Stofnun Vökudeildar árið 1976 markaði byltingu í umönnun og meðferð nýbura því þá var í fyrsta sinn hægt að veita nýburum gjörgæslumeðferð. Um tíu prósent nýbura leggjast inn á Vökudeild eftir fæðingu eða rúmlega 400 börn á ári.

Að eiga barn á Vökudeildinni, hvort heldur sem er í stuttan eða langan tíma, er erfitt og krefjandi fyrir nýbakaða foreldra. Þeir upplifa hræðslu og vanmáttarkennd í bland við ást og hamingju. Þeir finna þó fljótt að börnin eru í góðum höndum. Ekki aðeins er deildin vel búin nýjustu tækjum heldur er starfsfólk mjög vel þjálfað og menntað. Þetta gerir að verkum að árangur í meðferð veikra nýbura og fyrirbura er á heimsmælikvarða.