Formaður stjórnarinnar er Regína Ásvaldsdóttir, fyrrverandi bæjarstjóri Mosfellsbæjar, og varaformaður er Birna Einarsdóttir, fyrrverandi bankastjóri Íslandsbanka. 

Aðrir stjórnarmenn eru Anna Sigríður Íslind, doktor í tölvunarfræði og prófessor við tölvunarfræðideild Háskólans í Reykjavík, Thor Aspelund, doktor í líftölfræði og prófessor við Miðstöð í lýðheilsuvísindum hjá Háskóla Íslands, og Guðjón Hauksson, forstjóri Sjúkrahússins á Akureyri. Varamenn eru Óskar Reykdalsson, sérfræðingur í heimilislækningum, og Sigurbjörg Sigurgeirsdóttir félagsráðgjafi. 

Þá voru skipaðir tveir áheyrnarfulltrúar starfsmanna spítalans. Þeir eru Signý Sveinsdóttir hjúkrunarfræðingur og Theodór Skúli Sigurðsson svæfingalæknir. Varamaður er Sólveig Steinunn Pálsdóttir sjúkraþjálfari. 

Stjórn Landspítala, í samráði við forstjóra, markar spítalanum langtímastefnu í samræmi við stefnumörkun heilbrigðisráðherra og lögbundið hlutverk stofnunarinnar. Hlutverk hennar er einnig að yfirfara árlega starfsáætlun og ársáætlun samkvæmt lögum um opinber fjármál, leggja sjálfstætt mat á áætlanirnar og markmið og mælikvarða sem þar eru sett fram og gera ráðherra grein fyrir mati sínu.