Þann 20. desember lágu fyrir fyrstu niðurstöður úr tjónaskoðunum sem framkvæmdar hafa verið á síðustu vikum. Sama dag var haft samband við eigendur 15 íbúðarhúsa sem eru talin óviðgerðarhæf. Í nokkrum tilvikum er um að ræða þá óvenjulegu stöðu að íbúðarhús eru talin hafa orðið fyrir altjóni en bílskúrar sem standa við húsin eru minna skemmdir og teljast því viðgerðarhæfir. Ekki hefur verið leitt til lykta hvernig farið verður með þau mál þar sem stakir matshlutar á lóð, s.s. geymslur eða bílskúrar, teljast viðgerðarhæfir en íbúðarhúsin ekki.

NTÍ vinnur nú að greiningu á tjónaupplýsingum varðandi þær eignir sem ekki hafa orðið fyrir altjóni en ljóst er að eru verulega skemmdar. Úrvinnsla þeirra tjónamála sem snúa að mest skemmdu íbúðarhúsunum og atvinnuhúsnæði þar sem miklir hagsmunir eru undir, eru í algjörum forgangi en frumniðurstöður munu þó ekki liggja fyrir fyrr en í janúar.

Það er ljóst að tjónamat í Grindavík og úrvinnsla úr þeim upplýsingum sem þar hefur verið aflað er umfangsmikið og flókið verkefni, en eins og áður segir leggur stofnunin áherslu á að flýta afgreiðslu mála eins og mögulegt er, sérstaklega hvað varðar húseignir sem orðið hafa fyrir miklu tjóni.