Viðurkenningin var veitt níu teymum um allan heim af sjö stórum félagasamtökum á heilbrigðissviði fyrir mikilvæga framþróun í lækningum sem brýtur hefðir („avant garde“). Skilyrðið er aðkoma lækningarannsóknastofa í samstarfi við aðrar sérgreinar.

Fiix-teymið fékk viðurkenninguna fyrir að hafa fundið upp nýtt blóðstorkupróf, Fiix próf, á rannsóknarstofum Landspítala. Prófið gerir áhrif gamla blóðþynningarlyfsins warfaríns stöðugri en mögulegt var með gamla prófinu, PT-INR. Fiix prófið hefur verið notað á Landspítala frá 2016. Páll Torfi Önundarson, yfirlæknir blóðmeinafræði á Landspítala 1998-2024, og Brynja Guðmundsdóttir, lífeindafræðingur á sama stað, gerðu tilraunir frá árinu 2009. Þau fundu upp prófið og framkvæmdu síðan, í samstarfi við aðra, þrjár stórar klínískar rannsóknir á breyttri stýringu warfaríns en warfaríni hefur verið stýrt í 70 ár með gamalli aðferð, PT-INR, um allan heim, en Páll Torfi og Brynja settu spurningamerki við þá aðferð.

Í klínísku rannsóknunum voru bornar saman klínískar niðurstöður skömmtunar warfaríns með nýju Fiix aðferðinni samanborið við hefðbundnu PT-INR aðferðina. Niðurstöðurnar, sem hafa m.a. verið birtar í The Lancet Haematology (2015), Blood (2021) og í Blood VTH (2025), eru samhljóða og benda til þess að sé warfaríni stýrt með Fiix-prófinu fækki blóðtöppum í fólki í blönduðum sjúklingahópum eða með gáttatif um u.þ.b. 50%, bæði miðað við hefðbundna warfarínmeðferð og einnig í samanburði við þrjú ný blóðþynningarlyf (Eliquis, Xarelto of Pradaxa). Blæðingartíðni er ekki aukin.

Davíð O. Arnar, prófessor og yfirlæknir hjartalækninga á Landspítala, Brynja Guðmundsdóttir, lífeindafræðingur og fyrrverandi þróunarverkefnastjóri, Páll Torfi Önundarson, prófessor emeritus og fyrrverandi yfirlæknir blóðmeinafræði á Landspítala, og Einar S. Björnsson, prófessor og yfirlæknir á kennslu- og rannsóknardeild Landspítala. Þess má geta að mun fleiri komu að verkefninu en UNIVANTS heimilar aðeins takmarkaðan fjölda nafna á listann og myndina.