Inflúensa, RS veirusýking og COVID-19

Inflúensa sækir í sig veðrið í síðustu viku ársins 2024. Samtals 65 einstaklingar greindust, sem eru helmingi fleiri en vikuna á undan. Af þeim voru 38 með inflúensutegund A(pdm09), 26 með tegund A(H3) og einn með inflúensutegund B. Þeir sem greindust voru í öllum aldurshópum en 19 einstaklingar voru í aldurshópnum 65 ára og eldri og níu voru yngri en fimm ára.

Inflúensa hefur tekið við af RS veirusýkingu sem algengasta ástæða einangrunar vegna öndunarfæraveira á Landspítala. Í viku 52 voru 22 inniliggjandi með inflúensu, af þeim voru átta í aldurshópnum 65 ára og eldri en tveir yngri en 5 ára. Auk þessara 22 einstaklinga sem voru inniliggjandi komu 24 einstaklingar á bráðamóttökur og dvöldu þar í lengri eða skemmri tíma.

Aðeins færri greindust með RS veirusýkingu í viku 52 en vikurnar á undan, eða 70 einstaklingar. Þeir sem greindust voru í öllum aldurshópum en 26 voru yngri en eins árs, níu voru á aldrinum 1–2 ára og 16 voru á aldrinum 65 ára og eldri. Einnig lágu heldur færri inni á Landspítala með RS veirusýkingu en vikurnar á undan, eða 16 einstaklingar, þar af þrjú börn undir eins árs aldri, tvö á aldrinum 1–5 ára og fimm einstaklingar 65 ára eða eldri.

Í viku 52 greindust átta einstaklingar með COVID-19. Sex einstaklingar voru inniliggjandi á Landspítala með COVID-19 þessa viku, fjórir 65 ára eða eldri en tveir á aldrinum 15–64 ára.

Aðrar öndunarfærasýkingar

Af öðrum öndunarfæraveirum greindust flestir með aðrar kórónuveirur (heldur en SARS-CoV-2), og rhinoveiru. Fáir greindust með enteroveiru, adenoveiru eða aðrar veirur sem geta valdið öndunarfærasýkingum.

Öndunarfærasýnum sem fara í veirugreiningu í viku hverri hefur fjölgað undanfarnar vikur en 317 sýni voru greind í viku 52. Hlutfall jákvæðra sýna af heildarfjölda sýna var 57% í vikunni en fór yfir 60% í viku 51.

Vikulegur fjöldi klínískra Mycoplasma bakteríusýkinga (greiningar lækna óháð rannsóknarniðurstöðu) hefur sveiflast á milli vikna en í viku 52 greindust fimm einstaklingar. Enginn greindist með kíghósta.

Staðan í Evrópu (vika 51 2024)

• Greiningum á RS veirusýkingu og inflúensu heldur áfram að fjölga í ríkjum ESB/EES en tíðni þeirra er þó í samræmi við það sem við má búast á þessum árstíma.

• Einstaklingar 65 ára og eldri eru í mestri hættu á alvarlegum veikindum og innlögnum á sjúkrahús vegna árlegrar inflúensu þó innlagnir sjáist hjá öllum aldurshópum.

• Meirihluti inniliggjandi á sjúkrahúsum með RS veirusýkingu eru börn tveggja ára eða yngri en 13% einstaklinga eru 65 ára og eldri.

• Tíðni SARS-CoV-2 sýkinga (COVID-19) er almennt minni en var sl. sumar. Einstaklingar í aldurshópnum 65 ára og eldri eru áfram í mestri hættu á sjúkrahúsinnlögn og alvarlegum veikindum vegna COVID-19.

Sjá frekari upplýsingar á vef Sóttvarnastofnunar Evrópusambandsins.

Forvarnir

Búast má við áframhaldandi aukningu inflúensu næstu vikur og hugsanlega RS veirusýkingum einnig. Bólusetningar eru áhrifaríkasta vörnin gegn alvarlegum veikindum vegna öndunarfæraveirusýkinga. Bólusetningar vegna COVID-19 og inflúensu eru enn í boði og einstaklingar eldri en 60 ára og aðrir einstaklingar í áhættuhópum eru hvattir til að þiggja bólusetningu en þessir hópar eru í mestri hættu á alvarlegum veikindum bæði vegna COVID-19 og inflúensu.

Við minnum einnig á almennar sóttvarnir, sjá upplýsingar á vef embættis landlæknis.

Sóttvarnalæknir