Aðgangur að lyfjagagnagrunni

Aðgangur lækna

Allir læknar og tannlæknar hafa aðgang að lyfjagagnagrunni. Þar geta þeir:

• ávísað lyfjum rafrænt

• fylgst með lyfjasögu sjúklinga sinna

• séð hvaða lyf eru óútleyst í gátt hvers sjúklings

Hægt er að sjá afgreiddar lyfjaávísanir sjö ár aftur í tímann. Óútleystar ávísanir eyðast úr gátt ári eftir útgáfudag.

Læknar geta annað hvort farið í lyfjagagnagrunn beint úr sjúkraskrárkerfi eða skráð sig inn á sérstaka vefsíðu með rafrænum skilríkjum.

Athugið: Læknar sjá ekki óútleysta lyfseðla í gátt sem gefnir hafa verið út sem pappírslyfseðlar (yfirleitt skömmtunarseðlar).

Í lyfjagagnagrunni geta læknar:

• Séð afgreiddar rafrænar, pappírs- og símsendar lyfjaávísanir sjúklinga sinna

• Séð allar lyfjaafgreiðslur sjúklinga sinna

• Ógilt lyfseðil í lyfseðlagátt sjúklings

• Skrifað og sent rafrænan lyfseðil

• Endurnýjað rafrænan lyfseðil

Allar lyfjaávísanir og afgreiðslur sjúklinga eru aðgengilegar öllum læknum til uppflettingar óháð því hvaða læknir ávísaði lyfinu og hvar hann var staðsettur innan heilbrigðiskerfisins.

Lyfjaupplýsingar uppfærast sem næst rauntíma. Gerð er krafa um hæsta fullvissustig þegar læknar eða einstaklingar auðkenna sig við innskráningu í gagnagrunninn, sem þýðir að gerð er krafa um rafræn skilríki.

Aðgangur einstaklinga

Í Heilsuveru geta einstaklingar nálgast eigin lyfjaupplýsingar á öruggan rafrænan máta og án tafar, hvar og hvenær sem er. Þar má finna upplýsingar um lyfjaávísanir og afgreidd lyf á einstaklinga síðustu 3 ár. Upplýsingarnar eru því ekki bundnar við þá stofnun/læknastofu þar sem upplýsingarnar voru skráðar.

Foreldrar hafa aðgang að lyfjaupplýsingum barna sinna að 16 ára aldri.

Þetta er liður í einstaklingsmiðaðri rafrænni sjúkraskrá og rafrænum samskiptum, sem tryggja skilvirkt og öruggt aðgengi að viðeigandi rauntímaupplýsingum á landsvísu.

Tengt efni