Tilkynnt kynferðisbrot fyrstu sex mánuði ársins 2025

Þetta er meðal þess sem kemur fram í nýrri skýrslu ríkislögreglustjóra sem birt hefur verið á vefsvæði lögreglunnar. Skýrslan tekur til tilkynninga um kynferðisbrot á fyrstu sex mánuðum ársins 2025.  

Helstu niðurstöður eru: 

• Nauðganir: Tilkynntar nauðganir voru 104 á tímabilinu, sem er 8% aukning samanborið við meðaltal sama tímabils síðustu þriggja ára.  

• Brot gegn börnum: Tilkynningum um kynferðisbrot gegn börnum fækkar um 5% miðað við sama tímabil síðustu þriggja ára.   

• Blygðunarsemisbrot: Tilkynningum um blygðunarsemisbrot fækkar mest hlutfallslega séð eða um 31%. Skýringin kann að vera að slík mál eru flokkuð með öðrum hætti, eða birtingarmynd þeirra breyst, til dæmis sem kynferðisleg áreitni eða stafræn kynferðisbrot.    

• Nánari upplýsingar má finna í skýrslunni.

Fræðsla lögreglunnar 

Lögreglan hefur lagt aukna áherslu á fræðslu um meðferð kynferðisbrota í réttarkerfinu, í samræmi við aðgerðaáætlun dómsmálaráðuneytisins. Meðal þess sem lögð hefur verið áhersla á eru:   

• Einkenni áfallastreituröskunar,  

• öflun sönnunargagna / sönnunarmat í kynferðisbrotamálum,  

• aðstæður fatlaðs fólks í réttarkerfinu. 

Á tímabilinu 5.-11. september fór fram fræðsla á vegum Mennta- og starfsþróunarseturs lögreglunnar um skýrslutökur af fólki í viðkvæmri stöðu, með áherslu á einstaklinga með fötlun og unga sakborninga. Auk þess hélt Patrick Tidmarsh, sérfræðingur á sviði rannsókn kynferðisbrota, námskeið dagana 15.-16. september um nýja nálgun í rannsóknum kynferðisbrota: The Whole Story. 

Mikilvægir tenglar 

Nánari upplýsingar um meðferð kynferðisbrota í réttarkerfinu má finna á vef Ofbeldisgáttar 112.is, en þar má finna einnig finna upplýsingar um úrræði fyrir þolendur kynferðisofbeldis. Einnig er hægt að nálgast upplýsingar um meðferð allra sakamála á vefsíðu Ríkissaksóknara.  

Ætíð er hægt að tilkynna mál til 112, www.112.is