimilis í Reykjavík. Hún er varamaður Sigurðar Kára Kristjánssonar. Hún var skipuð í stjórn af ráðherra árið 2023. Elísabet lauk embættisprófi í lögfræði frá Háskóla Íslands árið 2002 og meistaragráðu í Evrópurétti árið 2008. Hún hlaut málflutningsréttindi fyrir héraðsdómi árið 2003. Elísabet starfar sem lögfræðingur í fjármála- og efnahagsráðuneytinu, en hún hefur starfað þar frá árinu 2019. Hún starfaði sem lögfræðingur hjá Arion banka hf. á árunum 2009 til 2019. Að loknu embættisprófi var hún lögmaður á lögmannsstofunni Lögmál ehf. frá 2002-2006.

• Gunnar Már Gunnarsson, fæddur 21. nóvember 1972. Hann er varamaður Hallfríðar G. Hólmgrímsdóttir. Gunnar hefur starfað hjá Sjóvá síðan árið 2005 og var áður hjá Landsbanka Íslands frá 1998 – 2007 með tveggja ára hléi. Hann hefur starfað sem umboðsmaður Sjóvár í Grindavík s.l. 10 ár en áður starfaði hann sem fjármálastjóri í Vélsmiðju Grindavíkur frá 2009 – 2018. Hann hefur setið í bæjarstjórn Grindavíkubæjar frá árinu 2022 og sat einnig áður sem bæjarfulltrúi í Grindavík frá 2008-2010.

• Margrét Arnheiður Jónsdóttir, fædd 11. september 1978, til heimilis í Hafnarfirði. Hún er varamaður Jónu Bjarkar Guðnadóttur. Margrét Arnheiður útskrifaðist sem Cand. Jur frá lagadeild Háskóla Íslands árið 2007 og lauk prófi í verðbréfamiðlun árið 2013. Hún er lögfræðingur hjá Samtökum fjármálafyrirtækja og hefur starfað þar frá árinu 2019. Margrét hefur reynslu af vátryggingastarfsemi og regluvörslu skv. lögum um verðbréfaviðskipti en hún starfaði sem lögfræðingur á skrifstofu forstjóra VÍS og var regluvörður félagsins frá árinu 2011 til ársins 2018. Margrét starfaði auk þess við lögfræðistörf í stjórnsýslunni frá útskrift og þar til hún hóf störf fyrir VÍS 2011.

• Silja Dögg Gunnarsdóttir, fædd 16. desember 1973 til heimilis í Reykjanesbæ. Hún er varamaður Ragnars Þorgeirssonar. Silja er með MIB í alþjóðaviðskiptum frá Háskólanum á Bifröst, auk þess sem hún er með BA í sagnfræði frá HÍ. Silja var alþingismaður Framsóknarflokksins í Suðurkjördæmi frá 2013-2021. Á árunum 2008-2013 starfaði hún sem skjalastjóri og aðstoðarmaður framkvæmdastjórnar hjá HS Orku. Silja Dögg starfar nú sem viðskiptastjóri hjá Algalíf.

• Sigríður Gísladóttir, fædd 24. ágúst 1981 til heimilis á Ísafirði. Hún er varamaður Steinars Harðarsonar. Sigríður er dýralæknir (Cand.med.vet) frá Norges Veterinærhøgskole. Frá árinu 2012 til 2023 starfaði Sigríður sem dýralæknir á sviði fisksjúkdóma hjá Matvælastofnun og Bláum akri ehf. en er nú verkefnastjóri nýrrar námsbrautar og kennari í Menntaskólanum á Ísafirði. Hún sat í hafnarstjórn Ísafjarðarbæjar 2018 til 2022 og í stjórn Náttúrustofu Vestfjarða 2016 til 2022.

Starfsfólk:

Forstjóri NTÍ frá árinu 2010 er Hulda Ragnheiður Árnadóttir, fædd árið 1971. Hún ber ábyrgð á daglegum rekstri stofnunarinnar. Hulda Ragnheiður lauk meistaragráðu í bankastjórnun, fjármálum og alþjóðaviðskiptum árið 2008. Hún lauk B.Sc. í viðskiptafræði árið 2004 og Diploma í opinberri stjórnsýslu og stjórnun árið 2001. Hulda hefur einnig Diploma í góðum stjórnarháttum frá Rannsóknarmiðstöð um stjórnarhætti við Háskóla Íslands. Hulda starfaði áður við innri endurskoðun í Kaupþingi/Arion banka, tímabundið í afleysingum sem bæjarstjóri Blönduóssbæjar og þar áður framkvæmdastjóri fjármála- og stjórnsýslusviðs Húsavíkurbæjar (nú Norðurþings). Áður hafði Hulda starfað bæði sem bóndi og kjólameistari, en hún útskrifaðist með sveinspróf í kjólasaum frá Iðnskólanum í Reykjavík árið 1991.

Fastir starfsmenn eru fimm auk forstjóra; Jón Örvar Bjarnason, sviðsstjóri vátryggingasviðs, Jóhann Árni Helgason, sviðsstjóri þjónustusviðs, Jónína Pálsdóttir, bókari og þjónustufulltrúi, Jóhanna María Kristinsdóttir gæða- og þjónustufulltrúi og Vignir Jónsson sérfræðingur á vátryggingasviði. Jónína er að jafnaði í 90% starfi, Jóhanna í 60% starfi en aðrir í 100% starfi.

Endurskoðunarnefnd starfar eftir starfsreglum á grundvelli IX. kafla A. í lögum um ársreikninga nr. 3/2006. Í 108. gr. er kveðið á um skyldu eininga tengdum almannahagsmunum að starfrækja endurskoðunarnefnd. Endurskoðunarnefnd NTÍ er skipuð þremur nefndarmönnum sem kosnir eru af stjórn NTÍ.

Hlutverk nefndarinnar er að hafa eftirlit með vinnuferli við gerð reikningsskila, áhættustýringu og virkni innra eftirlits. Hún skal tryggja gæði ársreikninga og annarra fjárhagsupplýsinga stofnunarinnar og óhæði endurskoðenda þess.

Endurskoðunarnefnd skipa, Sigurður Þórðarson, formaður,Steinunn Guðjónsdóttir og Ragnar Þorgeirsson sem er einnig stjórnarmaður. Ekki eru skipaðir varamenn í endurskoðunarnefnd og því eru fundir almennt ekki haldnir nema allir nefndarmenn geti mætt til fundarins.

Nefndin fundaði átta sinnum á árinu 2023.

• Sigurður Þórðarson, fæddur 9. desember 1941, til heimilis í Hafnarfirði, fyrrverandi ríkisendurskoðandi. Hann hefur verið formaður endurskoðunarnefndar NTÍ frá árinu 2011. Hann var skipaður ríkisendurskoðandi 1992 og gegndi því starfi til 2008. Sigurður varð löggildur endurskoðandi árið 1982. Hóf störf í Ríkisendurskoðun 1973 til ársins 1982 er hann hóf störf í fjármálaráðuneytinu þar sem hann starfaði þar til hann var skipaður vararíkisendurskoðandi árið 1987. Hann hefur setið í fjölmörgum stjórnum og nefndum á vegum hins opinbera og Hafnarfjarðarbæjar. Frá því að hann lét af störfum sem ríkisendurskoðandi hefur hann verið formaður nokkurra endurskoðunarnefnda hjá stofnunum hins opinbera, lífeyrissjóða og fyrirtækja. Sigurður var skipaður í endurskoðunarnefnd Norræna Fjárfestingarbankans (NIB) 2014 til 4ja ára þar af sem formaður síðustu tvö árin. Þá hefur hann setið í Endurskoðunarráði Viðreisnarsjóðs Evrópuráðsins í París í 3 ár og Evrópuráðsins í Strasbourg í 6 ár. Sigurður var kjörinn endurskoðandi EUROSAI 2002 (Samtaka ríkisendurskoðenda í Evrópu) til fjögurra ára og einnig sat hann í varastjórn og um tíma í stjórn NIB í Helsinki á árabilinu 2009 til 2013.

• Steinunn Guðjónsdóttir, fædd árið 1963, til heimilis í Reykjavík hefur starfað hjá Sjóvá frá árinu 1999. Samhliða starfi sínu hjá Sjóvá var hún fyrstu árin einnig með eigin rekstur sem tryggingastærðfræðingur nokkurra lífeyrissjóða. Síðustu ár hefur hún verið í fullu starfi hjá Sjóvá og gegnir þar hlutverki forstöðumanns trygginga- og tölfræðigreiningar. Steinunn gegndi áður starfi forstöðumanns áhættustýringar Sjóvár og stýrði innleiðingu Solvency II. Steinunn lauk prófi í stærðfræði frá Háskólanum í Groningen í Hollandi árið 1988 og vann fram til ársins 1995 sem stærðfræðikennari við Menntaskólann við Sund, samhliða uppgjörs- og úrskurðarverkefnum fyrir lífeyrissjóði. Hún lauk prófi í tryggingastærðfræði frá Háskólanum í Amsterdam árið 1999.

• Yfirlit um starfsreynslu og bakgrunn Ragnars Þorgeirssonar er að finna undir umfjöllun um stjórn NTÍ en hann tók sæti í endurskoðunarnefnd NTÍ árið 2015.

• 
  Leiðbeiningar Viðskiptaráðs Íslands, Nasdaq Iceland hf. og Samtaka atvinnulífsins taka mið af lögum um hlutafélög og því eiga þau ekki við um starfsemi NTÍ. Engu að síður eru þær hafðar til hliðsjónar við gerð stjórnarháttayfirlýsingarinnar. Í leiðbeiningunum er mælst til þess að tiltaka öll frávik frá leiðbeiningunum og eru það gert í eftirfarandi upptalningu.

  1. kafli.
     • Í ljósi þess að NTÍ er ekki hlutafélag og að stjórn er ekki kosin á aðalfundi á þessi kafli ekki við um starfsemi NTÍ.

  2. kafli.
     • Ákvæði 2.2.1 er ekki fylgt í ljósi þess að skipun stjórnar fer skv. lögum nr. 55/1992 og stjórn hefur ekki ákvörðunarvald um samsetningu stjórnar.
     • Ákvæði 2.3.3 – 2.3.5 og ákveðnir punktar í 2.3.6 eiga ekki við um NTÍ þar sem NTÍ er ekki hlutafélag.
     • Stjórn leggur ekki árlega mat á stærð og samsetningu stjórnar skv. ákvæði 2.6.2 þar sem það er á valdi Alþingis, ráðuneytis og SFF að skipa stjórnarmenn.
     • Kafli 2.7 um starfskjarastefnu á ekki við um NTÍ enda ber NTÍ ekki lagaleg skylda til að hafa slíka stefnu.
     • Stjórn hefur ekki sett sér stefnu um sjálfbærni, fjölbreytileika og siðferði skv. kafla 2.9.
     • Kafli 2.10 um samskipti við hluthafa á ekki við þar sem NTÍ er að fullu í eigu íslenska ríkisins.

  3. kafli.
     • Engin frávik.

  4. kafli.
     • Engin frávik.

  5. kafli.
     • Engar undirnefndir stjórnar eru starfandi hjá NTÍ fyrir utan endurskoðunarnefnd sem er lögbundin og starfar samkvæmt þeim ákvæðum sem um hana gilda.
     • Engin starfskjaranefnd skv.ákvæði 5.4 starfar hjá NTÍ enda er NTÍ ekki hlutafélag.

  6. kafli.
     • Töluliður 7 í ákvæði 6.1.2 á ekki við um starfsemi NTÍ þar sem engin tilnefningarnefnd er starfandi í ljósi þess að NTÍ er ekki hlutafélag.
     • Kafli 6.1.3 á ekki við um NTÍ þar sem NTÍ er ekki hluti af samstæðu.
     • Töluliðir 2, 4, 5, 6, 7,og 8 ákvæðis 6.2.2 eiga ekki við um NTÍ þar sem NTÍ er ekki hlutafélag.

Stjórnarháttayfirlýsing þessi hefur verið sett saman af stjórn og forstjóra NTÍ eftir bestu vitund. Henni er ætlað að veita greinargóðar upplýsingar um stjórnarhætti stofnunarinnar til viðskiptavina, eftirlitsaðila, eiganda og annarra hlutaðeigandi.