Náttúruhamfaratrygging Íslands
Stjórn NTÍ hefur samþykkt að heimila vátryggingafélögum að stofna nýjar og/eða breyta eldri náttúruhamfaratryggingum eigna á Svartsengissvæðinu.
29. janúar 2026
Heimildin tók gildi 1. janúar 2026 og er veitt með skýrum skriflegum fyrirvara um að NTÍ bæti ekki tjón sem tengist yfirstandandi eða yfirvofandi atburðarás á svæðinu. Tryggingar á grundvelli heimildarinnar skulu að öðru leyti vera í samræmi við gildandi lög og reglur."
NTÍ heimilar nýjar og breyttar náttúruhamfaratryggingar á Svartsengissvæðinu með skýrum fyrirvara
Stjórn NTÍ samþykkti á fundi sínum þann 18. desember s.l. að veita vátryggingafélögum heimild til að stofna nýjar náttúruhamfaratryggingar og/eða breyta eldri tryggingum eigna á Svartsengissvæðinu, þrátt fyrir yfirstandandi atburði á svæðinu.
Heimildin tók gildi 1. janúar 2026.
Heimildin er veitt með þeim skýra og skriflega fyrirvara að tryggingarvernd og bótaskylda NTÍ nái ekki til tjóna sem rekja má til þeirrar atburðarásar/vátryggingaratburðar sem nú er hafinn eða talinn yfirvofandi á svæðinu, þar með talið tjóns sem kann að verða af beinum eða óbeinum afleiðingum hans.
Tryggingar sem veittar verða á grundvelli heimildarinnar skulu að öðru leyti vera í samræmi við gildandi lög og reglur NTÍ. Heimildin hefur ekki áhrif á fjárhæð iðgjalda sem greiðast til NTÍ.
Sérstök áritun verður á skírteinum vegna þessa: Náttúruhamfaratrygging Íslands (NTÍ) heimilar vátryggingafélögum að stofna nýjar náttúruhamfaratryggingar og/eða breyta eldri tryggingum eigna á Svartsengissvæðinu þrátt fyrir yfirstandandi atburð á svæðinu, með eftirfarandi skilyrðum:
Tryggingarvernd og bótaskylda NTÍ nær ekki til tjóna, hvorki beinna né óbeinna, né afleiðinga þeirra, sem tengjast yfirstandandi eða yfirvofandi atburðarás á Svartsengissvæðinu sem hófst í nóvember 2023.
Tryggingarvernd og bótaskylda NTÍ bætir aðeins tjón af völdum náttúruhamfara sem falla ótvírætt undir lög nr. 55/1992 og eru ótengd framangreindum atburði.
Þessi heimild hefur ekki áhrif á fjárhæð iðgjalda til NTÍ og felur ekki í sér frávik frá gildandi lögum og reglum NTÍ, þ.m.t. 3. mgr. 6. gr. reglugerðar nr. 770/2023 og 16. gr. laga nr. 55/1992.
NTÍ hefur unnið að framkvæmd samþykktarinnar í samvinnu við vátryggingafélögin og mun jafnframt kynna framkvæmdina og fyrirvarann fyrir viðeigandi aðilum, þar á meðal eftir atvikum eigendum veitu- og hafnarmannvirkja á svæðinu.