„Við hvetjum fólk til að kynna sér kosti þess að fá bólusetningu við þessum sjúkdómum. Það gæti hentað mörgum 60 ára og eldri að koma í inflúensubólusetningu á heilsugæslustöð í haust og fá þessar bólusetningar í sömu heimsókn,“ segir Ragnheiður Ósk Erlendsdóttir, framkvæmdastjóri hjúkrunar hjá Heilsugæslu höfuðborgarsvæðisins.

Hægt er að kynna sér almennar leiðbeiningar um bólusetningar fullorðinna og forgangshópa á Ísland.is.

Kostnaður við bólusetningar

Þeir sem vilja fá bólusetningar gegn ristli og lungnabólgu þurfa að greiða sjálfir fyrir bóluefnin samkvæmt gjaldskrá heilsugæslunnar.

Sjúkratryggingar Íslands taka þátt í kostnaði við bólusetningu við lungnabólgu hjá forgangshópum sem tilgreindir eru í vinnureglu stofnunarinnar.

Bóluefni gegn ristli

• Bóluefni gegn ristli er ætlað til að minnka líkur á ristilútbrotum og fylgikvillum þeirra hjá fólki sem hefur fengið hlaupabólu.

• Bólusetning dregur úr hættu á ristli og þar með bráðum fylgikvillum sjúkdómsins.

• Bóluefnið dregur einnig úr tíðni heilabilunar og virðast hægja á færniskerðingu í tengslum við heilabilun svo sem Alzheimer hjá bólusettum.

• Gefnir eru tveir skammtar af bóluefninu með um það bil sex mánaða millibili.

Nánari upplýsingar um bólusetningar við ristli má finna á Ísland.is.

Bóluefni gegn lungnabólgu

• Bóluefni gegn lungnabólgu (pneumókokkum) vinna gegn öndunarfærasýkingum á borð við skútabólgu (á ensku sinusitis), eyrnabólgu og lungnabólgu.

• Slíkar öndunarfærasýkingar geta í sumum tilvikum valdið blóðsýkingum, heilahimnubólgu og öðrum lífshættulegum sýkingum.

• Gefinn er einn skammtur af bóluefninu.

Nánari upplýsingar um bólusetningar við lungnabólgu (pneumókokkum) má finna á Ísland.is.