Verkleg flugpróf

• Hæfnipróf á við þegar um er að ræða framlengingu og/eða endurnýjun áritana sem eru í gildi.

Markmið með færniprófi:

• Staðfesta að umsækjandi sé fær um að stjórna loftfari af fyllsta öryggi, þannig að hvorki honum sjálfum, farþegum hans né annarri flugumferð sé hætta búin.

• Fá yfirsýn yfir gæði þjálfunar flugskólanna með því að athuga árangur í flugprófum.

Flugprófin eru mismunandi eftir því um hvers konar próf er að ræða.

• Einkaflugmannsréttindi

• Atvinnuflugmannsréttindi

• Blindflugsáritun

• Fjölhreyflaáritun

Meðan á prófinu stendur er umsækjandinn skráður nemandi og prófdómarinn flugstjóri og ber hann ábyrgð á fluginu í heild.

Flugprófið er í þremur hlutum:

• Fyrirflugsathugun: Farið er yfir það hvernig prófinu skuli háttað og athugað hvort um sé að ræða sérstakar reglur varðandi aðstæður. Farið er munnlega yfir bóklegt efni en með því er athugað hvort umsækjandi geti í raun nýtt sér þá þekkingu sem hann hefur aflað sér.

• Flugið: Í því felst áætlunargerð og að stjórna loftfarinu. Fengnar eru upplýsingar um veður og mat á því, NOTAM athugað, vigt- og jafnvægisútreikningar gerðir, flugtaks- og lendingarvegalengdir eru metnar, ákveðnar eru vararáðstafanir, eldsneytisnotkun metin og gerð rekstrarflugáætlun og ATC flugáætlun.

• Eftirflugsathugun: Farið er yfir prófið að því loknu og frammistaða nemandans rædd og gerð grein fyrir ástæðum ef hann stenst ekki prófið.

Raunsætt er að gefa góðan tíma fyrir undirbúning flugs og er honum í mörgum tilvikum lokið áður en prófdómarinn mætir. Flest flugpróf fela í sér flug frá A til B og síðan til C, auk vissra aðgerða sem flugneminn á að framkvæma.

Prófdómarinn leitast við að láta flugið líkjast sem mest venjubundnu flugi. Verkefnin eru innan þess ramma sem kveðið er á um í viðurkenndri þjálfunarskrá sem er í samræmi við kröfur í reglugerð og ætti því að fela í sér atriði sem umsækjandinn hefur fengið þjálfun í.

Þegar nemandinn kemur í prófið hefur hann með sér nauðsynleg gögn. Þess er vænst að hann hafi náð þeirri færni að geta án hjálpar og af fyllsta öryggi framkvæmt öll þau atriði sem nauðsynleg eru til að ljúka fluginu á öruggan hátt.

Nemandinn á að framkvæma allt sem flugstjóra ber að gera og hafa frumkvæði og taka ákvarðanir í samræmi við ábyrgð flugstjóra.

Nemanda ber að segja prófdómaranum hvað hann ætli að gera og hvers vegna. Það getur komið í veg fyrir misskilning sem ef til vill gæti orðið til þess að prófdómarinn felli rangan dóm.

Nemandinn skal sýna að hann geti:

• Starfrækt loftfarið innan þeirra takmarkana sem því er sett.

• Lokið öllum flugbrögðum af lipurð og nákvæmni.

• Viðhaft góða dómgreind og flugmennsku.

• Beitt þekkingu á flugleiðsögu, ef við á.

• Alltaf haldið góðri stjórn á loftfarinu með þeim hætti að aldrei verði efast um að aðgerð eða flugbragð beri góðan árangur.

Allir prófdómarar eru atvinnuflugmenn með mikla reynslu og vita vel til hvers er ætlast af þeim. Þeir eru allir samhæfðir og fylgja sömu reglum og kröfum og nákvæmum lýsingum á því hvernig og í hverju skuli prófa.

Hér má finna upplýsingar varðandi tilnefningu á prófdómurum fyrir verkleg flugpróf og heimildir til áritana í skírteini

Hér má sjá lista yfir þá aðila sem hafa prófdómaraheimild frá Samgöngustofu

Verklegt próf telst staðist

• Ef ekki eru gerð þau mistök í prófi sem eiga að valda því að nemandinn falli (mistök sem fela í sér að öryggi sé ekki haft í fyrirrúmi).

• Ef nemandinn hefur sýnt fram á að hann hafi þekkingu og færni sem nýtist honum í raun.

• Ef nemandinn hefur sýnt góða dómgreind og að hann kunni að nýta sér þau úrræði sem hann hefur yfir að ráða.

• Ef nemandinn hefur sýnt fram á að hann geti stjórnað loftfarinu á yfirvegaðan og nákvæman hátt og innan viðurkenndra takmarka loftfarsins og í samræmi við gildandi lög og reglur.

Verklegt próf telst ekki staðist

• Ef alvarleg mistök hafa verið gerð (öryggis ekki gætt).

• Ef vafi leikur á að aðgerð eða verklag hafi verið framkvæmt af nægjanlegu öryggi og samkvæmt gildandi lögum og reglum.

• Ef vafi leikur á þegar litið er á heildarútkomu í prófi að nemandinn hafi nauðsynlega hæfileika til að gera áætlun og framkvæma flug á öruggan hátt með tilliti til þeirra réttinda sem sótt er um.

Ef nemandinn fellur á prófinu getur hann, ef hann óskar eftir því, fengið annan prófdómara í endurtökuprófið.

Prófdómarar og matsmenn skulu vera óvilhallir og hlutlægir í mati sínu. Hafi próftaki/nemi ástæðu til að efast um að framangreindra sjónarmiða hafi verið gætt getur hann borið fram kvörtun til Samgöngustofu.

Á þetta við um framkvæmdir á verklegum flugprófum flugliða og prófa eða mats vegna deildarþjálfunar flugumferðarstjóra í ákveðnum tilvikum.

Kvörtunina skal senda ásamt rökstuðningi á netfangið fcl@icetra.is. Eftir að kvörtun berst til Samgöngustofu er hún rýnd af sérstakri áfrýjunarnefnd sem tekur afstöðu til þess hvort prófdæming eða mat hafi verið óvilhallt og hlutlægt.

Frekari upplýsingar er hægt að nálgast með því að senda fyrirspurn á fcl@icetra.is.

• Spurðu ef þú ert í vafa varðandi verkefnið.

• Svaraðu eins vel og þú getur á þinn hátt.

• Segðu við sjálfan þig að þú hafir margsýnt að þú kunnir það sem þú átt nú að gera.

• Ekki velta þér upp úr því sem þér mistókst að gera, einbeittu þér að því sem þú ert að gera.

• Hvað sem gerist, ekki gleyma að stjórna loftfarinu.

• Ef þú treystir þér ekki til að halda áfram segðu þá prófdómaranum að þú viljir hætta við og hvað þú hafir hugsað þér að gera.

• Nýttu þér öll þau úrræði sem þú hefur (þín, annarra, loftfarsins o.s.frv.).

• Ekki afsaka mistök – lærðu af þeim.