Þjónustan ætluð einstaklingum sem þjást af miðlungs- til alvarlegu meðferðarþráu þunglyndi

Meðferðarþrátt þunglyndi er skilgreint þannig að einstaklingur hafi hlotið meðferð með að minnsta kosti tveimur þunglyndislyfjum í mismunandi lyfjaflokkum í að minnsta kosti í sex vikur á viðurkenndum skömmtum án nægjanlegs árangurs.

Geðlækar eða heimilislæknar visa til miðstöðvarinnar. Viðtal við geðlækni Heilaörvunarmiðstöðvar er ávallt undanfari TMS meðferðar.

Notendur greiða komugjald.

TMS er skammstöfun á því sem á ensku nefnist Transcranial Magnetic Stimulation sem þýða mætti sem segulörvun á heila.

TMS-meðferð krefst hvorki svæfingar, deyfingar né skurðaðgerðar. Skjólstæðingur er vakandi meðan á meðferð stendur og getur haldið sína leið að meðferð lokinni.

TMS-meðferð beinist að afmörkuðu svæði heilans og hefur ekki bein áhrif á önnur líffærakerfi.

TMS-meðferð byggir á endurtekningu og krefst þess að skjólstæðingar mæti í meðferð alla virka daga vikunnar í fjórar til sex vikur.

Á Heilaörvunarmiðstöð starfar fagfólk sem fengið hefur sérstaka þjálfun í meðferð með TMS-tækjum.

Aukaverkanir af TMS-meðferð eru bæði fáar og mildar þótt alvarlegri aukaverkanir þekkist. Þegar líður á meðferðina er líklegt að dragi úr þeim.

Algengustu aukaverkanir:

• Höfuðverkur

• Óþægindi í húð á meðferðarstað

• Stingir, krampar eða kippir í andlitsvöðvum (aðeins á meðan meðferð stendur)

Sjaldgæfar en þekktar aukaverkanir:

• Krampar

• Oflæti, einkum hjá fólki með geðhvarfasýki

• Heyrnarskerðing ef heyrnarhlífar eru ekki notaðar

Ráðfærðu þig við lækni eða hjúkrunarfræðing ef eitthvað af eftirtöldu á við:

• Þú ert þunguð eða þungun er ráðgerð

• Þú tekur inn lyf; bæði lyfseðilskyld og ólyfseðilskyld lyf, náttúrulyf, vítamín eða fæðubótarefni

• Þú hefur sögu um krampa eða fjölskyldusögu um flogaveiki

• Þú ert með ígrædd tæki eða hluti (sjá neðar)

Vegna sterks segulsviðs er meðferðin ekki ráðlögð þeim sem hafa ígrædda hluti eða tæki sem segulmagn virkar á.

Algerar frábendingar:

• Hvers konar málmígræðslur eða segulmagnaðir hlutir í hálsi eða höfði

Hugsanlegar frábendingar:

• Hvers konar ígrædd segulmögnuð tæki eða hlutir

• Byssukúlur eða leyfar af þeim

• Önnur málmtæki eða ígræddir hlutir í líkamanum

• Yfirlæknir: Dagur Bjarnason geðlæknir

• Fagstjóri: Jón Gauti Jónsson hjúkrunarfræðingur