Landspítali
Kvennaverkfall þá og nú
24. október 2025
Í dag er kvennaverkfall og eru 50 ár liðin frá því að konur lögðu fyrst niður störf, launuð sem ólaunuð, í heilan dag til að mótmæla margvíslegri mismunun gegn konum á vinnumarkaðnum og vekja athygli á framlagi kvenna til samfélagsins. Talið er að þá hafi um 25 þúsund konur safnast saman á útifundi við Lækjartorg.
Ekki allar konur sem störfuðu á Landspítala þann 24. október 1975 gátu lagt niður störf, enda heilsa og öryggi sjúklinga í húfi. En sumar hverjar fengu að hætta í hádeginu til að fara á útifundinn og margar lögðu leið sína í miðbæinn síðla dags, eftir að vakt þeirra lauk. "Þetta breytti sýn manns á framtíðinni því þarna varð stórkostleg breyting,” segir Fanney Sigurðardóttir hjúkrunarfræðingur.
Í meðfylgjandi myndbandi er rætt við Fanneyju, Arnfríði Gísladóttur skurðhjúkrunarfræðing og Jóhönnu Sveinsdóttur sjúkraliða um þeirra upplifun af kvennafrídeginum árið 1975 og hvað hefur breyst á spítalanum síðan þá. #ómissandi