Verkefni Hans Tómasar nefnist „Kortlagning á sértækum kæliferli í spendýrafrumum“. Beðinn um að útskýra nánar hvað í því felst, tekur hann dæmi um börn sem verða fyrir súrefnisskorti við fæðingu. Þau eru þá gjarnan sett í væga kælingu til að virkja ákveðinn feril í frumum líkamans, sem kallast á ensku „mild hypothermia response“. Þegar ferillinn fer af stað er kveikt á þáttum sem draga úr frumudauða og líkur á varanlegum heilaskaða minnka.

Rannsóknarstofa Hans Tómasar hefur verið að kortleggja ferilinn, finna stýriþættina sem hrinda ferlinu af stað og er markmiðið að geta virkjað ferilinn án kælingar en nýlega hefur verið stofnað sprotafyrirtækið KALDUR therapeutics til að færa þessar uppgötvanir til sjúklinga. Stofnendur eru Hans Tómas Björnsson og Martin Ingi Sigurðsson og eiga bæði Landspítali og Háskóli Íslands hlut í því félagi.