Í starfsemi sem byggir á straumlínulögun er leitast við að greina og nýta verkferla sem skila sem bestum árangri á sem fljótlegastan hátt. Greina á hinn bóginn þá snúninga sem ekki gagnast verkefninu, sneiða hjá þeim, og spara þannig tíma og fyrirhöfn. Lyfjastofnun hefur nýtt straumlínustjórnun í starfseminni um árabil.

Opinber þjónusta án stafrænna ferla er óhugsandi á okkar tímum. Lyfjastofnun hefur markvisst unnið að því á síðustu árum að virkja og efla stafrænar lausnir, endurskoða verklag til að bjóða upp á sjálfvirkni í afgreiðslu, og miðla upplýsingum gegnum netið. Hið sama á einnig við um starfið inn á við, hvers konar gagnamóttöku, flokkun og úrvinnslu, allt í því skyni að bæta og hraða þjónustu, draga úr líkum á misfellum, og minnka kostnað. Stöðugt er unnið að endurbótum með þeirri tækni sem tiltæk er á hverjum tíma.

Erlent samstarf er mikilvægur þáttur í starfsemi Lyfjastofnunar og á starfsfólk í nánu samstarfi við systurstofnanir á Evrópska efnahagssvæðinu. Samstarfið kristallast einkum og sér í lagi í starfinu sem fram fer hjá Lyfjastofnun Evrópu (EMA) með útgáfu markaðsleyfa, skráningu aukaverkana og eftirliti með fyrirtækjum og stofnunum sem sýsla með lyf. Norrænu stofnanirnar hafa einnig með sér sérstakt samstarf þar sem markmiðið er að styrkja sameiginlega hagsmuni þessara smærri þjóða í Evrópusamstarfinu, tryggja lyfjaframboð og auka skilvirkni eftirlits.