Endurkrafa skaðabóta vegna afbrota

Sýslumaðurinn á Norðurlandi vestra sér um innheimtu endurkröfu skaðabóta á hendur tjónvaldi.

Hægt er að greiða kröfu á bankareikning 0159-26-267, kennitala 660914-0990. Tilgreina þarf kennitölu og nafn skuldara við greiðslu í banka.

Greiðsludreifing

Ef þú getur ekki greitt bætur í einu lagi getur þú sótt um greiðsludreifingu með því að senda skriflega beiðni á innheimta@syslumenn.is eða með bréfi til Sýslumannsins á Norðurlandi vestra.

Skilyrði greiðsludreifingar

• Lágmarksfjárhæð mánaðarlegra greiðslna: 10.000 krónur.

• Hámarkstími: 36 mánuðir.

• Sé höfuðstóll kröfurnar uppgreiddur innan 36 mánaða frá því krafan kom til innheimtu er möguleiki á niðurfellingu á uppsöfnuðum dráttarvöxtum með skriflegri beiðni frá skuldara á innheimta@syslumenn.is.

Innheimtuferli

• Þegar krafa er stofnuð birtist hún í heimabanka skuldara.

• Innheimtubréf eru send í pósthólf skuldara á Ísland.is.

• Ef krafan er ógreidd 30 dögum eftir að innheimtubréf er sent og ekki hefur verið um hana samið, getur eftirfarandi úrræðum verið beitt:

  • Skuldajöfnuður við inneignir í ríkissjóði

  • Fjárnámi

  • Nauðungarsölu

  • Skráningu á vanskilaskrá (eftir birtingu greiðsluáskorunar eða árangurslaust fjárnám)

Athugið að dráttarvextir reiknast á vangreidda kröfu mánuði eftir eindaga þess þrátt fyrir greiðslusamkomulag. Skuldajöfnuður við vaxtabætur fer einnig fram óháð greiðslusamningi.

Niðurfelling bótakröfu

Bótanefnd hefur takmarkaðar heimildir til að falla frá endurkröfu. Þó kemur til greina að lækka kröfuna eða fella hana niður ef:

• tjónvaldur er látinn og óverulegar eða engar eignir í búi hans.

• bú hans hefur verið tekið til gjaldþrotaskipta á síðustu tveimur árum.

• tjónvaldur er að afplána refsidóm sem nemur 10 ára óskilorðsbundnu fangelsi hið minnsta og er eignalaus.

• tjónvaldur er yngri en 20 ára, er eignalaus og hefur sýnt viðleitni til að bæta ráð sitt, eða hagir hans hafa breyst verulega frá því hann framdi brot sitt.

Umsókn og fylgigögn

Til þess að óska eftir niðurfellingu eða lækkun kröfu þarf að sækja um það með bréfi til bótanefndar þar sem meðal annars kemur fram:

• hvort umsækjandi er í námi eða vinnu

• hvort umsækjandi hafi bætt ráð sitt

• hvaða atriði eru forsendur umsóknar

Með umsókninni þarf að fylgja:

• sakavottorð umsækjanda

• útprentun úr Lögreglukerfinu sem sýnir að engin meint brot umsækjanda séu til rannsóknar (má nálgast á lögreglustöð með framvísun persónuskilríkja)

• afrit tveggja síðustu skattframtala

Hafa ber í huga að lítil greiðslugeta er ekki grundvöllur til niðurfellingar á endurkröfu.