Jarðsjárgreiningar og skoðanir

Búið er að fara með jarðsjá um allar götur, en það má búast við að langan tíma taki að ljúka skoðun á lóðum og opnum svæðum. NTÍ mun leggja áherslu á að nota tímann vel á meðan fullt aðgengi er að bænum, með það að markmiði að ná fyrstu skoðun í öllum húsum þar sem tjónstilkynningar hafa borist. Áhersla verður lögð á innanhússskoðanir þar sem ekki er talið óhætt að framkvæma utanhússskoðanir nema frá götum, þar sem jarðsjárskoðunum er ekki lokið í görðum húsa. Hringt verður í eigendur til að bóka skoðanir núna næstu daga.

Staðan á tjónamötum

Frá upphafi tjónsatburðarins hafa borist 456 tilkynningar um tjón á húseignum í Grindavík. Þar af eru 367 íbúðaeignir og 89 atvinnueignir. Búið er að skoða tjón á 266 húseignum en 139 bíða skoðunar. Áhersla hefur verið á uppgjör altjónseigna þar sem það liggur fyrir að endurbygging verður ekki heimil skv. ákvörðun bæjarstjórnar Grindavíkurbæjar miðað við núverandi stöðu í Grindavík. Greitt hefur verið inn á altjónseignir í 37 tilvikum, en hlutatjón hafa beðið afgreiðslu þar sem ekki hefur verið hægt að staðfesta hvort tjón var að fullu komið fram þegar síðasta skoðun fór fram og ekki er hægt að ráðstafa tjónabótum til endurbóta miðað við núverandi stöðu í Grindavík, eins og lögin kveða á um.

Tilkynningar um innbús- og lausafjártjón eru 51 frá upphafi atburðar og er skoðun lokið á 15 innbús- og lausafjártjónum. Búið er að greiða tjónabætur í átta þessara mála og sjö eru í vinnslu.