Reglugerð um námsstyrki úr Fræðslusjóði brunamála.

1. gr.

Sjóðurinn heitir Fræðslusjóður brunamála.

2. gr.

Markmið sjóðsins er að stuðla að aukinni þekkingu þeirra sem starfa að brunamálum á sviði brunavarna og slökkvistarfa.

Markmið styrkveitinga er að byggja upp fagþekkingu á sviði brunamála og sérstakra áhættuþátta í umhverfi þeirra sem sækja um styrki og auka hæfni þeirra til miðlunar þekkingar.

Í þeim tilgangi skal sjóðurinn veita styrki til rannsókna og þróunarverkefna vegna brunavarna.

3. gr.

Sjóðurinn greiðir styrki til rannsókna- og þróunarverkefna, og til námskeiðshalds og frekari uppbyggingar fagþekkingar á sviði brunavarna og slökkvistarfa.

4. gr.

Tekjur sjóðsins eru framlag af rekstrarfé Húsnæðis- og mannvirkjastofnunar, skv. ákvörðun stofnunarinnar í samræmi við fjárlög hverju sinni.

5. gr.

Styrkir úr sjóðnum skulu veittir á grundvelli umsókna. Húsnæðis- og mannvirkjastofnun annast úthlutun styrkja að fenginni umsögn úthlutunarnefndar sjóðsins. Auglýsa skal eftir umsóknum um styrki úr sjóðnum.

Húsnæðis- og mannvirkjastofnun, ásamt tveimur hagaðilum, mynda úthlutunarnefnd sjóðsins. Við úthlutun styrkja skal stuðst við umsagnir frá úthlutunarnefndinni áður en afgreiðsla á styrkjum fer fram.

6. gr.

Reikningsár sjóðsins skal vera almanaksárið. Reikningar skulu endurskoðaðir af löggiltum endurskoðendum eða ríkisendurskoðun.

7. gr.

Árlega skal Húsnæðis- og mannvirkjastofnun gera skýrslu þar sem gerð er grein fyrir fjárhag og úthlutunum sjóðsins.

8. gr.

Reglugerð þessi er sett samkvæmt 38. gr. laga nr. 75/2000 um brunavarnir og öðlast gildi 1. janúar 2023. Þann dag fellur jafnframt úr gildi samnefnd reglugerð nr. 266/2001 um námsstyrki úr Fræðslusjóði brunamála.

Innviðaráðuneytinu, 29. desember 2022.

Sigurður Ingi Jóhannsson.

Ragnhildur Hjaltadóttir.