• Netfang: gedheilsumidstod.barna@heilsugaeslan.is

• Örugg gagnaskil með Signet Transfer

Ekki er hægt að veita nákvæmar upplýsingar um stöðu á biðlista. Innköllun af biðlista fer eftir móttökudagsetningu tilvísunar og í hvaða úrræði er verið að vísa.

Fyrir upplýsingar um núverandi stöðu á innköllun má senda tölvupóst á inntökuteymi GMB. Sjálfvirkt svar berst með upplýsingum eftir teymum um frá hvaða tímabili er verið að kalla inn af biðlista.

• Netfang: inntaka@heilsugaeslan.is

Ekki er þörf á að hafa samband til að minna á tilvísun. Öllum tilvísunum er svarað með bréfi sem sent er á Heilsuveru. Haft verður samband við foreldra og/eða ungmenni þegar líður að því að hægt er að bjóða viðtal eða greiningarviðtal.

Við 16 ára aldur verða ungmenni sjálfstæðir þjónustuþegar heilbrigðiskerfisins. Ungmenni heldur stöðu á biðlista þrátt fyrir að verða 18 ára á biðtíma.

Á biðtíma er ábyrgð á þjónustu vegna vanda barns í höndum tilvísanda. Í lögum um samþættingu þjónustu í þágu farsældar barna kemur fram að börn eiga rétt á þjónustu án hindrana og þarf formleg greining ekki að liggja fyrir til að barn fái viðeigandi þjónustu.

Greiningarteymin sinna nánari greiningu barna og ungmenna að 18 ára aldri ef sterkar vísbendingar eru um ADHD, einkenni einhverfurófs eða skyldar raskanir, svo sem tilfinningavanda, hegðunarerfiðleika og samskiptavanda.

Greiningarteymi yngri barna sinnir sex til tólf ára börnum og greiningarteymi eldri barna sinnir þrettán til átján ára börnum.

Skilyrði fyrir tilvísun í greiningarteymi er að frumgreining hafi bent til vanda sem veldur hömlun í daglegu lífi. Ef frumgreining gefur til kynna að vandinn sé vægur eða miðlungs alvarlegur skal fyrst láta reyna á úrræði í nærumhverfi. Ekki er gerð krafa á frumgreiningu þegar ungmenni er á aldrinum sextán til átján ára en þörf er á ítarlegri kortlagningu sem bendir til hamlandi vanda.

Miðað er við að greind sé almennt yfir viðmiðum um þroskahömlun. Ef helstu áhyggjur snúa að almennum þroska, málþroskaröskun eða sértækum námserfiðleikum heyrir málið undir skólaþjónustu en ekki Geðheilsumiðstöð barna. Ekki skal vísa börnum í nánari greiningu ef þau eru þegar á biðlista hjá öðrum greiningaraðilum.

Ráðgjafar- og meðferðarteymi veitir ráðgjöf og meðferð til barna og ungmenna að 18 ára aldri vegna miðlungs til alvarlegs geðræns vanda sem þarfnast aðkomu þverfaglegs teymis. Þjónusta teymisins telst til annarrar línu geðheilbrigðisþjónustu. Þjónustuþegar teymisins eru börn og ungmenni sem þurfa umfangsmeiri þjónustu en fram fer í fyrstu línu og eru ekki í þörf fyrir sérhæfða þriðja stigs þjónustu eða bráðaþjónustu. Teymið veitir einnig ráðgjöf til fagaðila og annarra þjónustuaðila á landsvísu.

Mælst er til að forvinna hafi átt sér stað og reynt hafi verið á úrræði í nærumhverfi áður en vísað er í ráðgjöf og/eða meðferð á Geðheilsumiðstöð barnabin. Þjónustan er takmörkuð við ákveðinn tíma og miðar að því að tengja einstaklinga og fjölskyldur við aðra þjónustu í nærumhverfi eða í aðra viðeigandi þjónustu ef þörf er á.

Fjölskylduteymi veitir þjónustu fyrir foreldra á meðgöngu og foreldra ungra barna sem þurfa tengslaeflandi meðferð meðal annars vegna eigin vanlíðanar, flókins og/eða fjölþætts vanda. Einnig ef áhyggjur eru af líðan eða þroska barns. Þjónusta teymisins telst til annarrar línu geðheilbrigðisþjónustu.

Markmið með aðkomu fjölskylduteymis er að efla örugga tengslamyndun á milli foreldra og barns og að styðja við foreldra á erfiðum tímum með farsæld fjölskyldunnar að leiðarljósi. Teymið veitir einnig ráðgjöf til fagaðila og annarra þjónustuaðila á landsvísu.

Grunnhugmyndafræði teymisins byggir á tengslaeflandi nálgun og er meðferð aðlöguð að þörfum þjónustuþega. Notast er við gagnreyndar tengslaeflandi meðferðir og inngrip.