Lyfjastofnun Evrópu (EMA) og evrópska eftirlitsnetið gegna lykilhlutverki í að stjórna aðgerðum í lyfjaskorti og vinna að því að tryggja aðgengi að nauðsynlegum lyfjum.

Á vefnámskeiði sem EMA heldur þann 4. nóvember nk. verður kynnt fyrir heilbrigðisstarfsfólki og notendum lyfja hvernig stofnunin og aðildarstofnanir hennar vinna að lausnum til að fyrirbyggja lyfjaskort. Á námskeiðinu verður einnig rætt um hvað heilbrigðisstarfsfólk og almenningur getur gert til að draga úr líkum á lyfjaskorti og bregðast rétt við komi til skorts.

Markmið vefnámskeiðsins eru:

• Að veita sjúklingum, notendum og heilbrigðisstarfsfólki upplýsingar um reglubundna ferla innan EES til að takast á við lyfjaskort.

• Að auðvelda aðgengi að upplýsingum um lyfjaskort.

• Að ræða hvernig hægt er að koma í veg fyrir og bregðast við lyfjaskorti í samstarfi við hagsmunaaðila.

• Að hlusta á þarfir, væntingar og áhyggjur þeirra sem verða fyrir áhrifum af lyfjaskorti.

Vefnámskeiðið fer fram rafrænt á vef EMA þriðjudaginn 4. nóvember og stendur frá kl. 13-15 að íslenskum tíma. Námskeiðið er mikilvægt tækifæri til að efla samstarf og samræma aðgerðir til að takast á við þetta alvarlega lýðheilsuvandamál.