Sveitarfélagið Stykkishólmur varð formlega aðili að Heilsueflandi samfélagi (HSAM) þann 20. mars síðastliðinn þegar Jakob B. Jakobsson bæjarstjóri og Alma D. Möller landlæknir undirrituðu samning þess efnis í sal Íþróttamiðstöðvarinnar í Stykkishólmi. Viðstaddir voru m.a. nemendur í 4.-10. bekk grunnskólans og fjölmargir íbúar. Í framhaldi af undirskriftinni tóku viðstaddir á öllum aldri þátt í hressandi zumba dansi undir stjórn Agnesar Sigurðardóttur. Í HSAM stýrihópi sveitarfélagsins eiga sæti fulltrúar ráðhúss, leikskóla, grunnskóla, ungmennaráðs, Aftanskins/öldungaráðs, æskulýðs- og íþróttanefndar og frá Íþróttamiðstöð auk þess sem leitað hefur verið til HVE. Magnús Bæringsson tómstunda- og æskulýðsfulltrúi er HSAM tengiliður Sveitarfélagsins Stykkishólms.

Ljósmynd: Sumarliði Ásgeirsson

Meginmarkmið Heilsueflandi samfélags er að styðja samfélög í að vinna með markvissum hætti að því að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa. Í slíku samfélagi er heilsa og líðan íbúa í fyrirrúmi í stefnumótun og aðgerðum á öllum sviðum. Starf Heilsueflandi leik-, grunn- og framhaldsskóla, Heilsueflandi vinnustaða og heilsuefling eldri borgara er mikilvægur liður í starfi Heilsueflandi samfélags. Með innleiðingu Heilsueflandi samfélags vinna sveitarfélög meðal annars að innleiðingu heimsmarkmiða Sameinuðu þjóðanna.

Sveitarfélagið Stykkishólmur er 39. samfélagið sem gerist Heilsueflandi samfélag og með Snæfellsbæ, sem bættist í hópinn sama dag, búa nú um 95,3% landsmanna í slíku samfélagi.

• Nánar um Heilsueflandi samfélag

• Fésbókarsíða Heilsueflandi samfélags

• Nánar um Lýðheilsuvísa

• Nánar um heimsmarkmið Sameinuðu þjóðanna

Gígja Gunnarsdóttir, verkefnastjóri Heilsueflandi samfélags
gigja.gunnarsdottir@landlaeknir.is