Námstími: 3 ár, þar af eitt erlendis.

Marklýsing

Sérnámið er byggt á íslenskri marklýsingu sem er byggð upp á grunni marklýsingar EUMS og vottað af mats- og hæfisnefnd Heilbrigðisráðuneytisins í samræmi við reglugerð 856/2023 og Landspítalanum.

Um námið

Ofnæmis- og ónæmisfræði er ein yngsta sérgrein læknisfræðinnar og hefur hún vaxið umtalsvert á síðustu áratugum. Sérgreinin felur í sér mat og skilning á ónæmiskerfi líkamans og hvernig nýta megi þá þekkingu til rannsókna, greiningar og meðhöndlunar heilsufarsvandamála og sjúkdóma.

Ofvirkni sem og vanvirkni í ónæmiskerfinu geta leitt til fjölbreytilegra vandamála s.s. ofnæmis og ónæmisbilana. Meðhöndlun með ónæmisvirkum meðferðum (immunomodulatory therapy) er nú beitt í fjölmörgum sjúkdómum. Ónæmisvirkum meðferðum hefur fjölgað mjög síðustu ár og því fylgja einnig afleidd vandamál tengd ónæmiskerfinu.

Lágmarkstími námsins eru 3 ár í framhaldi af 3 árum í almennum lyflækningum og að viðkomandi sé búinn með hina bresku RCP gráðu eða eftir fullt nám í lyflækningum. Af þessum þremur árum í ofnæmis- og ónæmislækningum eru tvö tekin hér heima en skv. marklýsingunni skal þriðja árið tekið við viðurkennt erlent háskólasjúkrahús. Námið endar með evrópska prófiinu EAACI/UEMS Knowledge Exam en verður lokið þegar hæfni er náð skv. Gullbók og ákvæðum reglugerðar með sérfræðingsréttinum í ofnæmis- og ónæmislækningum.

Þeir sérfræðingar sem nú eru starfandi á LSH hafa flestir hlotið sérmenntun sína í Bandaríkjunum, Hollandi, Noregi eða Svíþjóð. Þannig hefur myndast hópur sérmenntaðs fólks innan fagsviðsins með bakgrunn frá mörgum af bestu háskólastofnunum þessara landa.